ក្រសួងធនធានទឹក និងឧតុនិយមកំពុងអនុវត្តគម្រោងសាងសង់សំណង់បង្ហៀរ(ទ្វារ0៣) លើទំនប់អាងទឹកបែកតាប់ ស្ថិតក្នុងឃុំស្រែណូយ ស្រុកវ៉ារិន ខេត្តសៀមរាប។
មន្ត្រីបច្ចេកទេសក្រសួងបានបញ្ជាក់ថា ការងារសំខាន់ៗនៃគម្រោងសាងសង់សំណង់បង្ហៀរ (ទ្វារ0៣) រួមមាន ៖ទី១)សាងសង់ទំនប់អាងទឹកបែកតាប់ខ្សែទី១ ប្រវែង ១៩០ម៉ែត្រ ,ទី២)សាងសង់ទំនប់អាងទឹកបែកតាប់ខ្សែទី២ ប្រវែង ២៦០ម៉ែត្រ និងទី៣)សាងសង់សំណង់សិល្បការ្យចំនួន២កន្លែង។
ពិនិត្យវឌ្ឍនភាពគម្រោង កាលពីរសៀលថ្ងៃទី២៥ ខែកញ្ញា ឆ្នាំ២០២៤ ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយមនិងមន្រ្តីបច្ចេកទេសក្រសួង និងមន្ទីរបានអញ្ជើញទៅកាន់ទីនោះ។ឯកឧត្ដមរដ្ឋមន្ត្រីបានបញ្ជាក់ឱ្យដឹងថា គម្រោងសាង់សង់សំណង់បង្ហៀរ (ទ្វារ0៣) លើទំនប់អាងទឹកបែកតាប់ គឺក្នុងគោលបំណងរួមចំណែកជួយដោះស្រាយបញ្ហាទឹក ជូនប្រជាកសិករសម្រាប់ស្រោចស្រពបន្ថែមលើផ្ទៃដីបង្កបង្កើនផលស្រូវរដូវវស្សាចំនួន ១ ៨៥២ហិកតា ស្រូវរដូវប្រាំងចំនួន ១២០ហិកតា និងដំណាំរួមផ្សំចំនួន ១ ៥២០ហិកតា។
សូមជម្រាបដែរថា ទំនប់អាងទឹកបែកតាប់មានតួនាទីស្ទាក់ទឹកហូរពីប្រភពទឹកតំបន់ខ្ពង់រាបព្រៃស្អាក និងផ្ទៃរងទឹកភ្លៀងក្នុងតំបន់ មកតម្កល់ទុកសម្រាប់បម្រើឱ្យការងារស្រោចស្រពវិស័យកសិកម្ម និងការប្រើប្រាស់ក្នុងជីវភាពរស់នៅប្រចាំថ្ងៃរបស់ប្រជាពលរដ្ឋចំនួន ១៦ភូមិ នៃឃុំស្រែណូយ ស្រុកវ៉ារិន ៕
