លោក អ៊ី ធារិន អភិបាលនៃគណៈអភិបាលស្រុកព្រៃនប់ បានឱ្យដឹងថា ជំនន់ទឹកភ្លៀងកាលពីថ្ងៃទី១៨ ខែកញ្ញា ឆ្នាំ២០២៤ គិតត្រឹមម៉ោង ១២៖០០នាទី មានប្រជាពលរដ្ឋរងគ្រោះដោយជំនន់ទឹកភ្លៀងនៅក្នុងឃុំចំនួន៣នៃស្រុកព្រៃនប់ ចំនួនសរុប៤៤៩គ្រួសារ ក្នុងនោះ១- ឃុំព្រៃនប់ចំនួន១១៥គ្រួសារ ២-ឃុំទួលទទឹងចំនួន១៥៧គ្រួសារ និង៣-ឃុំអណ្តូងថ្មចំនួន១៧៧គ្រួសារ។
លោកអភិបាលស្រុកបានបញ្ជាក់ថា គ្រោះមហន្តរាយជំនន់ទឹកភ្លៀងកាលពីថ្ងៃទី១៨ ខែកញ្ញា ឆ្នាំ២០២៤នេះ មិនមានរងផលប៉ះពាល់ដល់ទ្រព្យសម្បត្តិ និងអាយុជីវិតរបស់ប្រជាពលរដ្ឋណាម្នាក់ទេ នៅក្នុងឃុំទាំង៣ ហើយអាជ្ញាធរបានជម្លៀសពួកគាត់មកកាន់ទីទួលសុវត្ថិភាពបានទាន់ពេលវេលា។ ដោយសារមានការយកចិត្តទុកដាក់ ពីឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានចុះទៅពិនិត្យស្ថានភាពជំនន់ទឹកភ្លៀងនៅក្នុងស្រុកព្រៃនប់ដោយផ្ទាល់ ព្រមទាំងបានធ្វើការណែនាំដល់អាជ្ញាធរស្រុក អាជ្ញាធរមូលដ្ឋាន កងកម្លាំងប្រដាប់អាវុធ ត្រូវបន្តការតាម ដានយកចិត្តទុកដាក់បន្ថែមទៀតលើគ្រោះធម្មជាតិទឹកជំនន់ ក៏ដូចគ្រោះធម្មជាតិខ្យល់កន្ត្រាក់ ព្រោះស្រុកព្រៃនប់ តែងតែរងផលប៉ះពាល់ដោយគ្រោះធម្មជាតិ ពិសេសខ្យល់កន្ត្រាក់ជារៀងរាល់ឆ្នាំនៅចុងរដូវរំហើយ នៃការប្រមូលទិន្នផលស្រូវវស្សា។
លោកអភិបាលស្រុកបានឱ្យដឹងបន្ថែមថា អាជ្ញាធរស្រុកក៏បានដាក់ចេញនូវវិធានការមួយចំនួនដល់អាជ្ញាធរភូមិឃុំ និងកងកម្លាំងត្រូវចុះតាមដានពីគ្រោះធម្មជាតិឱ្យបានជាប់ជាប្រចាំ ពិសេសត្រៀមលក្ខណៈសម្បត្តិក្នុងការអន្តរាគមន៍ជួយសង្គ្រោះប្រជាពលរដ្ឋពីគ្រោះធម្មជាតិមកកាន់ទីទួលសុវត្ថិភាព ដោយមិនត្រូវទុកឱ្យបងប្អូនប្រជាពលរដ្ឋរបស់យើងណាម្នាក់រងគ្រោះដោយយើងមិនបានចុះជួយអន្តរាគមន៍ ហើយការជួយសង្គ្រោះនេះទៀតសោតមិនប្រកាន់វណ្ណៈ ពូជសាសន៍ ឬនិន្នាការនយោបាយអ្វីឡើយ ព្រោះសុខទុក្ខរបស់បងប្អូនប្រជាពលរដ្ឋនៅមូលដ្ឋាន ក៏ជាការទទួលខុសត្រូវរបស់អាជ្ញាធរផងដែរ។
សូមបញ្ជាក់ថា គិតត្រឹមព្រឹកថ្ងៃទី១៩នេះ ជំនន់ទឹកភ្លៀងបានស្រកចុះវិញហើយ មិនបង្កឱ្យមានផលប៉ះពាល់ទៀតនោះទេ៕
