នាព្រឹកថ្ងៃចន្ទ ទី០២ ខែកញ្ញា ឆ្នាំ២០២៤ នាវាកងទ័ពជើងទឹករបស់ប្រទេសអូស្ត្រាលីចំនួន១គ្រឿង មានឈ្មោះ HMAS PERTH- FFH 157 បានចូលសំចតនៅកំពង់ផែស្វយ័តក្រុងព្រះសីហនុ ប្រកបដោយសុវត្ថិភាព តាមការគ្រោងទុក ដើម្បីដំណើរទស្សនកិច្ចនៅព្រះរាជាណាចក្រកម្ពុជារយៈពេល៣ថ្ងៃ គឺចាប់ពីថ្ងៃទី០២ ដល់០៤ ខែកញ្ញា ឆ្នាំ២០២៤ ដោយទទួលបានស្វាគមន៍ពីលោក វរនាវីឯក មាន សាវឿន នាយសេនាធិការរង កងទ័ពជើងទឹកមូលដ្ឋានសមុទ្រ និងនាយនាវីកងទ័ពជើងទឹកជាច្រើនរូបផ្សេងទៀត។
ក្នុងឱកាសនោះលោក វរនាវីឯក មាន សាវឿន បានស្វាគមន៍ការមកដល់របស់នាវាកងទ័ពជើងទឹកអូស្ត្រាលី និងសូមឱ្យដំណើរទស្សនកិច្ចរបស់មេបញ្ជាការ និងនាវិកកងទ័ពជើងទឹកអូស្ត្រាលី លើទឹកដីព្រះរាជាណាចក្រកម្ពុជា ពិសេសនៅលើទឹកដីខេត្តតំបន់ឆ្នេរនៃភាគនិរតី ទទួលបានសុខសុវត្ថិភាពគ្រប់គ្នា ហើយអាជ្ញាធរ ក៏ដូចកងកម្លាំងរបស់យើងនៅរង់ចាំការពារសន្តិសុខសុវត្ថិភាពសម្រាប់ដំណើរកម្សាន្តនៅខេត្តព្រះសីហនុ ក៏ដូចការធ្វើមាតុភូមិនិវត្តន៍ត្រឡប់ទៅវិញផងដែរ។
នាវានោះមានឈ្មោះ HMAS PERTH – FFH 157 (Anzac Class FFH) មានបណ្ដោយប្រវែង១១៨ម៉ែត្រ ទទឹងប្រវែង១៤,៨ម៉ែត្រ ជម្រៅទឹក៦,៤ម៉ែត្រ ទម្ងន់ផ្ទុក៣៩០០តោន និងមានឧទ្ធម្ភាគចក្រ MH60-Rabbit Seahawk មេបញ្ជាការហោះហើរ (អាកាសយាននិកលោក វរនាវីត្រី Patrick Mc Guire) មាននាវិកសរុប១៩០នាក់ ក្នុងនោះ មាននាយនាវី៣២នាក់ និងនាវិក១៥៨នាក់។ ក្នុងដំណើរទេសចរណ៍នៅលើទឹកដីនៃព្រះរាជាណាចក្រកម្ពុជា នឹងមានការបង្ហាញអំពីប្រតិបត្តិការទូកតូចបច្ចេកទេសពន្លត់អគ្គិភ័យ និងការផ្លាស់ប្តូរបទពិសោធន៍ពីគ្នាទៅវិញទៅមកផងដែរ រវាងកងទ័ពជើងទឹកប្រទេសទាំងពីរ។ នាវានេះ ដឹកនាំដោយលោកឧត្តមនាវីត្រី MICHAEL JOHN HARRIS មេបញ្ជាការកងនាវាទី៧ Indo-pacific Endvor។
ក្នុងដំណើរទស្សនកិច្ច និងស្នាក់នៅព្រះរាជាណាចក្រកម្ពុជា គណៈប្រតិភូនាវាកងទ័ពជើងទឹកអូស្ត្រាលី គ្រោងចូលជួបសម្តែងការគួរសមជាមួយអភិបាលខេត្តព្រះសីហនុ លោកមេបញ្ជាការមូលដ្ឋានសមុទ្ររាម និងទៅធ្វើទស្សនកិច្ចនៅរាជធានីភ្នំពេញ មានដូចជាសារមន្ទីរជាតិទួលស្លែង ព្រះបរមរាជវាំង និងតំបន់កម្សាន្តមួយចំនួនក្នុងខេត្តព្រះសីហនុ និងមានកម្មវិធីលេងកីឡាបាល់ទះលើខ្សាច់ ដើម្បីបង្កើនមិត្តភាព សាមគ្កីភាពរវាងកងទ័ពជើងទឹក នៃប្រទេសទាំងពីរកម្ពុជា-អូស្ត្រាលី។
សូមបញ្ជាក់ថា កាលពីខែសីហា ឆ្នាំ២០២៤ កំពង់ផែស្វយ័តក្រុងព្រះសីហនុ ក៏បានទទួលសំពៅរបស់កងទ័ពជើងទឹកប្រទេសឥណ្ឌូនេស៊ីចំនួន០១គ្រឿង ដែលបានចូលសំចត និងធ្វើទស្សនកិច្ចរយ:ពេល៤ថ្ងៃប្រកបដោយមិត្តភាព និងភាពស្និទ្ធស្នាល៕
