សំរាមដែលធ្លាក់ចូលទៅតាមទឹកទន្លេ និងសមុទ្របានកំពុងបង្កការប៉ះពាល់ដល់សត្វសមុទ្រ និងក៏ដូចជាមនុស្សយើង។ ដូច្នេះការចូលរួមថែរក្សាអនាម័យប្រភពទឹកប្រើប្រាស់របស់ប្រជាពលរដ្ឋ ជីវៈចម្រុះក្នុងទឹក លើកកម្ពស់សោឲភ័ណភាពទីក្រុង និងលើកកម្ពស់វិស័យទេសចរណ៍ជារឿងសំខាន់មិនអាចមើលរំលងបានទេ។ នេះជាការបញ្ជាក់ពីសំណាក់ លោក នូ សុវណ្ណ នាយកប្រតិបត្តិ អង្គការសំអាតទន្លេ សមុទ្រ។
បើតាមលោកនាយកប្រតិបត្តិអង្គការសំអាតទន្លេ សមុទ្រ បានឱ្យដឹងថា កាលពីមុនមកនេះសំរាមនៅតាមឆ្នេរសមុទ្រក្រុងព្រះសីហនុមានច្រើន ប៉ុន្តែបច្ចុប្បន្នមិនសូវមានសំរាមទៀតទេ។ ទាំងនេះដោយសារការដឹកនាំរបស់អាជ្ញាធរ និងពលរដ្ឋដែលរស់នៅទីកន្លែងទាំងនោះចេះទុកដាក់សំរាមបានត្រឹមត្រូវជាងមុន។ ទោះបីយ៉ាងណានៅខេត្តកោះកុងវិញ ស្ថានភាពសំរាមហាក់ពុំទាន់មានភាពល្អប្រសើរឡើយ ពោលគឺសំរាមនៅតែបន្តធ្លាក់ក្នុងសមុទ្រ។
លោក នូ សុវណ្ណ បានបញ្ជាក់ថា ”អង្គការរបស់ខ្ញុំបានទៅធ្វើការសម្អាតនៅកោះស្នេហ៍ ខេត្តកោះកុង បើការពិនិត្យគឺសំរាមនៅទីនោះច្រើនដោយសារប្រជាពលរដ្ឋរស់នៅច្រើនតាមមាត់ទឹក ដូចជាតំបន់ផ្សារត្រី មានសំរាមជាច្រើនក្នុងទឹក ទាំងនេះដោយសារពលរដ្ឋមួយចំនួនមិនបានយល់ដឹងបានចោលសំរាមចូលក្នុងទឹក។ ម្យ៉ាងដោយសារចរន្តទឹកស្រក ទឹកឡើងវាតែងប្រមូលផ្តុំមកកកផ្តុំត្រង់កោះស្នេហ៍នេះតែម្តង។ កោះស្នេហ៍នេះមានឆ្នេខ្សាច់សល្អ តែក៏មានសំរាមនៅរាយប៉ាយច្រើន។ ខ្ញុំសង្ឃឹមថានៅពេលធ្វើការអភិវឌ្ឍ សំរាមនឹងល្អប្រសើរឡើង បងប្អូនពលរដ្ឋនឹងចូលរួមទុកដាក់សំរាមបានត្រឹមត្រូវ។ យ៉ាងណាក៏ដោយបើបងប្អូនរស់នៅតំបន់ទាំងនេះនៅតែបន្តបោះចោលសំរាមនោះសំរាមក្នុងសមុទ្រនឹងនៅច្រើនជាងមុនជាក់ជាពុំខាន។ហេតុនេះការទប់ស្កាត់មិនឱ្យប្រជាពលរដ្ឋបោះសំរាមចោលក្នុងសមុទ្របន្តទៅទៀតជារឿងសំខាន់បំផុត។ យើងត្រូវរួមគ្នាធ្វើយ៉ាងណាមិនត្រូវឱ្យមានការបំពុលទឹកទន្លេ បំពុលទឹកសមុទ្រយើងបន្តទៀត”។
លោកបានបញ្ជាក់បន្ថែមទៀតថា សម្រាប់សំរាមដែលធ្លាក់ចូលទឹកច្រើនបំផុតនៅតំបន់ខេត្តកោះកុង ដូចជាខាងកោះស្តេច កោះស្នេហ៍ ទីកន្លែងនេះគឺសម្បូរខ្លាំង។
ទោះបីលើកឡើងថា សំរាមបានធ្លាក់ក្នុងសមុទ្រជារៀងរាល់ថ្ងៃ និង រៀងរាល់ឆ្នាំក្តី ប៉ុន្តែ នាយកប្រតិបត្តិ អង្គការសំអាតទន្លេ សមុទ្ររូបនេះមិនអាចធ្វើការប៉ាន់ប្រមាណដឹងនោះឡើយទេថាមានចំនួនប៉ុន្មាននោះដែរ ប៉ុន្តែលោកថាតាមការប៉ាន់ប្រមាណគឺសំរាមរាប់សិបតោនក្នុងមួយឆ្នាំៗធ្លាក់ចូលសមុទ្រ ដោយបានលើកឡើងបន្ថែមថា តាមការសង្កេតដោយភ្នែកគេឃើញនៅតំបន់ខាងលើនោះច្រើនខ្លាំងណាស់ ហេតុនេះនៅខាងក្រោមទឹកសមុទ្រវាច្រើនលើសហ្នឹងទៅទៀត។
គួរបញ្ជាក់ថាបើតាម ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាននាកន្លងមកបានអំពាវនាវឱ្យគ្រប់ភាគីចូលរួមសំអាតទឹកសមុទ្រ និងពិសេសត្រូវអប់រំផ្សព្វផ្សាយឱ្យពលរដ្ឋត្រូវចូលរួមទុកដាក់សំរាមឱ្យបានត្រឹមត្រូវ។ ជាមួយគ្នាឯកឧត្តមអំពាវនាវឱ្យពលរដ្ឋត្រូវទុកដាក់សំណល់សំរាមប្លាស្ទិកឱ្យបានត្រឹមត្រូវដែលជាប្រភពបំពុលទឹក បង្កគ្រោះថ្នាក់ដល់ត្រីរស់នៅសមុទ្រ និងក៏ដូចជាប្រជាពលរដ្ឋ។
អង្គការសំអាតទន្លេសមុទ្របានឱ្យដឹងដែរថាបើគិតមកដល់ត្រឹមចុងខែកក្កដា ឆ្នាំ២០២៤កន្លងមក សំរាមជាង១៨៩០ តោនត្រូវបានប្រមូលចេញពីទន្លេមេគង្គ ទន្លេសាប និងទន្លេបាសាក់ ក្នុងភូមិសាស្ត្ររាជធានីភ្នំពេញ ខេត្តកណ្តាល និងខេត្តសៀមរាប។ សំរាមទាំងអស់ត្រូវបានញែកតាមប្រភេទដើម្បីបំលែងជាថាមពល និងផលិតជាស៊ីម៉ង់ត៍៕
