ភ្នំពេញ៖ ក្រោមការយកចិត្តទុកដាក់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី លើសុខទុក្ខ និងសុខុមាលភាពប្រជាពលរដ្ឋ កាលពីល្ងាចថ្ងៃទី២៣ ខែសីហា ឆ្នាំ២០២៤នេះ ឯកឧត្តមឃួង ស្រេង អភិបាលរាជធានីភ្នំពេញ បានណែនាំឱ្យលោក ងី មានហេង ប្រធានមន្ទីរសុខាភិបាលរាជធានីភ្នំពេញ ចាត់ចែងក្រុមជំនាញការងារចុះបាញ់ថ្នាំសម្លាប់មូសជាបន្ទាន់ ពោលគឺបាញ់នៅល្ងាចថ្ងៃទី២៣ ខែសីហា ដោយប្រើប្រាស់ប្រភេទរថយន្តដឹកម៉ាស៊ីនបាញ់ថ្នាំសម្លាប់មូសខ្នាតធំ ដើម្បីលុបបំបាត់ជម្រកមូសខ្លាឱ្យបានទាន់ពេលវេលា ដើម្បីការពារសុខុមាលភាពជូនប្រជាពលរដ្ឋ។
ក្នុងឱកាសនោះ ឯកឧត្តម ឃួង ស្រេង ក៏បានណែនាំឱ្យប្រធានមន្ទីរសុខាភិបាលចាត់ចែងក្រុមការងារបាញ់ថ្នាំសម្លាប់មូសខ្លានៅតំបន់ និងទីតាំងសំខាន់ៗជាច្រើនកន្លែងបន្ថែមទៀត ពិសេសនៅភាគខាងជើងភូមិសាស្ត្ររាជធានីភ្នំពេញ ដូចជានៅតំបន់អគ្គិសនីកម្ពុជា បឹងកក់ ស្ថិតក្នុងខណ្ឌទួលគោក ប្រឡាយអូបាក់ទូក ប្រឡាយអូវែង ប្រឡាយ១៩២៨ ដល់ទំនប់កប់ស្រូវ តំបន់សាកលវិទ្យាល័យអេស៉ីលីដា តំបន់ឡានទឹកនៃស្នងការនគរបាលរាជធានី ក្នុងខណ្ឌឬស្សីកែវ ប្រឡាយទួលសំពៅ និងប្រឡាយអូអាកុជ ស្ថិតនៅខណ្ឌសែនសុខជាដើម។
លោក ងី មានហេង បានគូសបញ្ជាក់ថា យុទ្ធនាការបាញ់ថ្នាំសម្លាប់មូសខ្លា នៅក្នុងភូមិសាស្ត្ររាជធានីភ្នំពេញ គ្រោងនឹងបញ្ចប់នៅទូទាំង១០៥សង្កាត់ នៅថ្ងៃទី២៦-២៧ ខែសីហា ឆ្នាំ២០២៤នេះ។ គិតត្រឹមថ្ងៃទី២៣ ខែសីហាឆ្នាំ ២០២៤នេះ យុទ្ធនាការបាញ់ថ្នាំសម្លាប់មូសខ្លានេះ បានបាញ់រួចរាល់នៅខណ្ឌចំនួន៨ហើយ ដោយក្រុមការងារនឹងបន្តបាញ់ចំនួន៦ខណ្ឌទៀតឱ្យបានចប់រួចរាល់តាមផែនការដែលបានគ្រោងទុក។
សូមបញ្ជាក់ថា តាមរយៈយុទ្ធនាការបាញ់ថ្នាំមូសសម្លាប់មូសខ្លានៅក្នុងភូមិសាស្ត្ររាជធានីភ្នំពេញរយៈពេលប៉ុន្មានថ្ងៃមកនេះ ទទួលបាននូវការគាំទ្រ និងអបអរសាទរយ៉ាងខ្លាំងពីសំណាក់បងប្អូនប្រជាពលរដ្ឋនៅតាមមូលដ្ឋាន។ នេះពិតជាបានបង្ហាញឱ្យឃើញពីការគិតគូរពីសុខទុក្ខ និងសុខុមាលភាពប្រជាពលរដ្ឋរបស់រាជរដ្ឋាភិបាល និងរដ្ឋបាលរាជធានីភ្នំពេញ ក្នុងការទប់ស្កាត់ការឆ្លងជំងឺគ្រុនឈាម៕
