ភ្នំពេញ៖ ប្រមុខរាជរដ្ឋាភិបាលកម្ពុជាបានអះអាងដោយបញ្ជាក់ថា នៅក្នុងកិច្ចព្រមព្រៀងក្នុងក្របខ័ណ្ឌតំបន់អភិវឌ្ឍន៍ត្រីកោណ គឺគ្មានចែងនៅក្នុងចំណុចណាមួយ និយាយលើកឡើងពីការលើកលែងទិដ្ឋាការ និងការបំលាស់ទីដោយសេរី រវាងប្រជាជននៅក្នុងប្រទេសទាំងបីនោះទេ(កម្ពុជា វៀតណាម ឡាវ) ខណៈពេលចេញ-ចូល ត្រូវសុំវីសា និងអនុវត្ដន៍ដូចកន្លែងផ្សេងៗដូចគ្នា អត់មានអីខុសគ្នានោះទេ។ នេះគឺជាការថ្លែងបញ្ជាក់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាក្នុងពិធីសំណេះសំណាល និងពិសាភោជនាហារសាមគ្គី នៃមហាគ្រួសារសមាគម ឧកញ៉ាកម្ពុជា និងសមាគមអ្នកអភិវឌ្ឍន៍លំនៅឋានកម្ពុជា នាល្ងាចថ្ងៃទី០២ ខែសីហា ឆ្នាំ ២០២៤។
សម្ដេចធិបតី ហ៊ុន ម៉ាណែត បានលើកឡើងថា៖ «អីចឹងខ្លាចគេចូលមកនៅដោយសេរី រាប់ពាន់ រាប់ម៉ឺន រាប់សែននាក់អត់មានទេ យើងប្រជាជនតិចមែន គេច្រើនមែន ប៉ុន្ដែវាមានរបាំងច្បាប់ របាំងអធិបតេយ្យដែលមិនឱ្យហូរមកដោយសេរី។ នេះគឺជាការធានារបស់រាជរដ្ឋាភិបាល ដែលមកដល់ម៉ោងនេះ គឺកិច្ចព្រមព្រៀងទាំងអស់គឺគ្មានកន្លែងណានិយាយអំពីការដកចេញនូវការទាមទារលក្ខខ័ណ្ឌអន្ដោប្រវេសន៍ដែលអនុវត្ដន៍កន្លែងផ្សេងៗជាមួយប្រទេសវៀតណាម និងប្រទេសឡាវនោះទេ»។ សម្ដេចធិបតីបានអះអាងថា ការធ្វើបំលាស់ទីមនុស្ស និងយានយន្ដ ត្រូវធ្វើតាមច្បាប់ និងបទប្បញ្ញាតិនៃប្រទេសនីមួយៗ ខណៈពេលដែលកម្ពុជាដឹកទំនិញទៅប្រទេសវៀតណាម ចូលទឹកដីគេត្រូវគោរពច្បាប់គេ។ ចំណែកវៀតណាមពេលដឹកទំនិញចូលដីយើង ចូលព្រំដែនយើងត្រូវគោរពច្បាប់យើង។ «នេះគឺអធិបតេយ្យភាពទាំងរដ្ឋបាល និងច្បាប់គឺនៅតែជារបស់កម្ពុជា ហើយទៅអនាគតក៏នៅតែជារបស់កម្ពុជា គ្មានគោលការណ៍ដែលផ្ទេរទៅជារបស់ប្រទេសណាមួយនោះទេ»។ នេះគឺជាការអះអាងបន្ថែមរបស់សម្ដេចធិបតី ហ៊ុន ម៉ាណែត។
ពាក់ព័ន្ធទៅនឹងការលើកឡើងពីការជួលដីឱ្យទៅប្រទេសជិតខាងហើយ គេនឹងរុញឱ្យមនុស្សចូលមករស់នៅច្រើន ហើយកម្ពុជាក្លាយទៅជាប្រទេសដែលមានប្រជាជនភាគតិចនៅកន្លែងនោះ សម្ដេចធិបតី ហ៊ុន ម៉ាណែត បានបញ្ជាក់ជូនដោយលើកឡើង អំពីការកាន់កាប់សិទ្ធិរបស់ជនបរទេសនៅក្នុងការកាន់កាប់ដីធ្លីជាកម្មសិទ្ធិឯកជននៅកម្ពុជាជាពិសេសនៅតំបន់ព្រំដែនផ្អែកទៅលើច្បាប់របស់កម្ពុជាដែលមានជាធរមាន និងបទដ្ឋានគតិយុត្ដដែលមានជាធរមាន។ សម្ដេចធិបតីក៏បានបញ្ជាក់ផងដែរ ដោយទី១ សារាចរណែនាំលេខ០៨ ស.រ ឆ្នាំ២០១៥ បានហាមប្រជាពលរដ្ឋខ្មែរមិនឱ្យលក់ ឬជួលដីស្រែ ដីចម្ការ ឬលំនៅឋាន នៅតំបន់ព្រំដែនឱ្យទៅប្រជាពលរដ្ឋប្រទេសជិតខាងទោះជាក្នុងរូបភាពណាក៏ដោយ ហើយរាជរដ្ឋាភិបាលនៅតែបន្ដការងារនេះឥតមានប្រែប្រួលនោះទេ។ ទី២ ការវិនិយោគតាមអចលនទ្រព្យ គឺមានច្បាប់ស្ដីពីសិទ្ធិកម្មសិទ្ធិចំណែកឯកជននៃអគារ សហកម្មសិទ្ធិដល់ជនបរទេស ដោយបានបញ្ជាក់ច្បាស់ថា ជនជាតិបរទេសដែលទិញជាខុនដូរ ឬ អាចមានសិទ្ធិទិញខុនដូរពីជាន់ទី១ឡើង ប៉ុន្ដែមិនឱ្យទិញជាន់ផ្ទាល់ដី ឬជាន់ក្រោមដីនោះទេ ហើយបើទិញដី នៅជាន់ផ្ទាល់ដីគឺមិនអនុញាតឱ្យគ្រប់កន្លែងទាំងអស់។ ប៉ុន្ដែការទិញរបស់ជនបរទេសនេះ គឺមិនមែនបាននៅគ្រប់ទីកន្លែងនោះទេ ទី១ ទាល់តែលើសពី៣០គីឡូពីព្រំដែនគោក ទើបអនុញ្ញាតឱ្យ។ គោលការណ៍នេះ មិនមែនសំដៅតែប្រទេសវៀតណាមនោះទេ គោលការណ៍នេះទាំងប្រទេសឡាវ ទាំងប្រទេសថៃ ដែលមានព្រំដែនជាប់កម្ពុជាទាំងបីប្រទេស។
សម្ដេចធិបតីនាយករដ្ឋមន្ដ្រីបានឱ្យដឹងទៀតថា ចំពោះសិទ្ធិក្នុងការទិញអចលនទ្រព្យនេះ ជនបរទេសអាចទិញខុសដូរបាននៅជាន់ទី១ឡើង និងទិញដីលើសពី៣០គីឡូម៉ែត្រ ហើយទិញដីនៅក្រោម៣០គីឡូម៉ែត្រពីព្រំដែន អត់មានសិទ្ធិទិញមកធ្វើជាកម្មសិទ្ធិឯកជននោះទេ លើកលែងតែនៅក្នុងតំបន់សេដ្ឋកិច្ចពិសេសមួយចំនួននោះទេ ក្រៅពីនេះមិនអាចទៅទិញបាននោះទេ មិនថាជាន់ទី១ ឬជាន់ទី២នោះទេ ដែលនេះគឺច្បាប់របស់កម្ពុជាបានអនុញ្ញាត។ ចំពោះនៅក្នុងទីក្រុង ឬទីប្រជុំជន ជនបរទេសអាចទិញពីជាន់ទី១ឡើង ហើយនៅជាន់ផ្ទាល់ដី ឬជាន់ក្រោមដីមិនអនុញាតឱ្យមាននោះទេ។
សម្ដេចធិបតី ហ៊ុន ម៉ាណែត បានបន្ថែមថា ពាក់ព័ន្ធនឹងច្បាប់ និងគោលការណ៍ជាធរមានរបស់យើងមានច្រើនដែលបងប្អូនយើងមិនគួរព្រួយបារម្ភនោះទេ ដោយចាប់តាំងពីឆ្នាំ២០១២មក រាជរដ្ឋាភិបាលមិនមានចេញអាជ្ញាបណ្ណផ្ដល់ដីសម្បទានសេដ្ឋកិច្ចបន្ដទៀតនោះទេ ដីសម្បទានសេដ្ឋកិច្ចដែលមានបច្ចុប្បន្ននេះ គឺជាដីសម្បទានសេដ្ឋកិច្ចចាស់ទេ។ សម្ដេចធិបតីក៏បានថ្លែងបញ្ជាក់ផងដែរថ ការផ្ដល់ដីសម្បទានថ្មីគឺមិនមាននោះទេ ជាពិសេសដីនៅតាមបណ្ដោយព្រំដែនគឺមិនមានទេ។ សម្រាប់កិច្ចសន្យាសម្បទានសេដ្ឋកិច្ចត្រូវបានកំណត់ និងបានប្ដូរ ដែលកាលពីមុនរាជរដ្ឋាភិបាលបានផ្ដល់ជូនរយៈពេល៩៩ឆ្នាំ ហើយនៅឆ្នាំ២០១៥ បានកែមកនៅត្រឹម៥០ឆ្នាំ។ ចំពោះក្រុមហ៊ុនដែលមានអាជ្ញាបណ្ណស្រាប់មុនឆ្នាំ២០១២ ត្រូវអនុវត្ដន៍គោលការណ៍ជាធរមាន ដែលក្នុងនោះការប្រើប្រាស់កម្លាំងពលកម្មត្រឹមតែ១០ភាគរយ ដែលអាចយកជនបរទេសមកបាន ក្រៅពីនេះ៩០ភាគរយ ត្រូវប្រើប្រាស់កម្លាំងពលកម្មនៅក្នុងស្រុកជាប្រជាពលរដ្ឋខ្មែរ៕
