កំពង់ធំ៖ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី ទទួលបន្ទុកបេសកជនពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះអន្តរាយ កាលពីរសៀលថ្ងៃចន្ទ ទី២៩ ខែកក្កដា ឆ្នាំ២០២៤ បានអញ្ជើញចុះពិនិត្យស្ថានភាពផលប៉ះពាល់ និង ខូចខាត លើដំណាំស្រូវរបស់ប្រជាកសិករដោយទឹកជំនន់ទឹកភ្លៀងនៅឃុំក្ដីដូង ស្រុកកំពង់ស្វាយ ខេត្តកំពង់ធំ។
តាមសេចក្ដីរាយការណ៍របស់មន្ទីរធនធានទឹក និងឧតុនិយមខេត្តកំពង់ធំ នាព្រឹកថ្ងៃអង្គារ ទី៣០ ខែកក្កដា ឆ្នាំ២០២៤នេះ បានឱ្យដឹងថា ទឹកជំនន់ទឹកភ្លៀង នៅខេត្តកំពង់ធំ នៅតែបន្តកើនឡើង និងមានភ្លៀងធ្លាក់ជារៀងរាល់ថ្ងៃ លើសពីកម្រិត ប្រកាសប្រុងប្រយ័ត្នហើយ។
ថ្ងៃនេះ នៅស្ថានីយកំពង់ធំ ទឹកមានកម្ពស់១៣,៦៩ម៉ែត្រ ខ្ពស់ជាងថ្ងៃម្សិលមិញ ០,០៦ម៉ែត្រ ហើយកម្រិតទឹកដែលត្រូវប្រកាសប្រុងប្រយ័ត្ន១៣,៥០ម៉ែត្រ។ ចំពោះនៅស្ថានីយ សណ្ដាន់ស្រុកសណ្ដាន់ទឹកមានកម្ពស់១៩,១៦ម៉ែត្រ ខ្ពស់ជាងថ្ងៃម្សិលមិញ០,១២ម៉ែត្រ កម្ពស់ទឹកត្រូវប្រកាសប្រុងប្រយ័ត្ន១៨,៥០ម៉ែត្រ។
កាលពីពេលថ្មីកន្លងថ្ងៃនេះ រដ្ឋបាលខេត្តកំពង់ធំ ក៏បានចេញសេចក្ដីជូនដំណឹង ស្តីពីស្ថានភាពទឹកជំនន់ដើម្បី ឱ្យប្រជាពលរដ្ឋនៅតាម បណ្ដោយដងស្ទឹងសែនមានការ ប្រុងប្រយ័ត្នខ្ពស់ ជាពិសេសចំពោះបងប្អូនដែលរស់នៅក្នុងតំបន់ ងាយរងគ្រោះ និងសូមឱ្យអាជ្ញាធរមូលដ្ឋានគ្រប់លំដាប់ថ្នាក់ក្នុងការត្រៀមរៀបចំផែនការអន្តរាគមន៍ និង ត្រៀមរៀបចំទីទួលសុវត្ថិភាព ឱ្យបានសមរម្យក្នុងការជម្លៀស ប្រជាពលរដ្ឋទៅទីទួល សុវត្ថិភាពក្នុងអំឡុងពេលដែលមានគ្រោះអន្តរាយទឹកជំនន់មកដល់ម្យ៉ាងទៀតត្រូវផ្សព្វផ្សាយណែនាំឱ្យប្រជាពលរដ្ឋយកចិត្តទុកដាក់លើសុខភាពអនាម័យដើម្បីចៀសវាងជំងឺឆ្លងផ្សេងៗ។
តាមសេចក្ដីរាយការណ៍ពីមន្ទីរកសិកម្មរុក្ខាប្រមាញ់និងនេសាទខេត្តកំពង់ធំកាលពីរសៀលថ្ងៃចន្ទ ទី២៩ ខែកក្កដា ឆ្នាំ២០២៤ បានឱ្យដឹងថា ស្ថានភាពទឹកជំនន់ ទឹកភ្លៀងធ្វើឱ្យ ប៉ះពាល់និងខូចខាតលើដំណាំស្រូវរបស់ប្រជាកសិករជាច្រើនហិកតា។ ក្នុង នោះ ប៉ះពាល់ និងខូចខាតលើ ០៨ ក្រុង/ស្រុក។ ស្រុកកំពង់ស្វាយ ស្ទឹងសែន ប្រាសាទសំបូរ សណ្ដាន់ បារាយណ៍ សន្ទុក ស្ទោងនិងស្រុកតាំងគោកស្មើ ២៦ឃុំ/សង្កាត់ លើ១០៧ភូមិ ស្មើនឹង២ ៥៣៦ គ្រួសារ ផ្ទៃដីប៉ះពាល់ ចំនួន៣ ៣១៥ហិកតា និងខូចខាតទាំងស្រុង ចំនួន១៩០៥ ហិកតាស្មើនឹង១ ៥២៥គ្រួសារ។ ស្រុកកំពង់ស្វាយប៉ះពាល់និងខូចខាតធ្ងន់ធ្ងរ ជាងគេ។ ការងារអង្ករបង្កើនផលរបស់កសិករខេត្តកំពង់ធំគិត ត្រឹមថ្ងៃទី២៩ ខែកក្កដាឆ្នាំ ២០២៤អនុវត្តន៍ បានចំនួន២០២៦០៣ហិកតាស្មើនឹង៩៤,៩៨ភាគរយនៃផែនការ ២១៣៣០០ហិកតាកើន លើសឆ្នាំមុនក្នុងរយៈពេលដូចគ្នាចំនួន៥៨២៤ហិកតា៕
