កណ្តាល៖ ប្រជាពលរដ្ឋ រងគ្រោះដោយជំនន់ទឹកភ្លៀង ចំនួន១៤៧គ្រួសារ ដែលរស់នៅតាមបណ្តោយ ប្រឡាយ៩៤ និងប្រឡាយ៩៦ ស្ថិតនៅ ស្រុកកណ្តាលស្ទឹង និងក្រុងតាខ្មៅ ត្រូវបានអាជ្ញាធរ ជំលៀសមកស្នាក់នៅបណ្តោះអាសន្ន នៅទីទួលសុវត្តិភាពដើម្បីបញ្ជៀស នូវគ្រោះថ្នាក់ណាមួយជាយថាហេតុ។
ខណៈដឹកនាំមន្ត្រីជំនាញ អង្គភាពពាក់ព័ន្ធ និងអាជ្ញាធរស្រុកកណ្ដាលស្ទឹង និងក្រុងតាខ្មៅ ចុះពិនិត្យស្ថានភាព ជំនន់ទឹកភ្លៀង នៅតាមបណ្តោយ ប្រឡាយ លេខ៩៤ និងប្រឡាយលេខ ៩៦ ស្ថិតនៅ ស្រុកកណ្តាលស្ទឹង និងក្រុងតាខ្មៅ នារសៀលថ្ងៃទី២៨កក្កដានេះ ឯកឧត្ដម ហាក់ សុខមករាអភិបាលរងខេត្កណ្តាល តំណាងឯកឧត្ដម គួចចំរើន អភិបាលខេត្តកណ្តាល បានណែនាំដល់អាជ្ញាធរ និងកម្លាំងសមត្ថកិច្ច ស្រុកកណ្ដាលស្ទឹង និងក្រុងតាខ្មៅ ត្រូវជំលៀសប្រជាពលរដ្ឋ មកស្នាក់នៅទីទួលសុវត្ថិភាព បណ្តោះអាសន្ន ដើម្បីបញ្ជៀសនូវគ្រោះថ្នាក់ណាមួយកើតឡើងជាយថាហេតុ ព្រោះថាស្ថានភាពទឹកនៅពេលនេះ នៅតែបន្តឡើងជាបន្តបន្ទាប់។
ជាមួយគ្នានេះ ឯកឧត្ដម អភិបាលរងខេត្ត ក៍បានណែនាំផងដែរ ត្រូវចុះដល់មូលដ្ឋាន ដែលកំពុងជន់លិចដោយជំនន់ទឺកភ្លៀង ដោយមិនឱ្យមាន ប្រជាពលរដ្ឋណាម្នាក់បន្តរស់នៅតំបន់ ដែលរងហានិភ័យដោយជំនន់ទឹកភ្លៀងនេះឡើយ។
ទន្ទឹមនិងនោះដែរ អាជ្ញាធរ និងកម្លាំងមានសមត្ថកិច្ច ត្រូវយកចិត្តទុកដាក់ខ្ពស់ ក្នុងការការពារនិងថែរក្សាសុវត្ថិភាព របស់បងប្អូនប្រជាពលរដ្ឋ ដែលមកស្នាក់នៅបណ្ដោះអាសន្ន នៅទីទួលសុវត្ថិភាពនៅមូលដ្ឋានរបស់ខ្លួន ឲ្យបានល្អប្រសើរ។
ជាមួយគ្នានេះផងដែរ ឯកឧត្តមអភិបាលរងខេត្ត បានណែនាំដល់មន្ទីរជំនាញពាក់ព័ន្ធ ត្រូវរៀបចំប្រពន្ធ័ទឹកស្អាត បង្គន់អនាម័យ សម្រាប់បងប្អូនប្រជាពលរដ្ឋ ដែលមកស្នាក់នៅបណ្ដោះអាសន្ន នៅទីទួលសុវត្ថិភាពនេះ ឱ្យបានគ្រប់គ្រាន់ និងធានាសុវត្ថិភាព។
សូមបញ្ជាក់ថា៖ ក្នុងរយៈពេលប៉ុន្មានថ្ងៃមកនេះ មានភ្លៀងធ្លាក់ជាបន្តបន្ទាប់ បណ្ដាលធ្វើឱ្យស្ទឹងព្រែកត្នោត និងតំបន់មួយចំនួនមានការជន់លិច ដោយជំនន់ទឹកភ្លៀង ក្នុងនោះសង្កាត់កំពង់សំណាញ់ ក្រុងតាខ្មៅ ប្រជាពលរដ្ឋចំនួន ១១០គ្រួសារបានរងការជន់លិចដោយជំនន់ទឹកភ្លៀង និងបានជំលៀស មកស្នាក់នៅ ទីទួលសុវត្ថិភាពរួចហើយ និង៨៨ គ្រួសារទៀត ទទួលរងនូវផលប៉ះពាល់។
ដោយឡែក នៅឃុំកណ្ដោក ស្រុកកណ្ដាលស្ទឹង ប្រជាពលរដ្ឋរងផលប៉ះពាល់ដោយជំនន់ទឹកភ្លៀងមានចំនួន ២៩៤ គ្រួសារ ហើយគ្រួសារជំលៀសមកស្នាក់នៅបណ្តោះអាសន្ន នៅទីទួលសុវត្ថិភាព មានចំនួន ៣៧ គ្រួសារ៕
ប្រភព៖ មន្ទីរព័ត៌មានខេត្តកណ្តាល
