ភ្នំពេញ៖ គិតចាប់ពីខែមករា រហូតដល់ខែមិថុនា ឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងថ្មី, គម្រោងពង្រីកផលិតកម្ម, និងគម្រោងវិនិយោគបង្កើតតំបន់សេដ្ឋកិច្ចពិសេសសរុបចំនួន ១៩០គម្រោង ដែលមាន ទុនវិនិយោគសរុបប្រមាណ ៣,២ពាន់លានដុល្លារអាម៉េរិក និងអាចបង្កើតការងារបានចំនួន ១៦៨.៥៧២កន្លែង។
បើធៀបនឹងរយៈពេលដូចគ្នានៅឆ្នាំ២០២៣ ការអនុម័តគម្រោងវិនិយោគមានការកើនឡើងចំនួន ៧៧គម្រោង ខណៈទុនវិនិយោគមានការកើនឡើងគួរឱ្យកត់សម្គាល់ដល់ទៅប្រមាណជាង ២ពាន់លានដុល្លារអាម៉េរិក។ នេះបើយោងតាមសេចក្តីជូនដំណឹងរបស់ក្រុមប្រឹក្សាអភិវឌ្ឍន៍កម្ពុជា នាព្រឹកថ្ងៃទី៥ ខែកក្កដានេះ។
សូមបញ្ជាក់ជូនថា ចំពោះគម្រោងដែលមានភាពលេចធ្លោប្រចាំឆមាសទី១ក្នុងឆ្នាំនេះ មាន ៨គម្រោង ដែលនៅក្នុងតំបន់សេដ្ឋកិច្ចពិសេស និង៨គម្រោងទៀតនៅក្រៅតំបន់សេដ្ឋកិច្ចពិសេស។
តាមសេចក្តីជូនដំណឹងខាងលើ បានបញ្ជាក់ថា ក្នុងរយៈពេល៦ខែដដែលនោះ ទុនវិនិយោគក្នុងវិស័យឧស្សាហកម្ម មាន៥៦.៥៩% ស្មើនឹងជាង១,៨០០លានដុល្លារ, វិស័យហេដ្ឋារចនាសម្ព័ន្ធ និងផ្សេងៗ មាន២៣.១១% ស្មើនឹងជាង៧០០លានដុល្លារ, វិស័យទេសចរណ៍ មាន១៨.០៧% ស្មើនឹងជាង៥០០លានដុល្លារ និងវិស័យកសិកម្ម និងកសិ-ឧស្សាហកម្ម មាន២.២១% ដែលស្មើនឹងទឹកប្រាក់ជាង ៧២លានដុល្លារ។
ជាមួយគ្នានោះចំពោះប្រភពទុនវិនិយោគវិញ កម្ពុជាមាន ៥០.១៥% ខណៈដែលប្រទេសចិនមាន ៤២.៦៤%។ ខេត្តកំពង់ស្ពឺទទួលបានគម្រោងវិនិយោគច្រើនជាងជាង។ រីឯវិស័យកាត់ឧស្សាហកម្មការដេរ មានរហូតដល់៥១ ក្នុងចំណោមគម្រោងវិនិយោគសរុប៕
.j.jpg)
.j.jpg)
.j.jpg)
