បន្ទាយមានជ័យ៖ គណៈកម្មាធិការព្រំដែនថ្នាក់ភូមិភាគកម្ពុជា-ថៃ រវាងយោធភូមិភាគទី៥(កម្ពុជា) និងកងទ័ពភូមិភាគទី១(ថៃ) បានបើកកិច្ចប្រជុំរបស់ខ្លួនលើកទី៣០ ដើម្បីបង្កើនកិច្ច សហប្រតិបត្តិការរវាងភាគីទាំងពីរដែលបានកសាងឡើងលើមូលដ្ឋាន ស្មើភាព ភាតរភាព គោរពគ្នាទៅវិញទៅមកសំដៅពង្រឹង និងជំរុញលើកកម្ពស់ឱ្យព្រំដែនកម្ពុជា-ថៃ ជាព្រំដែន សន្តិភាព កិច្ចសហប្រតិបត្តិការ និងការអភិវឌ្ឍ។
កិច្ចប្រជុំនេះត្រូវបានធ្វើឡើងនៅសាលប្រជុំសណ្ឋាគារ Krungsri River ខេត្តព្រះនគរ ស្រីអាយុធ្យា ប្រទេសថៃ ដែលប្រព្រឹត្តទៅចាប់ពីថ្ងៃទី២៦ ខែមិថុនា ដល់ថ្ងៃទី២៨ ខែមិថុនា ឆ្នាំ២០២៤នេះ ក្រោមអធិបតីភាព ឯកឧត្តម ឧត្តមសេនីយ៍ឯក ឯក សំអូន មេបញ្ជាការ រងកងទ័ពជើងគោក មេបញ្ជាការយោធភូមិភាគទី៥ នៃព្រះរាជាណាចក្រកម្ពុជា និងឯកឧត្តម ឧត្តមសេនីយ៍ទោ ឈិតសៈនុផុង រ៉តស៊ីរិ មេបញ្ជាការកងទ័ពភូមិភាគទី១ នៃព្រះរាជាណាចក្រ ថៃឡង់ដ៍ និងដោយបានការចូលរួមពីថ្នាក់ដឹកនាំអភិបាលអភិបាលរងខេត្ត មន្ទីរអង្គភាព ដែលមានការពាក់ព័ន្ធ ខេត្តជាប់ព្រំដែន នៃព្រះរាជាណាចក្រកម្ពុជា មានខេត្តបាត់ដំបង ខេត្តបន្ទាយមានជ័យនិងព្រះរាជាណាចក្រថៃឡង់ដ៍។
ឯកឧត្តម ឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក មេបញ្ជាការ យោធភូមិភាគទី៥ នៃព្រះរាជាណាចក្រកម្ពុជា បានឱ្យដឹងថា កិច្ចប្រជុំនេះជាការប្តូរវេនគ្នា ក្នុង១ឆ្នាំម្តង ធ្វើជាម្ចាស់ផ្ទះដើម្បីធ្វើការពិភាក្សាគ្នាពាក់ព័ន្ធកិច្ចសហប្រតិបត្តិការលើវិស័យ យោធា សន្តិសុខ និងវិស័យផ្សេងៗទៀតឱ្យកាន់តែល្អទ្វេឡើង ព្រមទាំងដោះស្រាយ នូវរាល់បញ្ហា តាមតំបន់ព្រំដែនរួមគ្នាឱ្យបានឆាប់រហ័ស ព្រមទាំងជំរុញគោលនយោបាយ ការដោះស្រាយបញ្ហាតាមព្រំដែន ឆ្ពោះទៅរកប្រក្រតីភាពឱ្យកាន់តែមានភាពល្អប្រសើរឡើង ថែមទៀត។ ការរឹតចំណងសម្ព័ន្ធមេត្រីភាព រវាងស្ថាប័នកងទ័ព ស្ថាប័នស៊ីវិល នៅតាមបន្ទាត់ ព្រំដែន នៃប្រទេសទាំងពីរឱ្យមានភាពរីកចម្រើនលើគ្រប់វិស័យ ដែលជាគុណប្រយោជន៍ សម្រាប់ប្រជាជនរស់នៅតាមបន្ទាត់ព្រំដែន កម្ពុជា-ថៃ ក្នុងភូមិសាស្ត្រទទួលខុសត្រូវ រវាងយោធភូមិភាគទី៥កម្ពុជា ជាមួយនឹងកងទ័ពភូមិភាគទី១ ថៃ៕
