ព្រះសីហនុ ៖ កាលពីថ្ងៃទី១៥ ខែមិថុនា ឆ្នាំ២០២៤ វេលាម៉ោង ០០និង១០នាទី កម្លាំងមន្ទីរប្រឆាំងគ្រឿងញៀន ដឹកនាំដោយលោកវរសេនីយ៍ឯក វ៉ាន់ កែវវង្សវិចិត្រ នាយករងមន្ទីរ បានសហការជាមួយកម្លាំងការិយាល័យនគរបាលប្រឆាំងគ្រឿងញៀន នៃស្នងការដ្ឋាននគរបាលខេត្ដព្រះសីហនុ ដឹកនាំដោយលោកវរសេនីយ៍ឯក កាន់ វណ្ណា ស្នងការរងផែនការងារប្រឆាំងគ្រឿងញៀន និងលោកវរសេនីយ៍ឯក អិន សំអុល នាយការិយាល័យ និងដោយមានការសម្របសម្រួលនីតិវិធីពីដោយលោក ពេញ ពិសិដ្ឋ ព្រះរាជអាជ្ញារង នៃអយ្យការអមដំបូងខេត្ដព្រះសីហនុ បានចុះបង្ក្រាបករណីជួញដូររក្សាទុក និងផលិតដោយខុសច្បាប់នូវសារធាតុញៀន ចំនួន០១ករណី ដែលប្រព្រឹត្ដនៅចំណុចក្រុមទី៣ ភូមិ១ សង្កាត់លេខ៣ ក្រុង-ខេត្ដព្រះសីហនុ ដោយបានជនសង្ស័យចំនួន ០១នាក់ ជនជាតិចិន ព្រមទាំងដកហូតវត្ថុតាងមួយចំនួន រួមមាន ម្ស៉ៅក្រាមពណ៌ស សង្ស័យជាសារធាតុចំនួន ១០ដុំ រថយន្ដចំនួនម៉ាក ROLL-ROY ពណ៌ខ្មៅ ផ្លាកលេខ កម្ពុជា.ZCY.1688 ។
នៅថ្ងៃខែឆ្នាំដដែល វេលាម៉ោង០១និង០០នាទី ជនសង្ស័យខាងលើ បានសហការជាមួយនឹងសមត្ថកិច្ច បន្ដទៅឆែកឆេរផ្ទះស្នាក់នៅរបស់ខ្លួន ដែលស្ថិតក្នុងភូមិ៥ សង្កាត់លេខ៤ ក្រុងព្រះសីហនុ ខេត្ដព្រះសីហនុ និងបានឃាត់ខ្លួនជនសង្ស័យចំនួន ០៤នាក់ ស្រី ០១នាក់ (ជនជាតិចិន ០៣នាក់ ស្រី ០១នាក់ជនជាតិខ្មែរ ០១នាក់) ព្រមទាំងដកហូតវត្ថុតាងមួយចំនួនរួមមាន ម្ស៉ៅក្រាមពណ៌សថ្លាសង្ស័យជាសារធាតុញៀនមួយចំនួនធំ សារធាតុគីមីផ្សំមួយចំនួនធំ រថយន្ដចំនួន ០៣គ្រឿង ។
នៅថ្ងៃខែឆ្នាំដដែល វេលាម៉ោង ០២និង០០នាទី ជនសង្ស័យខាងលើ បានសហការជាមួយនឹងសមត្ថកិច្ច បន្ដទៅឆែកឆេរវីឡាមួយកន្លែង គ្មានលេខ ស្ថិតក្នុងក្រុមទី៥ ភូមិ៣ សង្កាត់លរខ៣ ក្រុងព្រះសីហនុ ខេត្ដព្រះសីហនុ និងបានឃាត់ខ្លួនបក្ខពួកចំនួន ០៤នាក់ ស្រី ០១នាក់ (ជនជាតិចិនចំនួន ០៣នាក់ ជនជាតិវៀតណាមស្រី ០១នាក់) ព្រមទាំងដកហូតវត្ថុតាងបានមួយចំនួនរួមមាន រថយន្ដចំនួន ០១គ្រឿង ម៉ាក TUNDRA ពណ៌ខ្មៅ ផ្លាកលេខ ភ្នំពេញ 2AF-7179 ប្រាក់ចំនួន ១៦០០០ដុល្លារ (មួយម៉ឺន-ប្រាំមួយពាន់ដុល្លារ) នាឡិកាដៃចំនួន ០២គ្រឿង ម៉ាក ROLAX និងម៉ាក CARTIER កាំភ្លើងខ្លីចំនួន ០២ដើម ។
បច្ចុប្បន្នវត្ថុតាង និងជនសង្ស័យខាងលើ ត្រូវបានកម្លាំងមន្ទីរប្រឆាំងគ្រឿងញៀន បញ្ជូនទៅរាជធានីភ្នំពេញ ដើម្បីបន្ដនីតិវិធីតាមផ្លូវច្បាប់ ៕
ប្រភព៖ ស្នងការដ្ឋាននគរបាលខេត្តព្រះសីហនុ
