ព្រះសីហនុ៖ កាលពីថ្ងៃទី១៣ ខែមិថុនា ឆ្នាំ២០២៤ វេលាម៉ោង១២និង០០នាទីថ្ងៃត្រង់ អធិការដ្ឋាននគរបាលក្រុងព្រះសីហនុ បានទទួលព័ត៌មានថា៖ មានករណីមនុស្សប្រុស ០១នាក់ធ្លាក់ពីអាគារ មានរបួស ត្រូវបានរថយន្តមន្ទីរពេទ្យថុងជិ ដឹកយកមកសង្គ្រោះ នៅមន្ទីរថុងជិ ស្ថិតនៅក្រុម១២ ភូមិ០៤ សង្កាត់លេខ៤ ក្រុង-ខេត្តព្រះសីហនុ ពេលមកដល់មន្ទីរពេទ្យក្រុមគ្រូពេទ្យបានអោយជនរងគ្រោះសំរាកនៅបន្ទប់លេខ#610 ជាន់ទី6 តែម្នាក់ឯង ហើយសមត្ថកិច្ចបានដាក់កំលាំងសមត្ថកិច្ចអង្គុយយាមនៅខាងក្រៅមាត់ទ្វារបន្ទប់ ដើម្បីរង់ចាំសាកសួរជនរងគ្រោះ ក្នុងអំឡុងពេលនៅមន្ទីរ ជនរងគ្រោះមិនយល់ព្រមអោយក្រុមគ្រូពេទ្យ ព្យាបាលលាងរបួសទេ។
លុះដល់ថ្ងៃដដែល វេលាម៉ោងប្រហែល១៩និង៥០នាទីយប់មានជនជាតិ ចិន០១នាក់ ឈ្មោះ Chen Xiao Qiang ភេទ ប្រុស ប្រាប់ថាមិត្តភក្តិ ជនរងគ្រោះ មកដល់បន្ទប់សំរាករបស់ជនរងគ្រោះ ហើយពេលនោះមានគ្រូពេទ្យចូលទៅលាងរបួស ប៉ុន្តែជនរងគ្រោះមិនព្រមអោយលាងរបួសទេ និងសូម្បីតែឈ្មោះ Chen Xiao Qiang បាននិយាយលួងលោមយ៉ាងណា ក៏មិនព្រមស្តាប់ ទើបឈ្មោះ Chen Xiao Qiang បានដើរចេញមកក្រៅអង្គុយលេងជាមួយសមត្ថកិច្ចវិ។ បន្តិចក្រោយមកសមត្ថកិច្ចដែលយាមកាមនៅទីនោះបានចូលទៅក្នុងបន្ទប់មើលជនរងគ្រោះស្រាប់តែមិនឃើញនៅលើគ្រែ និងឃើញបង្អួចបើកចំហរចោល រួចអឺតមើលទៅក្រោមឃើញជនរងគ្រោះនៅដេកលើដីមានស្មៅ ខាងក្រោម ទើបនាំគ្នាផ្អើលឆោលឡោតែម្តង។
ជនរងគ្រោះឈ្មោះ KE YITAO ភេទប្រុស សញ្ជាតិចិន មុនរបរ បុគ្គលិកជំនាញកំព្យូទ័រ ។ ឆ្លងតាមការពិនិត្យកោសល្យពីការិយាល័យនគរបាលបច្ចេកទេសវិទ្យាសាស្ត្រ បានសន្និដ្ឋានថាជនរងគ្រោះស្លាប់ដោយសារ “លោតពីលើទីខ្ពស់បណ្ដាលអោយបែកសរីរាង្គខាងក្នុងធ្ងន់ធ្ងរ ស្លាប់…”។ បច្ចុប្បន្នសពត្រូវបានរក្សាទុកបណ្ដោះអាសន្ននៅសាលតម្កល់សព នៃមន្ទីពេទ្យបង្អែកខេត្តព្រះសីហនុ ៕
ប្រភព៖ ឡេង ប៊ុននី LENG BUNNY
