ភ្នំពេញ៖ ដោយមានការអនុញ្ញាតពី ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នារសៀលថ្ងៃទី០៧ ខែមិថុនា ឆ្នាំ២០២៤ លោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានធ្វើសន្និសីទសារព័ត៌មាន បង្ហាញមុខសញ្ញាជនសង្ស័យសរុប២៤នាក់ ដែលបានប្រព្រឹត្តបទល្មើសរួមមាន៖
១.ករណីជួញដូរ និងប្រើប្រាស់គ្រឿងញៀន ដោយខុសច្បាប់ ឃាត់ជនសង្ស័យ១០នាក់ បង្ក្រាបដោយកម្លាំងអធិការដ្ឋាននគរបាលខណ្ឌសែនសុខ និងដកហូតវត្ថុតាងគ្រឿងញៀនមេតំហ្វេតាមីនទឹកកកចំនួនជិត៣គីឡូក្រាម និងគ្រឿងញៀនមេតំហ្វេតាមីនWY១៧៤គ្រាប់។
២.ករណីបង្ក្រាបក្មេងទំនើង១០នាក់ ក្រុមមាន់ទឹកMT និងក្រុមកាកាប BBK ពីបទហិង្សាដោយចេតនាមានស្ថានទម្ងន់ទោសនិងធ្វើឲ្យខូចខាតដោយចេតនាមានស្ថានទម្ងន់ទោស ប្រព្រឹត្តនៅសង្កាត់បឹងកេងកង៣ ខណ្ឌបឹងកេង និងសង្កាត់ទឹកថ្លា ខណ្ឌសែនសុខ សង្កាត់កាកាប២ ខណ្ឌពោធិ៍សែនជ័យ បង្ក្រាបដោយកម្លាំងព្រហ្មទណ្ឌកម្រិតស្រាល និងកម្លាំងអធិការដ្ឋាននគរបាលខណ្ឌបឹងកេងកង។
៣.ករណីកាន់កាប់អាវុធដោយគ្មានការអនុញ្ញាត (កាំបិតកែច្នៃ ) ឃាត់ខ្លួនក្មេងទំនើង០៣នាក់ បង្ក្រាបដោយកម្លាំងអធិការដ្ឋាននគរបាលខណ្ឌមានជ័យ។
៤.ករណីជួញដូរគ្រឿងញៀន ដោយខុសច្បាប់ និងហិង្សាដោយចេតនាមានស្ថានទម្ងន់ទោស ឃាត់ខ្លួនជនសង្ស័យ០១នាក់ និងវត្ថុតាងគ្រឿងញៀន០៦កញ្ចប់តូច បង្ក្រាបដោយកម្លាំងអធិការដ្ឋាននគរបាលខណ្ឌប្ញស្សីកែវ។
បច្ចុប្បន្នជនសង្ស័យខាងលើ សមត្ថកិច្ចបានកសាងសំណុំរឿងចាប់បញ្ជូនទៅតុលាការចាត់ការតាមផ្លូវច្បាប់៕
ប្រភព៖ ស្នងការដ្ឋាននគរបាលរាជធានីភ្នំពេញ