ភ្នំពេញ៖ «អ្នកអាចភ្លេចអេដស៍ តែអេដស៍មិនភ្លេចអ្នក» មិនមែនជាសារអប់រំហួសសម័យឡើយ ព្រោះថាយើងនៅតែមានអ្នកឆ្លង និងនៅតែមានស្លាប់ដោយសារជំងឺនេះនៅឡើយ បើទោះបីជាមានតិចតួចក៏ដោយចុះ។
នេះជាប្រសាសន៍លើកឡើងរបស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាពិធីប្រកាសសមាសភាពគណៈកម្មាធិការ និងលេខាធិការដ្ឋានប្រយុទ្ធនឹងជំងឺអេដស៍/កាមរោគ ក្រសួងមហាផ្ទៃ និងពិធីផ្សព្វផ្សាយ គោលនយោបាយជាតិបញ្ចប់អេដស៍និងចីរភាពកម្មវិធីអេដស៍ ឆ្នាំ២០២៣-២០២៨ នៅទីស្តីការក្រសួង កាលពីរសៀលថ្ងៃទី២៣ ខែឧសភា ឆ្នាំ២០២៤។
ប្រមុខក្រសួងមហាផ្ទៃបានបញ្ជាក់ថា ពាក្យមួយឃ្លាដែលគេនិយាយជាទូទៅថា អ្នកអាចភ្លេចអេដស៍បាន តែអេដស៍មិនភ្លេចអ្នកទេ គឺជាប្រយោគអប់រំបែបប្រាកដនិយម និង ជាសារដាស់សតិជន គ្រប់រូបកុំឱ្យភ្លេចខ្លួនឱ្យសោះ ចំពោះមេរោគអេដស៍ ជាពិសេសដែលភាគ ច្រើនវាកើតចេញពីការសប្បាយភ្លេចខ្លួន និងការធ្វេសប្រហែសរបស់អ្នកប្រព្រឹត្តតែមួយភ្លែត។
នាឱកាសនេះ ឯកឧត្តមអភិសន្តិបណ្ឌិត ស សុខា បានស្ញើចសរសើរជាពិសេស នូវផែនការបន្ស៊ីសកម្មភាពមនុស្សធម៌ ដោយផ្តោតទៅលើក្រុមជនងាយរងគ្រោះ និងប្រជា ជនគន្លឹះ ដែលមានភាពត្រួតស៊ីគ្នានៃបញ្ហា ជាឧទាហរណ៍ ស្ត្រីវ័យចំណាស់ម្នាក់ជាមនុស្ស មានផ្ទុកមេរោគអេដស៍ មានពិការភាព និងរស់នៅគ្មានទីពឹង ។ល។ ដែលក្រុមបុគ្គលទាំងនោះ មានការខ្វះខាតច្រើន។
ឯកឧត្តមបានបន្តថា នៅចន្លោះឆ្នាំ១៩៩១ ដល់ឆ្នាំ២០០០ ការឆ្លងរាលដាល នៃមេរោគអេដស៍នៅ កម្ពុជាបានកើនឡើងយ៉ាងឆាប់រហ័ស និងឈានដល់ចំណុចខ្ពស់ បំផុតនៅឆ្នាំ១៩៩៨។ ក្នុងស្ថានភាពនៃការរីករាលដាលមេរោគអេដស៍នេះ គ្រប់ស្ថាប័នរាជ រដ្ឋាភិបាល ដៃគូអភិវឌ្ឍន៍រួមមាន ម្ចាស់ជំនួយ អង្គការសហប្រជាជាតិ អង្គការសង្គមស៊ីវិល បានសហការខិតខំប្រឹងប្រែងយ៉ាងស្អិតល្មួត ក្នុងការទប់ស្កាត់ការរាលដាលនៃមេរោគ អេដស៍នេះ។
សូមបញ្ជាក់ថា សម្រាប់ក្រសួងមហាផ្ទៃ នៅក្នុងចន្លោះឆ្នាំ២០១៩ ដើម្បីចូលរួម ចំណែកក្នុងការទប់ស្កាត់ការរីករាលដាល នៃមេរោគអដស៍ និងបញ្ចប់មេរោគនេះ សម្តេចក្រឡាហោម ស ខេង អតីតឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេច បង្កើតគណៈកម្មាធិការប្រយុទ្ធនឹងជំងឺអេដស៍/កាមរោគ សម្រាប់ក្រសួងមហាផ្ទៃឡើង ព្រមទាំងមានអាណត្តិជាក់លាក់ ហើយបច្ចុប្បន្ន លោកជំទាវ អុង សុភាវី រដ្ឋលេខាធិការក្រសួងមហាផ្ទៃ ទទួលភារកិច្ចជា ប្រធានគណៈកម្មាធិការប្រយុទ្ធនឹងជំងឺអេដស៍/កាមរោគ ក្រសួងមហាផ្ទៃ៕
ប្រភព៖ AKP
