ភ្នំពេញ៖ ប្រមុខរាជរដ្ឋាភិបាលបានប្រកាសដាក់ឱ្យអនុវត្តជាផ្លូវការផែនទីបង្ហាញផ្លូវឆ្ពោះទៅការគ្របដណ្ដប់សុខភាពជាសកលនៅកម្ពុជា ឆ្នាំ២០២៤-២០៣៥ នៅព្រឹកថ្ងៃទី២៣ ខែឧសភា ឆ្នាំ២០២៤ ដើម្បីជាការយកចិត្តទុកដាក់ ក្នុងការកសាងមូលធនមនុស្ស។
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានថ្លែងថា រាជរដ្ឋាភិបាលអាណត្តិមុន និងរាជរដ្ឋាភិបាលអាណត្តិទី៧ នៅតែផ្ដល់តម្លៃខ្ពស់ជំរុញវិស័យសុខាភិបាលផ្ដល់សេវាឱ្យមាន គុណភាព។
សម្ដេចធិបតី ហ៊ុន ម៉ាណែត បានថ្លែងថា«ខ្ញុំសូមបញ្ជាក់សាជាថ្មីម្ដងទៀត មូលធនមនុស្សគឺជាគន្លឹអាទិភាព សម្រាប់ការកសាងប្រទេសរបស់យើង ព្រោះមនុស្សគឺកំណត់ប្រទេស មនុស្សគឺដង្ហើមអ្នកអនុវត្តប្រតិបត្តិក្នុងការជំរុញសេដ្ឋកិច្ច ថែទាំវប្បធម៌ ថែទាំប្រពៃណីនិងអត្តសញ្ញាណជាតិ ចឹងដើម្បីកសាងមូលធនមនុស្ស សុខភាព និងចំណេះដឹងគឺជាកិច្ចការសំខាន់»។ ទន្ទឹមនេះ សម្ដេចធិបតីនាយករដ្ឋមន្ត្រី បានឱ្យដឹងបន្ថែមថា គោលដៅនៅក្នុងការកសាងសុខភាព ធ្វើឱ្យប្រជាពលរដ្ឋអាចទទួលបានសេវាថែទាំសុខភាពពីសេវាសុខាភិបាល ដែលមានគុណភាព និងតម្លៃសមរម្យ៕
ប្រភព៖ AKP
