កំពង់ធំ៖ ឯកឧត្តមបណ្ឌិត សួង ណយ អនុប្រធានគណៈកម្មាធិការជាតិជំរុញចលនា ភូមិ១ផលិតផល១ នៃទីស្ដីការគណៈរដ្ឋមន្ដ្រី បានអញ្ជើញបើកវេទិកាផ្គូផ្គងរវាងអ្នកផលិត អ្នកទិញនិងការតាំងបង្ហាញផលិតផលក្នុងស្រុកក្រោមគម្រោងការទទួលបានទីផ្សារ សម្រាប់ អ្នកផលិតក្នុងស្រុក និងសហគ្រាសធុនមីក្រូតូចនិងមធ្យម (ភូមិ១ផលិតផល១) នៅ ខេត្តកំពង់ធំកាលពីថ្ងៃពុធ ៨កើត ខែពិសាខ ឆ្នាំរោងឆស័ក ព.ស២៥៦៧ ត្រូវនឹងថ្ងៃទី១៥ ខែឧសភា ឆ្នាំ២០២៤។
ពិធីនេះ មានការអញ្ជើញចូលរួមពីឯកឧត្តម ងួន រតនៈ អភិបាលខេត្តនិងជាប្រធាន គណៈកម្មការភូមិ១ផលិតផល១ខេត្តកំពង់ធំ លោក ជា វ៉ាន់ចាន់អភិបាលរងខេត្តកំពង់ធំ និងម្ចាស់អាជីវកម្មលក់ទិញជាច្រើននាក់ទៀត។
លោក ជា វ៉ាន់ចាន់ បានបញ្ជាក់ថា មន្ទីរទេសចរណ៍ អញ្ជើញម្ចាស់អាជីវកម្ម ឬអ្នកទទួលបន្ទុកទិញ ពាក់ព័ន្ធវិស័យទេសចរណ៍, មន្ទីរពាណិជ្ជកម្មអញ្ជើញម្ចាស់អាជីវកម្ម ឬអ្នកទទួលបន្ទុកទិញ,មន្ទីរឧស្សាហកម្ម អញ្ជើញម្ចាស់អាជីវកម្មឬអ្នកទទួលបន្ទុក ទិញវត្ថុធាតុដើម ដើម្បីយកទៅកែច្នៃ វេចខ្ចប់ លក់ក្នុងស្រុក និងនាំចេញ។ អញ្ជើញអ្នកផលិត កែច្នៃ វេចខ្ចប់ក្នុងខេត្ត ដើម្បីយក ផលិតផលមកបង្ហាញ និងលក់ ហើយជួយទិញផលិត ផលវត្ថុធាតុដើមយកទៅកែច្នៃបន្ថែម។ មន្ទីរកសិកម្ម,មន្ទីរកិច្ចការនារី,មន្ទីរអភិវឌ្ឍន៍ជន បទនិងមន្ទីរបរិស្ថាន អញ្ជើញម្ចាស់អាជីវកម្ម សហគមន៍ អ្នកផលិតក្នុងខេត្ត ដើម្បីយកផលិតផលមកបង្ហាញ និងលក់។
ឯកឧត្តម ងួន រតនៈ អភិបាលខេត្តកំពង់ធំ និងជាប្រធានគណៈកម្មការភូមិ១ផលិតផល១ ខេត្តកំពង់ធំ បានសម្ដែងនៅការភ្ញាក់ផ្អើលដែលឃើញផលិតផលខេត្តកំពង់ធំមានគុណភាព សោភណភាព សម្រាប់លើកកិត្តិនាមក្នុងខេត្តកំពង់ធំ។
ឯកឧត្តមអភិបាលខេត្ត បានផ្ដាំផ្ញើដល់សិប្បករ ផលិតករ កសិករ បន្តខិតខំការផលិត ការកែច្នៃឱ្យកាន់តែមានគុណភាពបន្តទៀត ព្រមទាំងជំរុញអាជ្ញាធរក្នុងខេត្តទាំងមូល ចូលរួមប្រើប្រាស់ផលិតផលខ្មែរ ជាពិសេសផលិតផលក្នុងខេត្តកំពង់ធំ។ ក្នុងនាមអាជ្ញាធរខេត្ត ឯកឧត្តមបានជំរុញឱ្យរដ្ឋបាលខេត្តកំពង់ធំ ជួយទិញផលិតផលក្នុងស្រុក ដើម្បីរៀបចំជា កាដូសម្រាប់ទទួលភ្ញៀវមកទស្សនកិច្ចក្នុងខេត្តកំពង់ធំ។
ជាមួយគ្នានោះ ឯកឧត្តមបណ្ឌិត សួង ណយ បានបង្ហាញពីគោលបំណងនៃវេទិកា ផ្គូផ្គងអ្នកផលិតខ្មែរ ជាមួយអ្នកទិញ យោងតាមការចង្អុលបង្ហាញរបស់សម្តេចតេជោ ហ៊ុន សែន គឺជាស្ថាបនិកភូមិ១ផលិតផល១ សម្តេចបានសុំឱ្យ ធ្វើការរួមគ្នា(ចង្កឹះមួយបាច់) ដើម្បីឈានទៅការនាំចេញទៅក្រៅប្រទេស យោងតាមយុទ្ធសាស្ត្របញ្ចកោណរបស់ រាជរដ្ឋាភិបាលតាមសំណូមពររបស់សមាជិកភូមិ១ផលិតផល១និងអ្នកផលិត ផលិតផលខ្មែរ សុំឱ្យជួយរកទីផ្សារលក់ផលិតផល ទាំងក្នុងស្រុក និងក្រៅប្រទេសដើម្បីដោះស្រាយ បញ្ហាប្រឈមទីផ្សារផលិតផលខ្មែរ និងអ្នកទិញក្នុងស្រុក ក្នុងការនាំចេញនៅនឹងកន្លែង ឈានទៅដល់ការនាំចេញទៅក្រៅប្រទេស ដើម្បីផ្សារភ្ជាប់រវាងអ្នកផលិត និងអ្នកទិញជា បណ្តាញប្រទាក់ក្រឡាគ្នារវាងអ្នកផលិតយល់ដឹងអំពីតម្រូវការទីផ្សារ ការវេចខ្ចប់ សោភណ្ឌភាព គុណភាព បរិមាណ ស្តង់ដា អនាម័យ តម្លៃ ផលិតតាមតម្រូវ ការរបស់អ្នកទិញ។
ឯកឧត្តមបណ្ឌិត សួង ណយ អនុប្រធានគណៈកម្មាធិការជាតិជំរុញចលនាភូមិ១ ផលិតផល១នៃទីស្ដីការគណៈរដ្ឋមន្ដ្រី បានលើកឡើងថាអ្នកផលិតក្នុងស្រុក និងសមាគម ធុរកិច្ច ដើម្បីបង្កើនគុណភាព និងទីផ្សារនៃផលិតផលក្នុងស្រុក យើងធ្វើការលើការកសាង បណ្តាញទីផ្សារ ដើម្បីឱ្យប្រទាក់ក្រឡាគ្នារវាងអ្នកផលិត និងអ្នកទិញយកទៅប្រើប្រាស់ កែច្នៃវេចខ្ចប់ ផលិតផលក្នុងស្រុកដើម្បីលក់បន្ត និងឈានទៅការនាំចេញ។
ឯកឧត្តមបណ្ឌិត បានសំណើសុំឱ្យភោជនីយដ្ឋាន រមណីយដ្ឋាន រង្គសាល ហាងបាយ ផ្ទះសំណាក់ សូមយកផលិតផលខ្មែរដាក់លើតុ ក្នុងបន្ទប់ លក់ជូនភ្ញៀវ តុការធ្វើជាម្ហូប។ ថ្នាក់ដឹកនាំ និងបងប្អូន សូមយកផលិតផលខ្មែរជាកាដូជូនញាតិមិត្ត៕
ប្រភព៖ AKP
