ភ្នំពេញ៖ ត្មាតភ្លើង គឺជាឈ្មោះបក្សីមួយប្រភេទ មានដងខ្លួនពណ៌ខ្មៅ ក្បាល និងជើងក្រហម ភ្លៅមានរោមពណ៌ស និងមានឆ្នូតស តាមបណ្ដោយកណ្ដាលស្លាប។ ចំពោះត្មាតភ្លើង មានកម្ពស់ចាប់ពី ៧៦សង់ទីម៉ែត្រទៅ៨៦សង់ទីម៉ែត្រ។ ត្មាតភ្លើងជាប្រភេទជិតផុតពូជបំផុតដែលមានវត្តមាននៅក្នុងប្រទេសកម្ពុជា។ សត្វត្មាតភ្លើងកំពុងរងការគំរាមកំហែងដោយសារការបាត់បង់ទីជម្រក ខ្វះចំណីអាហារ និងការបំពុលជាដើម។ ជារៀងរាលឆ្នាំត្មាតភ្លើងតែងតែបង្ហាញខ្លួននៅភាគខាងជើង និងខាងកើតនៃប្រទេសកម្ពុជា។ សម្រាប់រដូវបន្តពូជវិញ គឺចាប់ខែតុលា ដល់ខែមេសា។
អង្គការជីវិតធម្មជាតិនៅកម្ពុជា (NatureLife Cambodia) បានឱ្យដឹងនៅថ្ងៃទី១៣ ខែ ឧសភា ឆ្នាំ ២០២៤ ថា ដែនជម្រកសត្វព្រៃលំផាត់គឺទីតាំងដ៏សំខាន់មួយក្នុងការគាំទ្រការរស់នៅរបស់សត្វត្មាតភ្លើង។ ក្រុមការងាររបស់អង្គការជីវិតធម្មជាតិនៅកម្ពុជា សហគមន៍ និងឧទ្យានុរក្សតែងតែធ្វើការអង្កេតតាមដានពីវត្តមានរបស់វាជាប្រចាំ ដោយដាក់កាម៉េរាស្វ័យប្រវត្តិតាមត្រពាំង និងអង្កេតពេលវាចុះស៊ីសាកសពសត្វគោក្របី។
អង្គការនេះបានឱ្យដឹងដែរថា ជាក់ស្តែងនៅថ្ងៃទី១០ ខែឧសភា ឆ្នាំ២០២៤ គេបានកត់ត្រាវត្តមានរបស់ត្មាតភ្លើងចំនួន២ក្បាល កំពុងស៊ីសាកសពសត្វគោ នៅភូមិស្រែជ្រៃ និងសត្វមួយក្បាលបានចុះផឹកទឹកនៅត្រពាំងដែលបានស្តារ។ ជាមួយគ្នានេះដើម្បីដឹងឱ្យកាន់តែច្បាស់ពីស្ថានភាពប្រជាសាសន៍របស់សត្វត្មាតភ្លើងនៅតំបន់ទេសភាពនេះ អង្គការជីវិតធម្មជាតិនៅកម្ពុជានឹងចាប់រៀបចំអាហារដា្ឋនត្មាតចល័តចំនួន១២ខែ ដោយគឺចាប់ខែមិថុនានេះតទៅ។ ការចុះមកស៊ីសាកសពសត្វរបស់សត្វត្មាតដែលផ្តល់ឱ្យក្នុងអាហារដ្ឋានត្មាតអាចឱ្យយើងកំណត់ចំនួនអប្បបរមា និងទីតាំងដែលសត្វភ្លើងកំពុងមានវត្តមាន។
គួរបញ្ជាក់ថានៅក្នុងប្រទេសកម្ពុជា មានសត្វត្មាតចំនួន៣ប្រភេទ គឺត្មាតភ្លើង ត្មាតត្នោត និងត្មាតផេះ។ ត្មាតមានចំណុចសម្គាល់ និងមានភាពខុសប្លែកគ្នា ទៅតាមប្រភេទនីមួយៗរបស់វាផងដែរ៕
ប្រភព៖ AKP
