ព្រះសីហនុ៖ តាមការឱ្យដឹងស្ដីពីការចុះស្រង់ស្ថិតិរបស់ការិយាល័យគ្រឿងយន្តកសិកម្ម និង ការិយាល័យក្សេតសាស្ត្រ និងផលិតភាពកសិកម្ម នៃមន្ទីរកសិកម្មរុក្ខាប្រមាញ់ និងនេសាទ ខេត្តព្រះសីហនុ ក្នុងការចុះស្រង់ទិន្នន័យ នៃការបង្កបង្កើនផលដំណាំស្រូវរដូវវស្សាគិត ត្រឹមថ្ងៃសៅរ៍ ៤កើត ខែពិសាខ ឆ្នាំរោង ឆស័ក ព.ស ២៥៦៧ ត្រូវនឹងថ្ងៃទី១១ ខែឧសភា ឆ្នាំ២០២៤។
តាមការស្រង់ទិន្នន័យ នៃការចុះអង្កេតការបង្កបង្កើនផលដំណាំស្រូវរដូវវស្សារបស់ ប្រជាកសិករស្រុកព្រៃនប់ ដើមឆ្នាំ២០២៤ របស់មន្ទីរកសិកម្មរុក្ខាប្រមាញ់ និងនេសាទ ខេត្តព្រះសីហនុ ប្រជាកសិករនៅស្រុកព្រៃនប់ កំពុងមមាញឹកក្នុងការភ្ជួររាស់អនុវត្តបានចំនួន ៥ ៤០៥ហិកតា ស្មើនឹង ៤០,៦៤ភាគរយ និងការងារព្រោះស្រូវអនុវត្តន៍បានចំនួន ៤ ២២៧ហិកតា ស្មើនឹង ៣១,៧៨ភាគរយ នៃផែនការឆ្នាំសរុបចំនួន ១១ ៦១៨ហិកតា។ ដោយ ឡែកស្រុកកំពង់សិលា ការងារភ្ជួររាស់ សាបព្រោះមិនទាន់មានសកម្មភាព នៅឡើយនោះទេ ដោយសារឆ្នាំនេះរដូវប្រាំងបានអូសបន្លាយធ្វើឱ្យការងារភ្ជួររាស់ សាបព្រោះស្រូវរដូវ វស្សាឆ្នាំនេះមានការយឺតជាងបណ្តាឆ្នាំកន្លងមក បើទោះបីភ្លៀងបានចាប់ផ្តើមធ្លាក់ជាបណ្តើៗ ក៏ប៉ុន្តមិនទាន់គ្រប់គ្រាន់ក្នុងការងារភ្ជួររាស់ សាបព្រោះ។ ម្យ៉ាងទៀតការងារភ្ជួររស់ នាពេលបច្ចប្បន្ន ប្រើប្រាស់ដោយគ្រឿងយន្តកសិកម្ម មានដូចជា គោយន្ត ឬត្រាក់ទ័រ ដោយឡែកការភ្ជួររាស់តាមបែបបុរាណដោយគោ ក្របី សឹងតែគ្នាននោះទេ ដោយសារតែ ប្រជាកសិករខ្វះកម្លាំងពលកម្ម ដោយសារកូន ចៅរបស់ពួកគាត់ចេញទៅធ្វើការនៅតាម រោងចក្រ សហគ្រាស។
ខេត្តព្រះសីហនុ មានក្រុងពីរ និងស្រុកចំនួន៣ ហើយស្រុកចំនួនពីរ មានផ្ទៃដីបង្ក បង្កើនផលស្រូវរដូវវស្សា ក្នុងនោះមានដូចជា ស្រុកព្រៃនប់ និងស្រុកកំពង់សិលា។ ក្រុង ស្រុកចំនួន៣ ផ្សេងទៀតមិនមានផ្ទៃដីបង្កបង្កើនផលស្រូវនោះទេ។ ទន្ទឹមនឹងការងារបង្កបង្កើន ផលស្រូវរដូវវស្សា ខេត្តព្រះសីហនុ ក៏មិនមានផ្ទៃដីបង្កបង្កើនផលស្រូវរដូវប្រាំងនោះដែរ ដោយសារកង្វះប្រភពទឹកនៅរដូវប្រាំង។
សូមបញ្ជាក់ថា ខេត្តព្រះសីហនុ មានផ្ទៃដីបង្កបង្កើនផលស្រូវសរុបមានចំនួន ១៣ ៣៧៨ហិកតា ក្នុងនោះស្រុកព្រៃនប់ មានផ្ទៃដីបង្កបង្កើនផលស្រូវ ១១ ៦១៨ហិកតា និង ស្រុកកំពង់សិលាមានផ្ទៃដីបង្កបង្កើនផលស្រូវចំនួន ១ ៧៦០ហិកតា៕
ប្រភព៖ AKP
