បន្ទាយមានជ័យ៖ លោក សុក ចាន់ថា ប្រធានមន្ទីរសាធារណការ និងដឹកជញ្ជូនខេត្តបន្ទាយមានជ័យ បានឱ្យដឹងនាព្រឹកថ្ងៃទី១៣ ខែឧសភា ឆ្នាំ២០២៤នេះថា ក្រុមការងារជំនាញផ្លូវថ្នល់របស់មន្ទីរសាធារណការខេត្ត បាននិងកំពុងបន្តជំរុញការងារថែទាំជាប្រចាំនៅលើកំណាត់ផ្លូវជាតិ ផ្លូវខេត្តដែលរងការខូចខាតឱ្យបានល្អប្រសើរឡើងវិញដើម្បីធានាដល់ការធ្វើចរាចរណ៍របស់ប្រជាពលរដ្ឋ និងការដឹកជញ្ជូនទំនិញបានស្រួលនោះ។
លោកប្រធានមន្ទីរបានឱ្យដឹងបន្ថែមទៀតថា សកម្មភាពជាក់ស្តែង កាលពីថ្ងៃទី១២ ខែឧសភាឆ្នាំ២០២៤នេះ ក្រុមការងារបាន និងកំពុងធ្វើការជួសជុលលើកំណាត់ផ្លូវជាតិលេខ៥៦D ចាប់ពីគីឡូម៉ែត្រ០+៨០០ ដល់គីឡូម៉ែត្រ ១+៣០០ ដោយស្រោចកៅស៊ូបាចថ្មលើថ្នល់ប្រេះមួយជាន់ស្ថិតនៅស្រុកអូរជ្រៅ បន្តការងារជួសជុលផ្លូវជាតិលេខ៥៨ ចាប់ពីគីឡូម៉ែត្រ៨៨+៣០០ ដល់គីឡូម៉ែត្រ ៩០+០០០ដោយភ្ជួរតួថ្នល់ប្រេះស្រុត រួចកៀរកិនបង្ហាប់ស្ថិតនៅស្រុកថ្មពួក បន្តការងារជួសជុលផ្លូវខេត្តលេខ២៥៨B ចាប់ពីគីឡូម៉ែត្រ១៨+០០០ ដល់គីឡូម៉ែត្រ ២០+០០០ ដោយថែមដីល្បាយថ្ម រួចកៀរកិនបង្ហាប់ស្ថិតនៅស្រុកស្វាយចេក បន្តការងារជួសជុលផ្លូវជាតិលេខ៥ ចាប់ពីគីឡូម៉ែត្រ៣៤០ +០០០ ដល់គីឡូម៉ែត្រ ៣៤២+០០០ ដោយស្រោចទឹកដើមរុក្ខជាតិ និងជួសជុលគម្របរឺហ្គា និងបន្តការងារជួសជុលផ្លូវជាតិលេខ៦ ចាប់ពីគីឡូម៉ែត្រ៤១១+០០០ ដល់គីឡូម៉ែត្រ ៤១៥+០០០ ដោយសម្អាតស្ពាន និងលាបថ្នាំថ្មីស្ថិតនៅក្រុងសិរីសោភ័ណ។
ទន្ទឹមនឹងនេះ លោកប្រធានបានគូសបញ្ជាក់ថា ក្រៅពីការចុះថែទាំលើកំណាត់ផ្លូវជាតិ ផ្លូវខេត្ត នេះ ក្រុមការងារក៏បានធ្វើការជួសជុលលើផ្លូវមួយចំនួនផ្សេងទៀត ដែលរងការខូចក្លាយជាជង្ហុកសម្បុកមាន់ ក៏ត្រូវបានចុះអនុវត្តធ្វើជាប្រចាំដើម្បីឱ្យមានភាពល្អប្រសើរ ធ្វើយ៉ាងណាជួយសម្រួលដល់ការធ្វើដំណើររបស់បងប្អូនប្រជាពលរដ្ឋ ឱ្យកាន់តែមានភាពងាយស្រួល និងការដឹកជញ្ជូនទំនិញឆ្លងកាត់ បានចំណេញពេលវេលា ចំណេញថវិកា ព្រមទាំងបង្កើននូវសោភ័ណភាពតាមដងផ្លូវផងដែរ និងបានអំពាវនាវដល់អ្នកធ្វើដំណើរតាមដងផ្លូវគ្រប់មធ្យោបាយទាំងអស់ ចូលរួមគោរពច្បាប់ចរាចរណ៍ផ្លូវគោកឱ្យបានខ្ជាប់ខ្ជួនទាំងអស់គ្នា ដើម្បីជៀសវាងគ្រោះថ្នាក់ដល់អាយុជីវិតនោះ៕
ប្រភព៖ AKP
