ភ្នំពេញ៖ ឆ្នាំ២០២៤នេះ ជាឆ្នាំដែលក្រសួងអប់រំ យុវជន និងកីឡា បានរៀបចំការប្រឡងជ្រើសរើសសិស្សពូកែទូទាំងប្រទេស ជាលើកទី២៨ និងជាលើកទី៧ ដែលរាជធានីភ្នំពេញបានធ្វើជាម្ចាស់ផ្ទះរៀបចំការប្រឡង។ នេះបើតាមការឱ្យដឹងពីឯកឧត្តមបណ្ឌិត ហួ ឈុនគ្រី អគ្គាធិការរងទទួលបន្ទុកជាប្រធាននាយកដ្ឋានកិច្ចការប្រឡង ស្តីពីការរៀបចំការប្រឡងជ្រើសរើសសិស្សពូកែទូទាំងប្រទេស នាសម័យប្រឡងថ្ងៃទី១៣ ខែឧសភា ឆ្នាំ២០២៤ នៅមណ្ឌលប្រឡងវិទ្យាល័យ ជា ស៊ីម សន្ធរម៉ុក រាជធានីភ្នំពេញ ដែលជាការប្រឡងដើម្បីជ្រើសរើសយកជ័យលាភីសិស្សពូកែថ្នាក់ទី៩ និងថ្នាក់ទី១២ លើមុខវិជ្ជាអក្សរសិល្ប៍ខ្មែរ គណិតវិទ្យា និងរូបវិទ្យា ដោយឆ្នាំនេះមានបេក្ខជនមកចូលរួមប្រឡងចំនួន២៤០នាក់/ស្រី១២៧នាក់។
ក្នុងឱកាសនោះ ឯកឧត្តមបណ្ឌិត ហួ ឈុនគ្រី បានមានប្រសាសន៍ថា ដើម្បីធានាបាននូវគោលការណ៍ច្បាប់ យុត្តិធម៌ តម្លាភាព និងលទ្ធផលដែលអាចទទួលយកបាននៃការប្រឡង ជាពិសេសការលើកកម្ពស់គុណភាពសិស្សពូកែ និងធានាតម្លៃពិតប្រាកដរបស់សិស្សពូកែ ក្រសួងអប់រំ យុវជន និងកីឡា បានកំណត់គោលការណ៍ និងលក្ខខណ្ឌសំខាន់ៗ ទាំងក្នុងដំណើរការសំណេរ ដំណើរការកំណែ ដំណើរការស្រង់បូកពិន្ទុជាដើម។
ទន្ទឹមនឹងនេះ ឯកឧត្តមបានគូសបញ្ជាក់ថា បេក្ខជនគ្រប់រូបដែលមានវត្តមាននាពេលនេះ សុទ្ធតែបានទទួលវិញ្ញាបនបត្រចូលរួមប្រឡង សិស្សពូកែថ្នាក់ជាតិម្នាក់ ១សន្លឹក ហើយចំពោះជ័យលាភីម្នាក់ៗ នឹងត្រូវទទួលបានការឧបត្ថម្ភពីរដ្ឋទៅតាមចំណាត់ថ្នាក់នូវថវិកា និងសម្ភាផ្សេងៗ រួមមាន៖ ប្រកាសទទួលស្គាល់សិស្សពូកែទូទាំងប្រទេស វិញ្ញាបនបត្រជ័យលាភីសិស្សពូកែ មេដាយមួយគ្រឿង (មាស ប្រាក់ និងសំរឹទ្ធ ពីលេខ១ ដល់លេខ៣) ប្រាក់រង្វាន់តាមចំណាត់ថ្នាក់ និងប្រាក់រង្វាន់ ឬវត្ថុផ្សេងៗបន្ថែមទៀតពីសប្បុរសជន។
សម្រាប់ការប្រឡងនេះដែរ ថ្នាក់ដឹកនាំក្រសួងអប់រំ យុវជន និងកីឡា បានសម្តែងការកោតសរសើរចំពោះថ្នាក់ដឹកនាំមន្ទីរអប់រំ យុវជន និង កីឡា រាជធានី ខេត្ត លោក លោកស្រីនាយក នាយិកា លោកគ្រូ អ្នកគ្រូ ដែលបានសម្រិតសម្រាំងសិស្សពូកែថ្នាក់រាជធានី ខេត្ត ដើម្បីឱ្យមកចូលរួមប្រឡងប្រជែងដណ្តើមជ័យលាភីសិស្សពូកែទូទាំងប្រទេសនាពេលនេះ និងបានផ្តាំផ្ញើដល់គ្រប់សមាសភាពគណៈមេប្រយោគឱ្យលើកកម្ពស់ស្មារតីទទួលខុសត្រូវ ដើម្បីសម្រេចការងារប្រឡងនេះប្រកបដោយលទ្ធផលវិជ្ជមាន ស្របតាមគោលការណ៍ច្បាប់ យុត្តិធម៌ តម្លាភាព លទ្ធផលទទួលយកបាន និងបានផ្តាំផ្ញើដល់ក្មួយៗសិស្សានុសិស្សជាបេក្ខជនទាំងអស់ ត្រូវគោរពបទប្បញ្ញត្តិនៃការប្រឡង ត្រូវខិតខំយកអស់សមត្ថភាពផ្ទាល់ខ្លួន ដើម្បីដណ្តើមជ័យលាភីប្រកបដោយកិត្តិយសជូនខ្លួនឯងផ្ទាល់ ក្រុមគ្រួសារ សាលារៀន រាជធានី និងខេត្តរៀងៗខ្លួន ដោយប្រកាន់ខ្ជាប់នូវសុទិដ្ឋិនិយមជានិច្ចចំពោះការប្រឡងនេះ៕
ប្រភព៖ AKP
