កំពង់ស្ពឺ៖ នៅថ្ងៃទី០៨ ខែឧសភា ឆ្នាំ២០២៤ វេលាម៉ោង ១៧:០០ នាទីមានករណីជនសង្ស័យម្នាក់បានធ្វេីសកម្មភាពគប់កញ្ចក់រថយន្ត នៅចំណុចតាមបណ្ដោយផ្លូវជាតិលេខ៤ ចន្លោះគីឡូម៉ែតលេខ៤៨ -៤៩ ស្ថិតក្នុងភូមិពាណិជ្ជកម្ម សង្កាត់រការធំ ក្រុងច្បារមន ខេត្តកំពង់ស្ពឺ ។
![May be an image of van and text](https://scontent.fpnh19-1.fna.fbcdn.net/v/t39.30808-6/440936121_776686214574531_1298855411151530815_n.jpg?_nc_cat=110&ccb=1-7&_nc_sid=5f2048&_nc_ohc=40_aPQx_lCkQ7kNvgGJNKh6&_nc_oc=Adilh_QftlNUdDTxnT7Lz5n_EPV0md9kGklDIC6cp2Cu1BhN6DRp4zzWm0sZYC_D0iY&_nc_ht=scontent.fpnh19-1.fna&oh=00_AfBw4YQzxR_CqLwz2XAZ7USdvTwC5KZ_omy4aGX3CcvoBA&oe=6642B469)
សមត្ថកិច្ចនគរបាលបានទទួលព័ត៌មាន(បណ្ដឹងផ្ទាល់តាមរយៈ hotline ) ពីជនរងគ្រោះឈ្មោះ អោម សុភក្ត្រ័ ភេទប្រុស អាយុ៣៨ ឆ្នាំ រស់នៅភូមិសំបួរ សង្កាត់ច្បារមន ក្រុងច្បារមន ខេត្តកំពង់ស្ពឺ មុខរបរបើករថយន្ត ប្រចាំរោងចក្រ បានរៀបរាប់ថា ខ្លួនបើករថយន្ត ម៉ាកស្ទាររីច ពណ៍ទឹកប្រាក់ ពាក់ផ្លាកលេខ កំពង់ស្ពឺ-2A-5226 ចេញពីរោងចក្រទៅទទួលភ្ញៀវនៅភ្នំពេញ លុះពេលជិះមកដល់ចំណុចកើតហេតុខាងលើ ក៏ស្រាប់តែមានជនសង្ស័យ បានយកដុំថ្មមកគប់កញ្ចក់រថយន្តរបស់ខ្លួន បណ្ដាលឲ្យបែកកញ្ចក់និងទ្វារពីខាងឆ្វេង ភ្លាមនោះខ្លួនក៏បានឈប់រថយន្ត រួចរាយការណ៍មកសមត្ថកិច្ច ឲ្យជួយអន្តរាគមន៍តែម្ដង ។
ក្រោយទទួលបានព័ត៍មាន កំលាំងជំនាញអធិការដ្ឋានក្រុងច្បារមន សហការជាមួយកម្លាំងប៉ុស្ដិ៍ចុះទៅដល់កន្លែងកើតហេតុស្រាវជ្រាវនិងបានធ្វើការឃាត់ខ្លួនជនសង្ស័យឈ្មោះ សួង ចាន់ចំរើន ភេទប្រុស អាយុ២៥ ឆ្នាំ រស់នៅភូមិបុស្សតានៃ ឃុំកាហែង ស្រុកសំរោងទង ខេត្តកំពង់ស្ពឺ ដែលមានវត្ថុតាងដុំថ្មជ្រុងមួយដុំ ក្រោយសមត្ថកិច្ចឃាត់និងការសាកសួរ ទេីបដឹងថាជនសង្ស័យខាងលេី ជាមនុស្សដែលបានធ្វេីសកម្មភាពហក់ធាក់ម៉ូតូអ្នកដំណេីរដែលជិះឆ្លងកាត់ផ្លូវជាតិលេខ៤ ។
ចំពោះករណីខាងលើ ជំនាញបានកសាងសំណុំរឿង និងបញ្ជូនជនសង្ស័យ និងវត្ថុតាង មកកាន់ស្នងការដ្ឋាននគរបាលខេត្តកំពង់ស្ពឺ ដេីម្បីចាត់ការតាមនិតិវិធីច្បាប់ ៕
ប្រភព៖ ស្នងការដ្ឋាននគរបាលខេត្តកំពង់ស្ពឺ