ភ្នំពេញ៖ ប្រព័ន្ធបញ្ជរតែមួយជាតិ នឹងក្លាយជាតួអង្គដ៏សំខាន់មួយនៃប្រព័ន្ធអេកូឡូស៊ីឌីជីថលសម្រាប់ធុរកិច្ច ដែលធ្វើឱ្យកិច្ចសម្រួលពាណិជ្ជកម្មរបស់យើង កាន់តែមានប្រសិទ្ធភាព និង មានលទ្ធភាព តភ្ជាប់ ទៅនឹងប្រព័ន្ធអេកូឡូស៊ីឌីជីថលសម្រាប់ធុរកិច្ច ផ្សេងទៀត ក្នុងតំបន់ និង លើសកលលោក។ នេះជាកាថ្លែងរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃកម្ពុជា ក្នុងឱកាសអញ្ជើញជាអធិបតីពិធី “ប្រកាសដាក់ឱ្យអនុវត្តជាផ្លូវការ ប្រព័ន្ធបញ្ជរតែមួយជាតិ” នាព្រឹកថ្ងៃអង្គារ ទី០៧ ខែឧសភា ឆ្នាំ២០២៤។
សម្ដេចធិបតីនាយករដ្ឋមន្ត្រី រំពឹងយ៉ាងមុតមាំថា ប្រព័ន្ធបញ្ជរតែមួយជាតិ នឹងក្លាយជាគំរូជោគជ័យមួយទៀតនៃកិច្ចប្រឹងប្រែងរួមគ្នារបស់ក្រសួង-ស្ថាប័ននៃរាជរដ្ឋាភិបាល ដែលបានជម្នះនូវការលំបាកទាំងឡាយ ក្នុងដំណើការនៃការសម្របសម្រួលស្ថាប័ន ។ ក្នុងន័យនេះ, ប្រព័ន្ធបញ្ជរតែមួយជាតិ អាចចាត់ទុកបានថា ជាជោគជ័យរួមគា្ន ឬជា សមិទ្ធផលរួមគ្នា របស់ក្រសួង-ស្ថាប័ននៃរាជរដ្ឋាភិបាល ក្នុងការអនុវត្តការងារ តាមអភិក្រម “ជវភាពនៃប្រព័ន្ធតួអង្គតែមួយ” (Dynamics of Stakeholder System) ការធ្វើការួមគ្នាប្រកបដោយជោគជ័យនេះ ក៏បានហុចផលដល់វិស័យឯកជនដែលនឹងទទួលបានប្រយោជន៍ជាច្រើន ពីប្រព័ន្ធបញ្ហារតែមួយជាតិ ជាអាទិ៍ ៖ ចំណេញពេល និងការកាត់បន្ថយចំណាយ ដោយមិនចាំបាច់ត្រូវរត់ការពីក្រសួង-ស្ថាប័នមួយ ទៅក្រសួង-ស្ថាប័នមួយទៀតនោះទេ។
ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ បានលើកឡើងថា ការតភ្ជាប់គ្នាជាខ្សែច្រវាក់នៃប្រព័ន្ធបច្ចេកវិទ្យាព័ត៌មាន ពីប្រព័ន្ធមួយ ទៅប្រព័ន្ធមួយទៀត របស់ក្រសួង-ស្ថាប័ន ចំនួន ២១ តាមរយៈថ្នាលផ្លាស់ប្តូរទិន្នន័យកម្ពុជា, ឬហៅថា CamDX, ដែលអនុញ្ញាតឱ្យយើងអាចបង្កើតនូវសវាអេឡិចត្រូនិកជាច្រើនផ្សេងទៀត ដោយកាត់បន្ថយនូវ នីតិវិធីស្មុគស្មាញ និង ពេល ដ៏ច្រើនគួរឱ្យកត់សម្គាល់ ។ ការកសាងប្រព័ន្ធអេកូឡូស៊ីនៃប្រព័ន្ធបច្ចេកវិទ្យាព័ត៌មានបែបនេះ ពិតជាមាន
សារៈសំខាន់ ដែលសម្ដេចធិបតីនាយករដ្ឋមន្ត្រី យល់ថា អាចបង្កើតជាគំរូ ឬ ក្របខ័ណ្ឌការងារថ្មីមួយទៀត ដែលជាមូលដ្ឋានសម្រាប់យកទៅប្រើប្រាស់ក្នុងការលើកស្ទួយបរិយាកាសធ្វើធុរកិច្ច និង ការសម្រួលពាណិជ្ជកម្ម ក៏ដូចជាការពង្រឹងភាពប្រកួតប្រជែងរបស់កម្ពុជា ជារួមតែម្ដង ។ ក្នុងន័យនេះ,ការបន្តយកចិត្តទុកដាក់ពង្រឹង និង ពង្រីកប្រព័ន្ធអេកូឡូស៊ីឌីជីថលនេះ ពិតជាមានសារៈសំខាន់ជាយុទ្ធសាស្ត្រ ដែលអាចចាត់ទុកថា ជាក្របខ័ណ្ឌរួមមួយនៃការកែទម្រង់របស់យើង សំដៅលើកកម្ពស់ភាពប្រកួតប្រជែងរបស់កម្ពុជា ។
សម្ដេចធិបតីនាយករដ្ឋមន្ត្រី បានថ្លែងឱ្យដឹងបន្ថែមថា ស្ថិតក្នុងបរិការណ៍បច្ចុប្បន្ន និង ក្នុងរយៈពេលមធ្យម ទៅអនាគត, យើងរំពឹងថា សេដ្ឋកិច្ច តំបន់ និង សកលលោកទាំងមូល នឹងបន្តត្រូវបានហ៊ុមព័ទ្ធដោយភាពមិនប្រាកដប្រជាខ្ពស់។ ក្នុងន័យនេះ, កម្ពុជា ត្រូវត្រៀមខ្លួនឱ្យល្អ សម្រាប់ភាពចាំបាច់ក្នុងការឆ្លើយតបទៅនឹងវិបត្តិណាមួយដែលអាចកើតមានឡើងជាយថាហេតុ តាមរយៈការជំរុញការកែទម្រង់ឱ្យកាន់តែស៊ីជម្រៅ និង កាន់តែខ្លាំងក្លាឡើង សំដៅលើកកម្ពស់ភាពប្រកួតប្រជែង, បង្កើនពិពិធកម្ម និងពង្រឹងភាពធន់នៃសេដ្ឋកិច្ច និង សង្គមជាតិ៕
ប្រភព៖ AKP
