ព្រះសីហនុ៖ លោក ឡុង ឌីម៉ង់អភិបាលរងខេត្តព្រះសីហនុ បានបញ្ជាក់ក្រោយពីកិច្ចប្រជុំសម្របសម្រួលបច្ចេកទេសថា រដ្ឋបាលខេត្តព្រះសីហនុ សហការជាមួយសមាគមទេសចរណ៍ (CATA) និងសមាគមហោះហើររបស់ប្រទេសថៃ (TEAA) ក្រោមកិច្ចសម្របសម្រួលពីរដ្ឋលេខាធិការអាកាសចរណ៍ស៊ីវិលកម្ពុជា នឹងរៀបចំកម្មវិធីហោះហើរមិត្តភាពកម្ពុជា-ថៃ ឆ្នាំ២០២៤ “Cambodia-Thai Friendship Air Show 2024” រយ:ពេលពីរថ្ងៃ គឺចាប់ពីថ្ងៃទី២៦-២៧ ខែមេសា ឆ្នាំ២០២៤ខាងមុខនេះ នៅទីលានតេជោ (ពយតាមូង) ស្ថិតនៅក្រុងព្រះសីហនុ។
បើតាមលោកអភិបាលរងខេត្តព្រះសីហនុ បានបញ្ជាក់បន្តទៀតថា នេះជាព្រឹត្តិការណ៍លើកទី១ របស់ប្រទេសកម្ពុជា ហើយក៏ជាព្រឹត្តិការណ៍លើកទី១សម្រាប់ខេត្តព្រះសីហនុផងដែរ ដែលមានយន្តហោះខ្នាតតូចចំនួន ១៦គ្រឿង នឹងធ្វើការហោះមកពីប្រទេសថៃ ចុះចតនៅអាកាសយានដ្ឋានអន្តរជាតិខេត្តព្រះសីហនុ ក្រោមកិច្ចសម្របសម្រួលរបស់ក្រុមហ៊ុនអាកាសចរណ៍កម្ពុជា ដើម្បីត្រៀមធ្វើការហោះហើរសម្តែង Air Show 2024 នៅពីលើទីលានសម្តេចតេជោ (ពយតាមូង) ស្របនឹងមាត់សមុទ្រ ស្ថិតក្នុងសង្កាត់លេខ៣ ក្រុងព្រះសីហនុ ដើម្បីផ្តល់ឱកាសឱ្យភ្ញៀវទេសចរជាតិ ភ្ញៀវទេសចរបរទេស និងបងប្អូនប្រជាពលរដ្ឋខេត្តព្រះសីហនុ បានទស្សនាកម្សាន្ត ក៏ដូចជាផ្តល់ឱកាសឱ្យអ្នកសារព័ត៌មានទូទៅអាចថតរូប និងផ្សព្វផ្សាយអំពីសក្តានុពលទេសចរណ៍របស់ខេត្តព្រះសីហនុ ដែលមានហេដ្ឋារចនាសម្ព័ន្ធផ្លូវថ្នល់ និងឆ្នេរខ្សាច់សស្អាតពីធម្មជាតិ ដែលជាកន្លែងទេសចរណ៍តំបន់ឆ្នេរដ៏មានភាពទាក់ទាញ មានកំពង់ផែអន្តរជាតិ និងមានកោះជាច្រើន ។
លោកអភិបាលរងខេត្តព្រះសីហនុ បានបន្ថែមថា គោលបំណង នៃការបើកព្រឹត្តិការណ៍នេះ មានទិសដៅស្របគ្នា នឹងគោលនយោបាយបើកចំហជើងមេឃ របស់រាជរដ្ឋាភិបាលកម្ពុជា និងមានគោលដៅលើកស្ទួយវិស័យទេសចរណ៍ និងធុរកិច្ចរវាងកម្ពុជា-ថៃ តាមរយៈការឆ្លុះបញ្ចាំងអំពីមិត្តភាព កិច្ចសហការគ្រប់ជ្រុងជ្រោយផងដែរ ។ ទន្ទឹមនោះរដ្ឋបាលខេត្តព្រះសីហនុ ក៏បានចងសម្ព័ន្ធមេត្រីភាពដោះដូរទេសចរណ៍ជាមួយខេត្តជាប់មាត់សមុទ្រជាមួយប្រទេសថៃ មានដូចជាខេត្ត ត្រាត ចន្ទបុរី ផងដែរ៕
ប្រភព៖ AKP
