ព្រះសីហនុ៖ បើគិតត្រឹមខែមេសា ឆ្នាំ២០២៤នេះ ក្រោយពីច្បាប់បានអនុញ្ញាតឱ្យបង្កើតអនុគណៈ កម្មាធិការវិនិយោគរាជធានី ខេត្ត មានសិទ្ធិក្នុងការអនុម័តធ្វើការវិនិយោគនៅថ្នាក់រាជធានី ខេត្ត ដែលមានទុនវិនិយោគសមមូលក្រោម ២លានដុល្លារ ដែលជាសមត្ថកិច្ចរបស់អនុ គណៈកម្មាធិការវិនិយោគរាជធានី ខេត្ត តែសម្រាប់ច្បាប់ថ្មី រាជធានី ខេត្ត មានសិទ្ធិសម្រេច ការចុះបញ្ជីវិនិយោគនៅក្នុងខេត្តរបស់ខ្លួនក្រោម ៥លានដុល្លារ។
ខេត្តព្រះសីហនុបានចុះបញ្ជីជូនក្រុមហ៊ុនចំនួន៧ និងបន្ថែមការចុះបញ្ជីវិនិយោគថ្មី មួយទៀត គឺមាន ៨ក្រុមហ៊ុន។ ព្រោះសកម្មភាពវិនិយោគនៅខេត្តព្រះសីហនុមានច្រើនតើ ហេតុអ្វីមានតែ៨ គឺការវិនិយោគក្រោម ៥លានដុល្លារ ជាសិទ្ធិសម្រេចរបស់អនុ គណៈកម្មាធិការវិនិយោគរាជធានី ខេត្ត។ ការវិនិយោគនៅខេត្តព្រះសីហនុមានដូចជា តំបន់ សេដ្ឋកិច្ចពិសេសបិតត្រាំង ជេចាំង ស្រុកព្រៃនប់ តំបន់សេដ្ឋកិច្ចពិសេសក្នុងក្រុងព្រះសីហនុ ស្រុកកំពង់សិលា និងស្រុកស្ទឹងហាវ ដែលមានរោងចក្រធំៗមានទុនវិនិយោគលើ ៥លានដុល្លារអាម៉េរិក។ រដ្ឋបាលរាជធានី ខេត្ត មានសិទ្ធិចុះបញ្ជីវិនិយោគក្រោម ៥លានដុល្លារ សហរដ្ឋអាមេរិក ទោះបីអនុគណៈកម្មាធិការវិនិយោគរបស់យើងបានចេញវិញ្ញាបនបត្របាន ចំនួន៨ ក៏ប៉ុន្តែយើងមិនទាន់ស្ងប់ចិត្តនោះទេ និងបន្តការចុះបញ្ជីនេះឱ្យបានកាន់តែ ច្រើន បន្ថែមទៀត។
នេះជាការលើកឡើងរបស់លោក ឡុង ឌីម៉ង់ អភិបាលរង នៃគណៈអភិបាល ខេត្តព្រះសីហនុ នៅព្រឹកថ្ងៃចន្ទ ១៤កើត ខែចេត្រ ឆ្នាំរោង ឆស័ក ព.ស ២៥៦៧ ត្រូវនឹងថ្ងៃទី២២ ខែមេសា ឆ្នាំ២០២៤នេះ។
គម្រោងទាំង៧ ដែលអនុគណៈកម្មាធិការវិនិយោគខេត្តព្រះសីហនុ (អ.គ.វ.ខ.ស.ន) បានចេញវិញ្ញាបនបត្រចុះបញ្ជីគម្រោងវិនិយោគ ដែលមានលក្ខណៈសម្បត្តិគ្រប់គ្រាន់កំពុង ដំណើរការប្រកបដោយប្រក្រតីភាព ហើយថ្មីៗនេះអនុគណៈកម្មាធិការវិនិយោគ ខេត្តព្រះសីហនុ ក៏បានសម្រេចចេញវិញ្ញាបនបត្រជូនរោងចក្រ ផលិតកេសកាតុង ផលិតផល ធ្វើអំពីក្រដាស សម្ភារវេចខ្ចប់ និងសម្ភារបន្ទាប់បន្សំគ្រប់ប្រភេទ ដោយឡែកគម្រោងវិនិយោគ ដែលមានទឹកប្រាក់លើសពី ៥លានដុល្លារសហរដ្ឋអាមេរិក ត្រូវស្នើសុំទៅ CDC។
លោកអភិបាលរងខេត្តព្រះសីហនុបានឱ្យដឹងថា បន្ទាប់ពីចូលឆ្នាំប្រពៃណីខ្មែររួចមក អនុគណៈកម្មាធិការវិនិយោគខេត្តព្រះសីហនុ បានចេញវិញ្ញាបនបត្រចុះបញ្ជីគម្រោង វិនិយោគក្រុមហ៊ុន ខូប៊ី ភែកឃីជីង (ខេមបូឌា) ឯ.ក COBER PACKAGING CAMBODIA CO Ltd បង្កើតរោងចក្រផលិតកេសកាតុង ផលិតផលធ្វើអំពីក្រដាស សម្ភារវេចខ្ចប់ និងសម្ភារ បន្ទាប់បន្សំគ្រប់ប្រភេទមានទុនចុះបញ្ជីវិនិយោគ ១ ៥០០ ០០០ដុល្លារ និងទុនវិនិយោគ ៣ ០៤០ ៧៣៥ដុល្លារអាម៉េរិក មានទីតាំងស្ថិតនៅភូមិអូរចំណា ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ កាលពីថ្ងៃទី១៧ ខែមេសា ឆ្នាំ២០២៤ ដែលជាគម្រោងមាន លក្ខណៈសម្បត្តិគ្រប់គ្រាន់។ ដោយអនុលោមតាមច្បាប់ និងអនុក្រិត្យលេខ ១២០អនក្រ.បក ចុះថ្ងៃទី២០ ខែមិថុនា ឆ្នាំ២០២២ ស្តីពីវិនិយោគ អ.គ.វ.ខ.ស.ន ត្រូវចេញវិញ្ញាបនបត្រចុះបញ្ជី ជូនអ្នកវិនិយោគក្នុងរយ:ពេល២០ថ្ងៃ នៃថ្ងៃធ្វើការបន្ទាប់ពីបានទទួលសំណើចុះ បញ្ជីរបស់សាមីក្រុមហ៊ុន។
លោកអភិបាលរងខេត្តបានបញ្ជាក់ថា ក្រោយពីការអំពាវនាវរបស់សម្តេចធិបតី ហ៊ុន ម៉ាណែត កៀរគរអ្នកវិនិយោគនៅខេត្តព្រះសីហនុរួចមក ខេត្តព្រះសីហនុទទួលបានសំណើ ពីអ្នកវិនិយោគជាបន្តបន្ទាប់ ដោយឡែកការបង្កើតរោងចក្រកាតុង ផលិតផលធ្វើអំពីក្រដាស សម្ភារវេចខ្ចប់ និងសម្ភារបន្ទាប់បន្សំគ្រប់ប្រភេទអាចផ្តល់ការងារជូនប្រជាពលរដ្ឋជាង ៥០០កន្លែង កាត់បន្ថយភាពក្រីក្រ។ យើងបន្តការផ្សព្វផ្សាយដល់អ្នកវិនិយោគផ្សេងទៀត មកធ្វើការវិនិយោគនៅខេត្តព្រះសីហនុ ទន្ទឹមនោះយើងនឹងធ្វើការផ្សព្វផ្សាយច្បាប់ ស្តីពីការវិនិយោគក្នុងគោលបំណងបង្កើតក្របខ័ណ្ឌគតិយុត្ត ដើម្បីទាក់ទាញអ្នកវិនិយោគ តាម រយៈគោលនយោបាយលើកទឹកចិត្តប្រកបដោយតម្លាភាពផ្នែកពន្ធមាន៣ប្រភេទគឺ៖ ទី១.ការ លើកទឹកចិត្តមូលដ្ឋាន ចែកជាពីរផ្សេងទៀត អាស្រ័យទៅលើការ ជ្រើសរើស របស់អ្នក វិនិយោគ ការលើកលែងពន្ធលើប្រាក់ចំណូលរយ:ពេល ពី៣ ទៅ៩ឆ្នាំ ទៅតាមវិស័យ។ ទី២.ការទទួលបានសិទ្ធិកាត់កងចំណាយមូលធនតាមរយៈការរំលស់ និងសិទ្ធិកាត់កង រហូតដល់ ២០០ភាគរយ លើការចំណាយសំខាន់ផ្សេងៗទៀត រយៈពេល ៩ឆ្នាំ និងការលើក ទឹកចិត្តផ្សេងៗទៀត ការលើកទឹកចិត្តបន្ថែមលើអាករតម្លៃបន្ថែម។ ចំពោះការទិញវត្ថុធាតុដើម ក្នុងស្រុក ក៏ដូចជាការជំរុញការបណ្តុះបណ្តាលអភិវឌ្ឍធនធានមនុស្សត្រូវបានលើក ទឹកចិត្ត ផងដែរ។ ៣.វិនិយោគណាដែលសាងសង់កន្លែងស្នាក់នៅជូនដល់បុគ្គលិក កម្មករ ទទួលបាន ការលើកទឹកចិត្ត ជួយដល់អ្នកវិនិយោគឱ្យគាត់មានការកក់ក្តៅ ហើយសម្រេចចិត្តដាក់ទុន វិនិយោគនៅក្នុងប្រទេសកម្ពុជា ពិសេសនៅខេត្តព្រះសីហនុ។
លោកអភិបាលរងខេត្តបានបញ្ជាក់ថា គោលដៅការវិនិយោគ គឺការបង្កើនទំនុកចិត្ត បង្កើននូវការយល់ដឹងកាន់តែស៊ីជម្រៅបន្ថែមទៀត ដល់អ្នកវិនិយោគទាំងខ្មែរ បរទេស ចូលមកធ្វើការវិនិយោគនៅខេត្តព្រះសីហនុ រដ្ឋបាលខេត្តនឹងខិតខំបន្តផ្សព្វផ្សាយក្នុងវេទិកា ជាមួយវិស័យឯកជន ដើម្បីប្រមូតផ្សព្វផ្សាយដល់អ្នកវិនិយោគបរទេសមកតាំងទីនៅក្នុង ខេត្តព្រះសីហនុ ដែលមានអនុគណ:កម្មាធិការវិនិយោគរបស់យើងនៅរង់ចាំស្វាគមន៍ និងជួយសម្របសម្រួលជួយដល់អ្នកវិនិយោគនៅក្នុងខេត្តព្រះសីហនុ៕
ប្រភព៖ AKP
