កែប៖ ក្នុងរយ:ពេល០៤ថ្ងៃ នៃសង្ក្រាន្តឆ្នាំថ្មីប្រពៃណីជាតិខ្មែរ ខេត្តកែបទទួលភ្ញៀវទេសចរ មកពីគ្រប់ទិសទីបានចំនួនជិត១៦ម៉ឺននាក់ ។ នេះបើតាមតួលេខរបស់ លោក សោម ចិន្តា ប្រធានមន្ទីរទេសចរណ៍ខេត្តកែប នៅថ្ងៃអង្គារ ៨កើត ខែចេត្រ ឆ្នាំរោង ឆស័ក ព.ស.២៥៦៧ត្រូវនឹងល្ងាចថ្ងៃទី១៦ ខែមេសា ឆ្នាំ២០២៤ ។
លោកប្រធានមន្ទីរបានបញ្ជាក់ថា បើគិតចាប់ពីថ្ងៃទី១៣ ដល់ទី១៦ ខែមេសា ឆ្នាំ២០២៤ រយ:ពេល០៤ថ្ងៃ នៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ពុទ្ធសករាជ ២៥៦៨ ខេត្តកែប ទទួលបានភ្ញៀវទេសចរ សរុបចំនួន ១៥៩ ៧៨៨នាក់ បើប្រៀបធៀបទៅនឹងឆ្នាំ២០២៣ ភ្ញៀវទេសចរ សរុបចំនួន ១៤៩ ៤០៦នាក់ កើនឡើង ៦.៩៤ភាគរយ ក្នុងនោះភ្ញៀវជាតិចំនួន ១៥៨៨៩៦នាក់ បើធៀបនឹងឆ្នាំ២០២៣ មានចំនួន ១៤៨ ៧៤៤នាក់ កើនឡើង៦.៨២ភាគរយ ភ្ញៀវទេសចរបរទេសចំនួន ៨៩២នាក់ ធៀបនឹងឆ្នាំ២០២៣ មានចំនួន ៦៦២នាក់ កើនឡើង ៣៤.៧៤ភាគរយ ។
លោក សោម ចិន្តា បានបន្ថែមថា បើទោះជាមានភ្ញៀវទេសចរ ចូលមកសម្រាក លម្ហែកម្សាន្ត សង្ក្រាន្តឆ្នាំថ្មីនៅក្នុងទឹកដីខេត្តកែប យ៉ាងច្រើនដូចទឹកបាក់ទំនប់ ក៏ប៉ុន្តែខេត្តយើងបានរក្សានូវសុខសុវត្ថិភាពយ៉ាងល្អប្រសើរ ដោយរក្សាបានសណ្តាប់ធ្នាប់ របៀបរៀបរយ ជូនភ្ញៀវទេសចរ គឺគ្មានករណីណាមួយកើតឡើង គួរឱ្យកត់សម្គាល់ឡើយ ។
សូមជម្រាបថា ក្នុងឱកាសសង្ក្រាន្តឆ្នាំថ្មី គេឃើញវត្តមានឯកឧត្តមបណ្ឌិត សោម ពិសិដ្ឋ អភិ បាលខេត្តកែប បានចូលរួមសប្បាយរីករាយ ជាមួយបងប្អូនប្រជាពលរដ្ឋ និងភ្ញៀវទេសចរ ដែលមកដើរលេងកម្សាន្តសប្បាយនៅខេត្តកែប ដែលបានធ្វើឱ្យសង្ក្រាន្តឆ្នាំថ្មីនៅខេត្តទេសចរណ៍ដ៏តូចច្រឡឹងមួយនេះ កាន់តែមានភាពអធិកអធមផងដែរ ៕
ប្រភព៖ AKP
