សៀមរាប៖ ក្នុងរយៈពេល៣ទៅ៤ថ្ងៃមកនេះ អ្នកលក់ក្រឡាន នៅភូមិខ្ចាស់ ស្ថិតក្នុងទឹកដីខេត្តសៀមរាប ដែលធ្លាប់តែស្ងប់ស្ងាត់ ពុំសូវមានអតិថិជនចូលទិញច្រើននោះ ប៉ុន្តែនារដូវថ្ងៃចូលឆ្នាំថ្មីនេះបានប្រែមកកាក់កបប្រសើរឡើងវិញ ធ្វើឱ្យពួកគាត់សប្បាយចិត្តដោយមិនចង់ឱ្យឱកាសដ៏ល្អនេះកន្លងផុតដោយឆាប់រហ័សនោះឡើយ។
ដោយសារអស់រយៈពេលជាច្រើនឆ្នាំមកហើយ របរលក់ក្រឡាន នៅដងផ្លូវជាតិលេខ៦A ស្ថិតនៅត្រង់ភូមិខ្ចាស់ ឃុំខ្ចាស់ ស្រុក សូទ្រនិគម ខេត្ដសៀមរាបគឺបានធ្វើឱ្យអ្នកទេសចរ និង អ្នកធ្វើដំណើរឆ្លងកាត់ទីនោះតែងចូលទិញបរិភោគ និងទទួលស្គាល់រស់ជាតិថាឆ្ងាញ់ទៀតផង។ ការដាក់លក់តាមដងផ្លូវ និងរួមផ្សំជាមួយការដុតក្រឡានផ្ទាល់ៗ និងផ្គួបផ្សំផ្សែងហ៊ុយទ្រលោមនៅកន្លែងនោះតែម្តងបានទាក់ទាញអ្នកធ្វើដំណើរប្រុសស្រីឈប់សំចតដើម្បីបានភ្លក្ស និងទិញផ្ញើទៅមិត្តភក្តិ ញាតិមិត្តបងប្អូនបានបរិភោគ។
អ្នកស្រី ហៀង កញ្ញា អ្នកលក់ក្រឡាននៅដងផ្លូវជាតិលេខ៦A ស្ថិតនៅភូមិខ្ចាស់ ឃុំខ្ចាស់ ស្រុក សូទ្រនិគម ខេត្ដសៀមរាបដែលកំពុងដុតក្រឡានលក់ជាមួយនឹងទឹកមុខរីករាយ រាក់ទាក់បានប្រាប់ឱ្យដឹងថា ក្នុងរយៈពេល៣ថ្ងៃមកនេះនៃពិធីបុណ្យចូលឆ្នាំខ្មែរអ្នកស្រីលក់ដាច់គួរសម ដោយក្នុងមួយថ្ងៃលក់ដាច់ក្រឡានអស់ចាប់ពី១០គីឡូក្រាមឡើងទៅ។ អ្នកស្រីបន្តថា អ្នកដើរកម្សាន្តទីជិតឆ្ងាយតែងឈប់ទិញក្រឡានជាហូរហែរធ្វើឱ្យអ្នកស្រីសប្បាយចិត្តជាពន់ពេក។
ស្រីរូបនេះ ដែលប្រកបមុខរបរដុតក្រឡានច្រើនឆ្នាំមកនេះបានប្រាប់ថា៖ ”ខ្ញុំបានប្រកបមុខរបរដុតក្រឡានលក់តាំងតែមួយតូប ពីរតូបដំបូង។ ឥឡូវនេះ លក់សឹងរាប់រយតូប ឃើញថាលក់គ្នាច្រើនទៅធ្វើឱ្យបាត់ចំណូល និងគួបផ្សំពេលនេះខ្សត់អ្នកទិញផងធ្វើឱ្យជួបស្ថានភាពលំបាកក្នុងការរកប្រាក់ចំណូលច្រើនជាងមុន”។
ជាមួយគ្នានេះ អ្នកស្រី យុទ្ធវ័ង ដែលជាអ្នកលក់ក្រឡានក្នុងភូមខ្ចាស់នេះដែរបានប្រាប់ឱ្យដឹងថា អ្នកស្រីលក់នៅដើមទីគេសម្រាប់អ្នកធ្វើដំណើរមកពីរាជធានីភ្នំពេញ ម្ល៉ោះហើយធ្វើឱ្យពុំសូវដាច់ច្រើនឡើយ។ អ្នកស្រីបន្តថា ក្នុងរដូវចូលឆ្នាំនេះទោះលក់ពុំសូវដាច់ដូចអ្នកដទៃតែអ្នកស្រីនៅអាចលក់ក្រឡានអស់អង្ករជាង១០ គីឡូក្រាមដែរ។ ស្ត្រីរូបនេះប្រាប់ឱ្យដឹងបន្ថែមថា៖ ”សម្រាប់តម្លៃក្រឡានគឺទៅតាមទំហំតូចធំ មានតម្លៃមួយដើម២ពាន់រៀល, ២ ៥០០រៀល ៣ ០០០ រៀលនិងក្រឡានធំតម្លៃ ៣ ៥០០ រៀលក្នុងមួយដើម”។
ចំណែកអ្នកស្រី ស្ងួន ម៉ុច អ្នកលក់ក្រឡាមួយរូបទៀតនៅភូមិខ្ចាស់នេះដែរបានសំណូមពរឱ្យអតិថិជន ដែលធ្វើដំណើរទីជិតឆ្ងាយជួយទិញក្រឡានរបស់ពួកគាត់ដែលមានរស់ជាតិឈ្ងុយឆ្ងាញ់កុំខាន។ ទោះបីយ៉ាងណាអ្នកស្រីបានលើកឡើងដែរថា កន្លងមកមានអតិថិជន ខ្លះមិនហ៊ានចូលទិញដោយសារខ្លាចក្រឡាននៅសល់ទិញទៅបរិភោគមិនកើត។ តែអ្នកស្រីសំណូមពរឱ្យអ្នកធ្វើដំណើរភ្លក្សមើលសិនមុននឹងទិញពីព្រោះក្រឡានពួកគាត់ភាគច្រើនសុទ្ធតែល្អៗ ហើយរស់ជាតិក៏ឆ្ងាញ់ថែមទៀត។
អ្នកស្រី ស្ងួន អន អ្នកដុត ក្រឡានជើងចាស់មួយរូបទៀតបានប្រាប់ថា ការដុតក្រឡាន ប្រើពេលយ៉ាងតិច២ម៉ោងទើបឆ្អិនល្អ ហើយអាចលក់បាន ដោយក្នុងនេះនៅពេលសកបំពង់ឬស្សីដុតដំបូងប្រើពេល១ម៉ោងកន្លះ ហើយឆ្អើរកន្លះម៉ោងទៀតទើបបានលក់សរុប២ម៉ោងទើបអាចលក់បាន។
ស្ត្រីដែលប្រកបរបរដុតក្រឡានលក់មិនតិចជាង២០ឆ្នាំមកនេះបានប្រាប់ដោយលើកឡើងផងដែរថា៖ ”កាលពីមុនលក់ក្នុងមួយថ្ងៃអស់អង្ករ១០០គីឡូក្រាម តែបច្ចុប្បន្នលក់បានក្នុងមួយថ្ងៃអង្ករបានត្រឹមតែ១០គីឡូក្រាមប៉ុណ្ណោះ។សម្រាប់ចូលឆ្នាំនេះខ្ញុំអាចលក់បានក្នុងមួយថ្ងៃអស់អង្ករប្រមាណ២០គីឡូក្រាមដែរ”។
សួមបញ្ចាក់ថា ក្រឡានជាអាហារបស់ខ្មែរយើង ដែលមានប្រវត្តិយូរលង់ណាស់មកហើយ។ ដោយក្នុងសម័យដើមគេដុតក្រឡានតាមផ្ទះទុកគ្រាន់ហូបជាលក្ខណៈគ្រួសារ ឬផ្ញើរសាច់ជាតិក្នុងថ្ងៃបុណ្យទានជាដើម។ ក្នុងសម័យ នោះ នៅពេលចាស់ទុំ បុរាណ ចង់ដុតក្រឡានតែង ដើររកកាប់ដើមឫស្សី ដែលមានបំពង់ប្រហោងធំៗ យកមកធ្វើក្រឡាន។ សម្រាប់គ្រឿងផ្សំរបស់ «នំក្រឡាន» មានដូចជា អង្ករដំណើប សណ្តែកខ្មៅ ស្ករ ខ្ទិះដូង និងអំបិលបន្តិចបន្តួច ដោយយកស្លឹកចេក ឬស្រកីដូងធ្វើឆ្នុក ហើយបន្ទាប់មក គេដុតក្នុងចង្ក្រានធ្វើពីរបាដែក។ ចំពោះរយៈពេល នៃការដុតក្រឡានចាប់ពី២ម៉ោងឡើងទៅ ដោយអាស្រ័យទៅលើទំហំបំពង់ឬស្សីធំ ឬតូចជាដើម៕
ប្រភព៖ AKP
