ភ្នំពេញ៖ លោក ម៉េត មាសភក្ដី អ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា រដ្ឋបាលរាជធានីភ្នំពេញ បានត្រៀម និងរៀបចំតុបតែងទីតាំងសង្ក្រាន្តចំនួន៤កន្លែង គឺរមណីយដ្ឋានវត្តភ្នំ សួនច្បារវិមានឯករាជ្យ សួនមុខវត្តបទុមវត្តី និងមាត់ទន្លេមុខវត្តឧណ្ណាលោម សម្រាប់បងប្អូនប្រជាពលរដ្ឋមកដើរលេងកម្សាន្ដ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានមកដល់។
អ្នកនាំពាក្យរូបនោះបានគូសបញ្ជាក់បន្ថែមទៀតថា សម្រាប់ទីតាំងទាំង៤កន្លែងនេះ យើងនឹងរៀបចំកម្មវិធីសម្រាប់បងប្អូនប្រជាពលរដ្ឋលេងកម្សាន្ដ សម្តែងសិល្បៈរបាំប្រពៃណី របាំបុរាណ ល្បែងប្រជាប្រិយជាតិ (ទាញព្រ័ត្រ បោះអង្គញ់ វាយក្អម ចោលឈូង លាក់កន្សែង ចាប់កូនខ្លែង និងដណ្តើមស្លឹកឈើ) ប្រគំតន្ត្រីបុរាណ-សម័យ រាំលេងកម្សាន្ត តាំងបង្ហាញគំនូរបុរាណ និងវត្ថុសិល្បៈវប្បធម៌។
ក្រោមការដឹកនាំចាត់ចែងរបស់ឯកឧត្ដម ឃួង ស្រេង អភិបាលរាជធានីភ្នំពេញ រដ្ឋបាលរាជធានីបានណែនាំឱ្យអង្គភាព និងមន្ទីរជំនាញ ធ្វើការតុបតែងលម្អនៅរមណីយដ្ឋានវត្តភ្នំ ដែលជាកន្លែងរៀបចំសង្ក្រាន្តពិសេសជាងគេ ដើម្បីបង្កភាពសប្បាយរីករាយជូនបងប្អូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិមកកម្សាន្ត និងលេងល្បែងប្រជាប្រិយសប្បាយៗជាច្រើនប្រភេទ។
ជាមួយគ្នានេះដែរ លោក អ៊ុំ យ៉េង មករា ប្រជាពលរដ្ឋរស់នៅភូមិ៨ សង្កាត់ផ្សារកណ្ដាល២ ខណ្ឌដូនពេញ បានរៀបរាប់ថា “ឆ្នាំនេះខុសប្លែកពីឆ្នាំទៅ ដោយសារតែអាជ្ញាធររាជធានីភ្នំពេញ ក៏ដូចជាអាជ្ញាធរសង្កាត់ ខណ្ឌ បានរៀបចំតុបតែង កែលម្អទីតាំងជាច្រើនកន្លែង សម្រាប់ឱ្យប្រជាពលរដ្ឋលេងល្បែងប្រជាប្រិយដោយសប្បាយរីករាយ មិនចាំបាច់ទៅដើរលេងនៅខេត្ដឆ្ងាយៗ ដោយត្រូវចំណាយថវិកាច្រើនផង និងដោយសារតែខែនេះក្ដៅខ្លាំងផងដែរ។ ដូច្នេះក្នុងនាមជាប្រជាពលរដ្ឋម្នាក់រស់នៅរាជធានីភ្នំពេញ ខ្ញុំសូមគាំទ្រទាំងស្រុងនូវគំនិតផ្ដូចផ្ដើមឱ្យមានទីតាំងសម្រាប់លេងល្បែងប្រជាប្រិយ ក្នុងឱកាសបុណ្យចូលឆ្នាំថ្មីប្រពៃណីជាតិនេះឡើង ខណៈដែលរដ្ឋបាលរាជធានីភ្នំពេញបានធ្វើការអំពាវនាវដល់បងប្អូនប្រជាពលរដ្ឋគ្រប់មជ្ឈដ្ឋានអញ្ជើញមកចូលរួមកម្សាន្តសប្បាយនៅសង្ក្រាន្តវត្តភ្នំឱ្យបានច្រើនកុះករក្រោមម្លប់សន្តិភាព”។
ដោយឡែក លោក ជា ខេមា អភិបាលខណ្ឌដូនពេញ បានគូសបញ្ជាក់ថា សម្រាប់អាជ្ញាធរខណ្ឌ គឺមានតួនាទីការពារសន្ដិសុខ សណ្ដាប់ធ្នាប់ សុវត្ថិភាពសាធារណៈជូនបងប្អូនប្រជាពលរដ្ឋទូទៅ ដែលមកកម្សាន្ដសប្បាយនៅទីតាំងដែលសាលារាជធានីភ្នំពេញ បានរៀបចំជូនរយៈពេល០៤ថ្ងៃ គឺចាប់ពីថ្ងៃទី១៣ ដល់១៦ ខែមេសា ឆ្នាំ២០២៤ ពិសេសនៅរមណីយដ្ឋានវត្ដភ្នំនេះតែម្ដង។ កម្លាំងដែលបានត្រៀមមានប្រមាណ១០០នាក់ ក្នុងនោះនៅវត្ដភ្នំ យើងប្រើប្រាស់កម្លាំង ពី៤០ទៅ ៥៥នាក់ នៅមុខព្រះបរមរាជវាំងមាត់ទន្លេ ប្រមាណ១៥នាក់ នៅសួនច្បារវិមានឯករាជ្យ ប្រមាណ១៥នាក់ និងនៅមុខវត្ដបទុមវត្ដីជាង១៥នាក់ ដើម្បីកុំឱ្យមានក្មេងស្ទាវ ចោរលួច ចោរឆក់ និងក្មេងទំនើង បង្កហានិភ័យដល់បងប្អូនប្រជាពលរដ្ឋមកធ្វើបុណ្យនៅតាមទីវត្ដអារាម ក្នុងខណ្ឌដូនពេញនេះផងដែរ។
លោក សុខ ពេញវុធ អភិបាលរងរាជធានីភ្នំពេញ បានឱ្យដឹងថា សម្រាប់អាជ្ញាធរខណ្ឌទាំង១៤ និងសង្កាត់ទាំង១០៥ ក្រោមឱវាទសាលារាជធានីភ្នំពេញ ការរៀបចំទទួលទេវតា និងទីតាំងសង្ក្រាន្តជូនបងប្អូនប្រជាពលរដ្ឋ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ មិនខុសពីខណ្ឌដូនពេញឡើយ ទាំងការពារសន្ដិសុខ សុវត្ថិភាពសាធារណៈ ទាំងទីតាំងសប្បាយ ទីវត្ដអារាមនានា គឺអាជ្ញាធរនីមួយៗត្រូវទទួលខុសត្រូវទាំងស្រុង ដើម្បីសុខសុវត្ថិភាពជូនបងប្អូនប្រជាពលរដ្ឋមកធ្វើបុណ្យដោយសប្បាយរីករាយ៕
ប្រភព៖ AKP
