ព្រះសីហនុ៖ នាព្រឹកថ្ងៃសុក្រ ១២រោច ខែផល្គុន ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី០៥ ខែមេសា ឆ្នាំ២០២៤ លោកឧត្តមនាវីទោ រស់ វាសនា មេបញ្ជាការរងមូលដ្ឋានសមុទ្ររាម ដឹកនាំនាយនាវី នាយនាវីរងកងទ័ពជើងទឹកមូលដ្ឋានសមុទ្រ អញ្ជើញទទួលស្វាគមន៍នាវា កងទ័ពជើងទឹកភូមិន្ទថៃចំនួន ០១គ្រឿង មានឈ្មោះ HTMS BANGPAKONG FF456 ចូលចត នៅកំពង់ផែស្វយ័តក្រុងព្រះសីហនុប្រកបដោយសុវត្ថិភាព នាវាកងទ័ពជើងទឹកភូមិន្ទថៃ ដឹកនាំ ដោយលោកវរនាវីឯក អាក់សូក ស៊ីសុវត្ថិ ប្រធានគណៈបញ្ជាការនាវា និងជានាយរងសេនា ធិការកងទ័ពជើងទឹកថៃ ភូមិភាគទី១ បានដឹកនាំនាវាចូលសំចតនៅកំពង់ផែស្វយ័តក្រុង ព្រះសីហនុប្រកបដោយសុវត្ថិភាព។
ក្នុងដំណើរទស្សនកិច្ចរបស់នាវាកងទ័ពជើងទឹកភូមិមិន្ទថៃ នៅព្រះរាជាណាចក្រកម្ពុជា រយៈពេល ៣ថ្ងៃ ចាប់ពីថ្ងៃទី០៥ ដល់ថ្ងៃទី០៧ ខែមេសា ឆ្នាំ២០២៤ ដើម្បីរឹតចំណងសាមគ្គីភាព មិត្តភាព និងកិច្ចសហប្រតិបត្តិការរវាងកងទ័ពជើងទឹក នៃប្រទេសទាំងពីរ រាជរដ្ឋាភិបាល និងប្រជាជន នៃប្រទេសទាំងពីរ។
តាមការគ្រោងទុក ប្រធានគណៈបញ្ជាការនាវា មានគម្រោងចូលជួបសម្តែងការ គួរសម ជាមួយអភិបាលខេត្តព្រះសីហនុ មេបញ្ជាការកងទ័ពជើងទឹកមូលដ្ឋានសមុទ្រ មានកម្មវិធីផ្លាស់ប្តូរបទពិសោធន៍ពីគ្នាទៅវិញទៅមក និងមានកម្មវិធីលេងកីឡាបាល់ទាត់ បាល់ទះមិត្តភាពរវាងកងទ័ពជើងទឹក នៃប្រទេសទាំងពីរផងដែរ។
លក្ខណៈបច្ចេកទេសនាវា៖ នាវា HTMS BANGPAKONG FF456 មានទម្ងន់ផ្ទុក ១ ៨៣៧ton (២ ០៧២តោន ទម្ងន់ពេញ) បណ្ដោយ ១០២.៧៨ម៉ែត្រ ទទឹង ១១.៣៦ ម៉ែត្រ ជម្រៅទឹក ៤.២ម៉ែត្រ កម្ពស់ ២៦.៧ម៉ែត្រ។ មាននាវិកសរុបចំនួន ២២៩នាក់ ក្នុងនោះមាន នាយទាហាន ៣៧នាក់។
សូមរម្លឹកថា កាលពីថ្ងៃទី២៤ ខែកុម្ភៈ ឆ្នាំ២០២៤ នាវាកងស្វ័យការពារ ជើងទឹកជប៉ុន ចំនួន ០២គ្រឿង ក៏បានចូលចតធ្វើទស្សនកិច្ចនៅកំពង់ផែស្វយ័តក្រុងព្រះសីហនុ រយៈពេល ៣ថ្ងៃ នៅព្រះរាជាណាចក្រកម្ពុជា ប្រកបដោយសុវត្ថិភាព៕
ប្រភព៖ AKP
