បន្ទាយមានជ័យ៖ ឯកឧត្តម កែ កឹមយ៉ាន អ្នកតំណាងរាស្ត្រមណ្ឌលខេត្តបន្ទាយមានជ័យ និងជាឧត្តមប្រឹក្សាផ្ទាល់ព្រះមហាក្សត្រ អមដំណើរដោយឯកឧត្តម អស់លោកជាក្រុមការងារ ប្រធានមន្ទីរធនធានទឹកនិងឧតុនិយមខេត្ត និងអាជ្ញាធរមូលដ្ឋានបានចុះពិនិត្យអំពីវឌ្ឍនៈភាពនៃគម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយទឹកជំនន់ ក្នុងខេត្តបន្ទាយមានជ័យ(គម្រោងកូរ៉េ)។
គម្រោងអភិវឌ្ឍន៍ប្រព័ន្ធធារាសាស្ត្រ ដែលឯកឧត្តម កែ គឹមយ៉ាន និងក្រុមការងារចុះពិនិត្យនោះរួមមាន ១ – អាងទឹកកន្សែង ស្ថិតក្នុងឃុំសឹង្ហ ស្រុកអូរជ្រៅ-ភ្លឺទំនប់អាងប្រវែង ៧គីឡូម៉ែត្រ ១២០ម៉ែត្រ ផ្ទៃអាងមានទំហំ៨៣០ហិតាបរិមាណទឹក២២លាន៨០០ពាន់ម៉ែតគូបដែលលទ្ធភាពស្រោចស្រពស្រូវវស្សា ៦ ៣៦០ ហិកតា ហើយលទ្ធភាពស្រោចស្រពស្រូវប្រាំង ១ ៣១០ហិកតា។ ២- អាងទឹកពង្រ ស្ថិតក្នុងសង្កាត់និមិត្ត ក្រុងប៉ោយប៉ែត ដែលភ្លឺទំនប់អាង ប្រវែង ៦គីឡូម៉ែត្រ ២៣ម៉ែត្រ ហើយផ្ទៃអាងមានទំហំ ៤៥៦ហិកតា៨ ខណៈបរិមាណទឹក ៧លាន៩០០ពាន់ម៉ែត្រគូប លទ្ធភាពស្រោចស្រពស្រូវវស្សាបាន២៦០០ហិកតា និង លទ្ធភាពស្រោចស្រពស្រូវប្រាំងបាន ២២០ហិកតា។ ៣- អាងទឹកវាំងហែង ស្ថិតក្នុងឃុំទួលពង្រ ស្រុកម៉ាឡៃ ដែលភ្លឺទំនប់អាងប្រវែង ៧គីឡូម៉ែត្រ០១ម៉ែត្រ ផ្ទៃអាងមានទំហំ ៣៤០ហិតា និងបរិមាណទឹក៦លាន៩០០ពាន់ម៉ែត្រគូប ហើយលទ្ធភាពស្រោចស្រោពស្រូវវស្សាបាន២៥៧០ហិកតា ហើយលទ្ធភាពស្រោចស្រពស្រូវប្រាំងបាន២២០ហិកតា ។
មកដល់ពេលនេះ គម្រោងទាំងមូលដែលមានទំនប់អាងទឹកប្រវែងសរុប២០គីឡូម៉ែត្រ៣៦ម៉ែត្រ និងស្តារប្រឡាយមេ៦ខ្សែមានប្រវែងសរុប ៨៧គីឡូម៉ែត្រ ៦០ម៉ែត្រ ក្នុងនោះមានចាក់បេតុងប្រវែង៤០គីឡូម៉ែត្រ ១៦០ ម៉ែត្រ និងសាងសង់សំណង់សិល្បៈការចំនួន២០៧កន្លែង លទ្ធផលកំពុងអនុវត្តន៍ និងសម្រេចបានចំនួន ៤០.៩០% ធៀបទៅនឹងទំហំការងារ នៃគម្រោងទាំងមូល។
ជាមួយគ្នានេះដែរ ឯកឧត្តម កែ គឹមយ៉ាន និងក្រុមការងារព្រមទាំងអាជ្ញាធរមូលដ្ឋានបានចូលថ្វាយបង្គំព្រះសង្ឃនៅវត្តដុងអារញ្ញ និងបានបន្តដំណើរទៅចូលរួមជាអធិបតីក្នុងពិធីពិសារបាយសាមគ្គីអបអរសាទរពិធីបុណ្យចូលឆ្នាំប្រពៃណីជាតិខ្មែរ ឆ្នាំរោង ឆស័ក ព.ស.២៥៦៧ នៅក្រុងប៉ោយប៉ែត ប្រកបដោយភាពស្និទស្នាលកក់ក្តៅក្រៃលែង៕
ប្រភព៖ AKP
