ឯកឧត្តម សៀក សុជាតិ រដ្ឋលេខាធិការ ក្រសួងការពារជាតិ ប្រធានក្រុមការងារទី២ គណៈកម្មការចំពោះកិច្ចដោះស្រាយបញ្ហាដំណើរចេញចូលរបស់ពលករខ្មែរតាមព្រំដែននៃព្រះរាជាណាចក្រកម្ពុជាបានដាក់ចេញនូវវិធានការដល់អនុប្រធាន និងសមាជិក ក្រុមការងារទី២ ត្រូវក្រើនរម្លឹកដល់អាជ្ញាធរសមត្ថកិច្ចត្រូវបង្កើនស្មារតីទទួលខុសត្រូវក្នុងការគ្រប់គ្រង និងជួយបង្កលក្ខណៈងាយស្រួលដល់ពលករខ្មែរដែលឆ្លងដែនពីប្រទេសថៃ ចូលមកទឹកដីកម្ពុជា ក្នុងឱកាសបុណ្យចូលឆ្នាំថ្មីនាពេលខាងមុខ និងត្រៀមមន្ត្រីបុគ្គលិកពេទ្យប្រចាំការនៅច្រកទ្វារដើម្បីត្រៀមជួយសង្គ្រោះបន្ទាន់ជូនបងប្អូនប្រជាពលរដ្ឋក្នុងករណីចាំបាច់។
ការលើកឡើងរបស់ឯកឧត្ដមបែបនេះ ក្នុងឱកាសចុះសួរសុខទុក្ខបងប្អូនប្រជាពលករខ្មែរដែលឆ្លងដែនពីប្រទេសថៃ ចូលមកទឹកដីកម្ពុជា តាមច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ និងបើកិច្ចប្រជុំ ដើម្បីសម្របសម្រួលដល់ការឆ្លងដែនរបស់បងប្អូនប្រជាពលរដ្ឋក្នុងឱកាសបុណ្យចូលឆ្នាំថ្មីនាពេលខាងមុខ នាព្រឹកថ្ងៃទី ០៤ ខែមេសា ឆ្នាំ២០២៤
ឯកឧត្តម សៀក សុជាតិ បានណែនាំដល់សមាជិកក្រុមការងារ ពិសេសអាជ្ញាធរមូលដ្ឋានថ្នាក់ខេត្ត ត្រូវផ្សព្វផ្សាយឱ្យបានទូលំទូលាយដល់ប្រជាពលរដ្ឋក្នុងដែនសមត្ថកិច្ចរបស់ខ្លួនពីការផ្តល់សេវាបណ្ណព្រំដែនជូនពួកគាត់ដោយគ្មានការរើសអើង មិនឱ្យមានការយកកម្រៃក្រៅសេវាផ្លូវការ បិទច្រករបៀងទាំងអស់ក្នុងដែនសមត្ថកិច្ចរបស់ខ្លួន និងត្រូវគ្រប់គ្រងឱ្យបានច្បាស់លាស់នូវលំហូរស្ថិតិរបស់ប្រជាពលរដ្ឋដែលឆ្លងដែនចូលក្នុងដែនសមត្ថកិច្ចរបស់ខ្លួន។
ឯកឧត្តម ប្រធានក្រុមការងារទី២ ក៏បានជំរុញដល់ក្រុមការងារ អាជ្ញាធរសមត្ថកិច្ចពាក់ព័ន្ធ ត្រូវយកចិត្តទុកដាក់ការពារប្រជាពលរដ្ឋកម្ពុជា មិនត្រូវឱ្យមានការគាបសង្កត់ ការធ្វើបាប និងធ្វើទារុណកម្មពីខាងភាគីថៃ ពិសេសត្រូវផ្តោតសំខាន់លើការផ្សាយព័ត៌មានមិនពិតពីពពួកប្រឆាំងដែលធ្វើឱ្យប៉ះពាល់ដល់កិត្តិយស និងគោលនយោបាយរបស់រាជរដ្ឋាភិបាល។
ជាមួយគ្នានេះដែរ ឯកឧត្តម សៀក សុជាតិ ក៏បានសំណូមពរដល់សមាជិកអង្គប្រជុំ ត្រូវចូលរួមអនុវត្តន៍វិធាវការដែលបានដាក់ចេញដោយរាជរដ្ឋាភិបាលឱ្យបានម៉ឹងម៉ាត់ និងហ្មត់ចត់ ហើយចូលរួមដោះស្រាយភាពមិនប្រក្រតីដែលកើតមានឡើងតាមបណ្តោដោយព្រំដែន មិនឱ្យមានការបង់ប្រាក់ក្រៅផ្លូវការដោយឈរលើអភិក្រមទាំង៥ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់៕
ប្រភព៖ AKP
