ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋ មន្រ្តីនៃព្រះរាជាណាចក្រកម្ពុជាបានមានប្រសាសន៍ថា ក្នុងរយៈពេលជាង២ខែកន្លងមកនេះ រាជរដ្ឋាភិបាល នីតិកាលទី៧ នៃរដ្ឋសភាបានសម្រេចវឌ្ឍនភាពយ៉ាងល្អប្រសើរជាពិសេស តាមរយៈការអនុវត្តយុទ្ធសាស្រ្តបញ្ចកោណដំណាក់កាលទី១ និងវិធានការគន្លឹះទាំង៥ដែល កំពុងទទួលបានការសាទរពីគ្រប់មជ្ឈដ្ឋានទាំងអស់។
សម្ដេចធិបតី ហ៊ុន ម៉ាណែត បានមានប្រសាសន៍ដូច្នេះនៅក្នុងឱកាសបើកកិច្ចប្រជុំពេញអង្គគណៈ រដ្ឋមន្ត្រីដើម្បីពិភាក្សាឆ្លងរបៀបវារៈចំនួន៤នៅទីស្តីការនាយករដ្ឋមន្ត្រីវិមានសន្តិភាព នាព្រឹកថ្ងៃទី២៧ ខែតុលា ឆ្នាំ២០២៣នេះ។
សម្ដេចធិបតី ហ៊ុន ម៉ាណែត មានប្រសាសន៍បន្តថា រាជរដ្ឋាភិបាលក៏កំពុងអនុវត្តការកែទម្រង់សំខាន់ៗជាច្រើនដែលជាការឆ្លើយតបទៅនឹងសេចក្ដីទុកចិត្តរបស់ប្រជាពលរដ្ឋចំពោះ រាជរដ្ឋាភិបាលក៏ដូចជាការត្រៀមខ្លួនទប់ទល់នឹងការវិវត្តថ្មីៗនៃនិន្នាការក្នុងតំបន់និងសកលដែលកាន់តែតានតឹងនិងពិបាកប៉ាន់ស្មាន។
ផ្អែកតាមស្មារតីនេះកិច្ចប្រជុំពេញអង្គគណៈរដ្ឋមន្ត្រីនៅថ្ងៃនេះនឹងពិភាក្សាទៅលើរបៀបវារៈសំខាន់ៗដែលឆ្លុះបញ្ចាំងអំពីវឌ្ឍនភាពការងារដែលសម្រេចបាននិងទិសដៅការងារបន្ត ក៏ដូចជាកិច្ចការចាំបាច់ដែលរាជរដ្ឋាភិបាលត្រូវធ្វើដើម្បីអភិវឌ្ឍរបៀបវារៈគោលនយោបាយអភិវឌ្ឍន៍សង្គម-សេដ្ឋកិច្ចកម្ពុជាឱ្យទទួលបានជោគជ័យនិងមានប្រសិទ្ធភាពខ្ពស់៕
ប្រភព៖ AKP
