ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជាបានថ្លែងថា ការលះបង់អំណាចរបស់សម្ដេច គឺជាការលះបង់អំណាចរបស់សម្ដេច ដើម្បីប្រជាជនកម្ពុជា រស់នៅក្នុងសុខសន្តិភាព និងការអភិវឌ្ឍជាបន្តទៀត។ ការថ្លែងរបស់សម្ដេចតេជោបែបនេះ ក្នុងពិធីបំពាក់មេដាយ និងពិធីបិទបញ្ចប់កញ្ចក់កាមេរ៉ា-ថតខ្សែភាពយន្តភាគរឿង ” កូនប្រុសក្រោមពន្លឺព្រះចន្ទពេញបូណ៌មី ” ដែលធ្វើឡើងនៅ មជ្ឈមណ្ឌលសន្និបាត និងពិពណ៌អន្តរជាតិជ្រោយចង្វារ រាជធានីភ្នំពេញ នារសៀលថ្ងៃទី០៩ ខែតុលា ឆ្នាំ២០២៣។
សម្ដេចតេជោ ហ៊ុន សែន មានប្រសាសន៍ថា តើមានមនុស្សប៉ុន្មាននាក់នៅលើពិភពលោកនេះ ដែលសុខចិត្តលះបង់អំណាចនៅពេលដែលខ្លួនប្រជាប្រិយភាពកំពុងឡើងខ្ពស់។ អ្នកដទៃគិតផ្សឹង មនុស្សមួយចំនួនចុះចេញពីអំណាច នៅពេលដែលធ្លាក់ឆ្នោត មនុស្សមួយចំនួនចុះចេញពីអំណាចដោយសារតែមានបញ្ហានេះ បញ្ហានោះ។ ក៏ប៉ន្តែសម្រាប់ខ្ញុំ ការចុះចេញពីអំណាច ដោយសារការគិតគូរសម្លឹងទៅឱ្យឆ្ងាយបន្តិច អំពីកត្តាសន្តិភាពសម្រាប់ប្រទេសរបស់យើង។ សម្ដេចតេជោបន្តថា ឥឡូវជាង១ខែហើយនៃការរៀបចំរាជរដ្ឋាភិបាលថ្មី តើមានបានឃើញថាប្រជាជនកម្ពុជាមានការភ័យខ្លាច ដោយសារការផ្លាស់ប្ដូរមេដឹកនាំទេ តើមានបានឃើញថាប្រជាជនបានទៅដកប្រាក់ ត្រៀមអង្ករដើម្បីរត់លូនទេ គឺអត់ទេ។ សម្ដេចតេជោបញ្ជាក់ថា៖ «ប្រសិនបើទុកយឺតបន្តិច រហូតដល់សុខភាពខ្ញុំមានបញ្ហា ឬរហូតទៅដល់ខ្ញុំស្លាប់ រឿងវានឹងច្របូកច្របល់សម្រាប់ប្រទេសជាតិ»។ ដូច្នេះសម្ដេចអាចនិយាយបានថា ការលះបង់របស់សម្ដេច គឺជាការលះបង់ដើម្បីប្រជាជនកម្ពុជា រស់នៅក្នុងសុខសន្តិភាព និងការអភិវឌ្ឍជាបន្តទៀត។ សម្ដេចតេជោបានអះអាងថា នេះជាការបញ្ជូនសារទៅជូនក្រុមប្រឆាំងទាំងឡាយបានភ្លឺភ្នែក ដែលអ្នកទាំងឡាយពេលនោះ បានវាយតម្លៃថា ហ៊ុន សែន មិនហ៊ានចុះចេញពីអំណាចទេ ក៏ប៉ុន្តែអ្នកស្គាល់ ហ៊ុន សែន តិចពេកហើយ អ្នកត្រូវរៀនសូត្រពី ហ៊ុន សែន បន្ថែមទៀត ព្រោះ ហ៊ុន សែន យ៉ាងហោចណាស់ក៏រស់បាន៣០ឆ្នាំទៀតដែរ។ ហ៊ុន សែន ក៏នៅតែមានឥទ្ធិពលនយោបាយនៅក្នុងប្រទេសកម្ពុជា អ្នករង់ចាំមើល។
សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានគណបក្សប្រជាជនកម្ពុជាបានអះអាងថា ក្នុងឋានៈសម្តេចជាឧត្តមក្រុមប្រឹក្សាព្រះមហាក្សត្រ និងជាប្រធានគណបក្សកាន់អំណាច សម្តេចនៅតែមានសិទ្ធិបញ្ចេញយោបល់ទៅលើបញ្ហានយោបាយទាំងក្នុងប្រទេស និងក្រៅប្រទេស៕
ប្រភព៖ ទីភ្នាក់ងារសារព័ត៌មានកម្ពុជា
