ត្បូងឃ្មុំ៖ ថ្ងៃទី០៤ ខែតុលា ឆ្នាំ២០២៣ វេលាម៉ោង ១១ និង១៥នាទី ដោយមានការយកចិត្តទុកដាក់ខ្ពស់របស់ លោកឧត្តមសេនីយ៍ទោ ម៉ុន មាគ៌ា ស្នងការនគរបាលខេត្តត្បូងឃ្មុំ និងដោយមានការចូលរួមសហការយ៉ាងល្អ ពីសំណាក់បងប្អូនប្រជាពលរដ្ឋនៅក្នុងមូលដ្ឋាន បន្ទាប់ពីទទួលបានដំណឹងភ្លាម លោកស្នងការរងទទួលជួយដឹកនាំការិយាល័យនគរបាលព្រហ្មទណ្ឌកម្រិតស្រាល បានដឹកនាំកម្លាំងជំនាញខេត្ត សហការជាមួយកម្លាំង អធិការដ្ឋាននគរបាលស្រុកមេមត់ បានចុះប្រត្តិបត្តិការភ្លាមៗ និងបានឃាត់ខ្លួនមុខសញ្ញាមានដីកាចាប់ខ្លួនចំនួន ០២នាក់៖
១.ឈ្មោះ ទាង ភ័ក្ត ភេទប្រុស អាយុ២៥ឆ្នាំ នៅភូមិព្រះពន្លា ឃុំទ្រៀក ស្រុកមេមត់ (ករណីលួច មានដីកាចំនួន០២) តាមដីកាលេខ ២១/២០២០ និង១៤៨០/២០២០ របស់សាលាដំបូងខេត្តត្បូងឃ្មុំ ។
២.ឈ្មោះ មុំ ថេន ហៅ ខិល ថេន ភេទប្រុស អាយុ២៦ឆ្នាំ នៅភូមិព្រះពន្លា ឃុំទ្រៀក ស្រុកមេមត់ (ករណីលួចមានស្ថានទម្ងន់ទោសដោយសារប្រើអំពើហិង្សា) តាមដីកាលេខ ៥៨១/២០២៣ របស់សាលាដំបូងខេត្តត្បូងឃ្មុំ ។
ដូចសុភាសិតខ្មែរពោលថា “កុកអាចភ្លេចជុង តែជុងមិនដែលភ្លេចកុកឡើយ” យ៉ាងណាមិញ ជនណាដែលប្រព្រឹត្តអំពើល្មើសច្បាប់ ដូចមុខសញ្ញាខាងលើនេះជាដើម គឺគេចខ្លួនតាំងពីឆ្នាំ២០២០មកម្លះ តែទោះទៅដល់ទីណាកន្លែងណា គឺមិនអាចលាក់ខ្លួនពួនអាត្មា អស់មួយជីវិតបានឡើយ ច្បាប់និងតាមផ្តន្ទាទោស ។ បច្ចុប្បន្នមុខសញ្ញាទាំងពីរត្រូវសាលាដំបូងខេត្តត្បូងឃ្មុំ ចេញដីកាបង្គាប់ឲ្យឃុំខ្លួន និងបានបញ្ជូនទៅឃុំនៅពន្ធនាគារខេត្តត្បូងឃ្មុំ ៕
ប្រភព៖ ការិយាល័យផ្សព្វផ្សាយអប់រំ ខេត្តត្បូងឃ្មុំ
