កំពង់ចាម៖ នៅបិណ្ឌទី៦ត្រូវនឹងថ្ងៃទី០៥ខែតុលាឆ្នាំ២០២៣នេះស្ថាន ភាពទឹកទន្លេមេគង្គខេត្តកំពង់ចាមបានស្រកចុះបន្តិចវិញហើយបន្ទាប់ពីឡើងអស់ជាច្រើនថ្ងៃ។ ដែលការស្រកចុះនេះគឺនៅកម្ពស់១២,៥០ម៉ែត្រ បើ ធៀបទៅនឹងថ្ងៃម្សិលមិញទឹកស្រក០,១១ម៉ែត្រ ហើយចំណុចប្រកាសប្រុងប្រយ័ត្នគឺកម្ពស់ ១៥.២០ម៉ែត្រ។ ដោយឡែកកម្ពស់ទឹកនាពេលនេះធៀបទៅឆ្នាំ២០២២ ទឹកទន្លេមានកម្ពស់ ១៣,៨១ម៉ែត្រ នេះបើតាមការបញ្ជាក់ពីលោក អ៊ុម វិបុល ប្រធានមន្ទីរធនធានទឹក និងឧត្តុនិយម ខេត្តកំពង់ចាម ជាមួយគ្នាព្រែកជាច្រើនបានទទួលនូវរបបទឹកទន្លេមេគង្គផងដែរ។
ស្របពេលរដូវទឹកតំឡើងនេះដែរជារៀងរាល់ឆ្នាំរដ្ឋបាលខេត្តកំពង់ចាមតែងតែចេញសេចក្តីប្រកាសព័ត៌មានទៅដល់មន្ទីរអង្គភាពពាក់ ព័ន្ធទាំងអស់ត្រូវត្រៀមលក្ខណៈចុះជួយសង្គ្រោះទៅដល់បងប្អូនប្រជាពលរដ្ឋ ក៏ដូចជួយទៅ ដល់សត្វពាហៈនៈទៅកាន់ទីទួលសុវត្ថិភាពជាដើមដែលរងផលប៉ះពាល់ដោយទឹកទន្លេមេគង្គ។
សូមជម្រាបជូនថាស្ថានភាពទឹកទន្លេមេគង្គខេត្តកំពង់ចាមនៅក្នុងឆ្នាំ២០២៣នេះបានឡើង និងស្រកចំនួន៣ដង ដោយឡើងលើកទី១កម្ពស់ប្រមាណ១០ម៉ែត្រ លើកទី២ ១៣ម៉ែត្រ និង លើកទី៣នេះឡើងដល់កម្ពស់១២,៦១ម៉ែត្រ។
ដោយឡែកបើយោងតាមតាមសេចក្តីជូនដំណឹង ស្តីពីការព្យាករណ៍របស់ក្រសួងធនធានទឹក និងឧយ្តុនិយមគឺស្ថានភាពទឹកទន្លេមេគង្គខាងលើ ក្រចេះ ស្ទឹងត្រែងបានស្រកចុះ២ ៣ថ្ងៃហើយ ដូចនេះទឹកទន្លេខេត្តកំពង់ចាមនៅផ្នែកខាងក្រោម អាចបន្តស្រកចុះទៀតនៅថ្ងៃស្អែក៕
ប្រភព៖ មន្ទីរព័ត៌មាន ខេត្តកំពង់ចាម
