ភ្នំពេញ៖ «ខ្ញុំទៅញ៉ូវយ៉កថ្ងៃមុននោះ ទៅUN និយាយពីបង្អាប់ៗ គ្រប់មុខ មានអ្នកវិភាគមួយនោះ ខ្ញុំមិនបញ្ចេញឈ្មោះប្រហែលជាដឹង អាខ្ញុំទៅជួបថ្នាក់ដឹកនាំធ្វើការទាំងអស់ ស្រាប់តែថា ហេស វ៉ាប់ឡើងយកខ្ញុំទៅប្រៀបធៀបជាមួយនាយករដ្ឋមន្ត្រីថៃ យកគោទៅប្រៀបធៀបជាមួយក្របី ប្រទេសនីមួយៗ រដ្ឋាភិបាលនីមួយៗ គេមានគោលនយោបាយដាក់ចេញខុសគ្នា ប៉ុន្តែការយកចិត្តទុកដាក់របស់រាជរដ្ឋាភិបាលដូចតែគ្នាទេ»។ នេះជាការថ្លែងរៀបរាប់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងជំនួបជាមួយកម្មករ និយោជក ក្នុងខណ្ឌដង្កោ នាព្រឹកថ្ងៃទី០៣ តុលានេះ។
អំឡុងពេលទៅចូលរួមមហាសន្និបាតអង្គការសហប្រជាជាតិនៅសហរដ្ឋអាមេរិកកាលពីពាក់កណ្ដាលខែកញ្ញាកន្លងទៅនេះ សម្ដេចមានជំនួបដ៏មមាញឹកជាមួយថ្នាក់ដឹកនាំបរទេស បែរជាក្រុមអ្នកវិភាគមួយចំនួនមើលមិនឃើញ ហើយញៀននឹងការរិះគន់រាជរដ្ឋាភិបាលជាតិសាសន៍ឯងទៅវិញ។
សម្ដេចធិបតី បានថ្លែងថា សម្តេចបានជួបថ្នាក់ដឹកនាំមហាអំណាចជាច្រើន និងជួបជាមួយអគ្គលេខាធិការអង្គការសហប្រជាជាតិ និង បានថ្លែងគូសបញ្ជាក់ពីជំហរកម្ពុជាថែមទៀត។ ផ្ទុយពីក្រុមអ្នករិះគន់ថា ជួបតែក្រុមសហគមន៍ខ្មែរនៅអាម៉េរិក និងកាណាដា ដែលក្រុមអ្នករិះគន់មើលងាយបងប្អូនជាតិសាសន៍ឯងទាំងនោះថា ជាក្រុមកន្ថោរថែមទៀត។
សូមជម្រាប់ជូនថា ក្នុងពេលចូលរួមសន្និបាតអង្គការសហប្រជាជាតិ សម្ដេចធិបតី បានជួបជាមួយថ្នាក់ដឹកនាំសហរដ្ឋអាម៉េរិក បានទាំងប្រយោជន៍ការទូត កិច្ចសហប្រតិបត្តិការល្អ បានទាំងជំនួយ ដោយមិនបាច់ស្នើសុំទៀតផង៕
ប្រភព៖ ទីភ្នាក់ងារសារព័ត៌មានកម្ពុជា
