បរទេស៖ ឯកឧត្តមបណ្ឌិត ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នៃព្រះរាជាណាចក្រកម្ពុជា បានដឹកនាំគណៈប្រតិភូទៅចូលរួមកិច្ចប្រជុំកំពូលក្រុមប្រទេស G-77 បូកចិន នៅរដ្ឋធានីហាវ៉ាណា ប្រទេសគុយបា ចាប់ពីថ្ងៃទី១៥ ដល់ទី១៦ ខែកញ្ញា ឆ្នាំ២០២៣។
ឯកឧត្តម Miguel Díaz-Canel ប្រធានាធិបតីគុយបា បានទទួលស្វាគមន៍ប្រមុខរដ្ឋ និងរដ្ឋាភិបាល និងសមាជិកនៃគណៈប្រតិភូជាន់ខ្ពស់ ដែលបានអញ្ជើញចូលរួមក្នុងកិច្ចប្រជុំកំពូលនេះ នៅមជ្ឈមណ្ឌលសន្និសីទក្នុងរដ្ឋធានីហាវ៉ាណា និងបានថ្លែងសុន្ទរកថាបើកកិច្ចប្រជុំផងដែរ។
យោងតាមស្ថានទូតគុយបា ប្រចាំកម្ពុជា គណៈប្រតិភូជាង១០០ នាក់ មកពីបណ្តាប្រទេសជាសមាជិកនៃក្រុមប្រទេស G-77 បូកចិន និងមន្ត្រីមកពីអង្គការអន្តរជាតិកំពុងចូលរួមក្នុងវេទិកានេះ ដើម្បីពិភាក្សាអំពីបញ្ហានយោបាយ និងសេដ្ឋកិច្ច ដែលពាក់ព័ន្ធនឹងប្រទេសកំពុងអភិវឌ្ឍន៍។
ប្រភពដដែលបានឱ្យដឹងថា ក្រុមប្រទេស G-77 បូកចិន មានរដ្ឋសមាជិកចំនួន ១៣៤ ក្នុងនោះពីរភាគបីជាសមាជិក នៃអង្គការសហប្រជាជាតិ និងមានប្រជាជនប្រមាណ ៨០ ភាគរយ នៃចំនួនប្រជាជនសរុបនៅលើពិភពលោក។
គួរបញ្ជាក់ថា កិច្ចប្រជុំកំពូលក្រុមប្រទេស G-77 បូកចិន នឹងបិទបញ្ចប់នៅថ្ងៃសៅរ៍ ទី១៦ ខែកញ្ញា នេះ៕
ប្រភព៖ ទីភ្នាក់ងារសារព័ត៌មានកម្ពុជា
