ព្រះសីហនុ៖ នគរបាលខេត្តព្រះសីហនុបង្ក្រាប ចាប់ខ្លួនជនសង្ស័យចំនួន ០៥នាក់ទៀតដែលធ្វើសកម្មភាពឆក់កាបូបពីជនជាតិចិនដែលជនរងគ្រោះអះអាងថា មានប្រាក់ក្នុងកាបូបម្ភៃមុឺនដុល្លា។
ប្រតិបត្តិការនេះធ្វើឡើង ក្រោមបទបញ្ជាពីឯកឧត្តម ឧត្តមសេនីយ៍ឯក ស រដ្ឋា អគ្គស្នងការរងនគរបាលជាតិ និងជាស្នងការនគរបាលខេត្តព្រះសីហនុ បានចាត់ឱ្យ កម្លាំងការិយាល័យនគរបាលព្រហ្មទណ្ឌកម្រិតធ្ងន់ ដឹកនាំបញ្ជាដោយ លោកឧត្តមសេនីយ៍ត្រី ណុប បញ្ញា ស្នងការរងទទួលផែនការងារព្រហ្មទណ្ឌធ្វើប្រតិបត្តិការ បង្ក្រាប។
(ដើមរឿង)-នៅល្ងាចថ្ងៃទី ៣០ ខែសីហា ឆ្នាំ២០២៣ មានបុរសជនជាតិចិន ០១ នាក់ បានមករាយការណ៍ថា នៅចំណុចម្ដុំចំកាស្ពៃ ស្ថិតនៅភូមិ៣ សង្កាត់៤ ក្រុង- ខេត្តព្រះសីហនុ មានជនសង្ស័យចំនួន ០២ នាក់ មិនស្គាល់អត្តសញ្ញាណ ជាជនជាតិខ្មែរ ពាក់អាវ ពណ៌ខ្មៅ ទាំង ០២ នាក់ ជិះម៉ូតូ ០១ គ្រឿង ម៉ាក Honda dream ពណ៌ស បានធ្វើសកម្មភាពឆក់កាបូបរបស់ខ្លួន រួចបើករត់គេចខ្លួនបាត់តែម្ដង ។ បន្ទាប់ពីទទួលពាក្យបណ្ដឹងរួចរាល់ កម្លាំងសមត្ថកិច្ចបានធ្វើការស្រាវជ្រាវយ៉ាងយកចិត្តទុកដាក់ រហូតដល់ថ្ងៃទី ០៥ ខែកញ្ញា ឆ្នាំ២០២៣ វេលាម៉ោង ២៣ និង ០០នាទី កម្លាំងការិយាល័យនគរបាលប្រហ្មទណ្ឌកម្រិតស្រាល រកឃើញនិងឃាត់បានជនសង្ស័យចំនួន ០៥ នាក់ ជនជាតិខ្មែរ និងជិះម៉ូតូ ០៣គ្រឿង ម៉ាក ហុងដាសេ១២៥ ០១គ្រឿង មានផ្លាកលេខ រីឯ ០២គ្រឿងទៀត គ្មានផ្លាកលេខ ចំណុចផ្លូវស្ថាននីយ៍ប្រេងឥន្ធនៈ TOTAL អូរទី៣ ស្ថិតនៅ ភូមិ៥ សង្កាត់៤ ក្រុង-ខេត្តព្រះសីហនុ នាំយកមកការិយាល័យនគរបាលព្រហ្មទណ្ឌក្រិតស្រាល ដើម្បីធ្វើការសាកសួរ ។
ជនរងគ្រោះឈ្មោះ LIN YUANYI ភេទ ប្រុស អាយុ ៣៦ ឆ្នាំ ជនជាតិចិន មុខរបរ អ្នកបើកសណ្ឋាគារ ស្នាក់ភូមិ០៤ សង្កាត់០៤ ក្រុង-ខេត្តព្រះសីហនុ ។ ជនរងគ្រោះអះអាងថា សម្ភារបាត់បង់មានកាបូប ០១ ម៉ាក LV ក្នុងនោះមានលុយដុល្លាចំនួន ២០០,០០០$(ពីរសែនដុល្លាអាមេរិក) ។
ជនសង្ស័យចំនួន ០៥នាក់ មានឈ្មោះដូចខាងក្រោម៖
១-ឈ្មោះ ឆែ ប៊ុនណាង ភេទប្រុស អាយុ ១៩ឆ្នាំ ជនជាតិខ្មែរ មុខរបរ ចុងភៅ ស្នាក់នៅភូមិ៥ សង្កាត់ ៤ ក្រុង-ខេត្តព្រះសីហនុ ។
២-ឈ្មោះ ដន សុគីម ភេទប្រុស អាយុ ២០ ឆ្នាំ ជនជាតិខ្មែរ មុខរបរ ជាងប្តូរប្រេងម៉ាស៊ីន ស្នាក់នៅ ភូមិ១ សង្កាត់៣ ក្រុង-ខេត្តព្រះសីហនុ ។
៣-ឈ្មោះ ខុន ប៊ុនរ៉ុង ភេទប្រុស អាយុ ១៨ឆ្នាំ ជនជាតិខ្មែរ មុខរបរ ដឹកម្ហូប ស្នាក់នៅភូមិ១ សង្កាត់១ ក្រុង-ខេត្តព្រះសីហនុ ។
៤-ឈ្មោះ ពឿន ចាន់វាស្នា ភេទប្រុស អាយុ ១៩ ឆ្នាំ ជនជាតិខ្មែរ មុខរបរ ដឹកជញ្ចូនម្ហូប ស្នាក់នៅ ភូមិ២ សង្កាត់១ ក្រុង-ខេត្តព្រះសីហនុ ។
៥-ឈ្មោះ អ៊ុំ សីហា ភេទប្រុស អាយុ ១៨ ឆ្នាំ ជនជាតិខ្មែរ មុខរបរ ដឹកជញ្ជូនម្ហូប ស្នាក់នៅភូមិ២ សង្កាត់១ ក្រុង-ខេត្តព្រះសីហនុ ។
វត្ថុតាងចាប់យកបានជាក់ស្តែងមាន៖
-ម៉ូតូ១គ្រឿងម៉ាក សង់សេរីឆ្នាំ២០២៣ ពណ៌ស គ្មានស្លាកលេខ មានលេខតួ ND125NE- 0083950 ។
-ម៉ូតូ១គ្រឿងម៉ាក សង់សេរីឆ្នាំ២០១៨ ពណ៌ខ្មៅ ស្លាកលេខ កំពត1M-6768 មានលេខតួ5312469 ។
-ម៉ូតូមួយគ្រឿងម៉ាក សង់សេរីឆ្នាំ២០២៣ ពណ៌ខ្មៅ គ្មានស្លាកលេខ មានលេខតួ0078223 ។
-ទូរសព្ទ័ម៉ាក iphone7 ពណ៌ខ្មៅ ១គ្រឿង ។
-ទូរសព្ទ័ម៉ាក iphone 7plus ពណ៌ខ្មៅ ១គ្រឿង ។
-ទូរសព្ទ័ម៉ាកiphone 13 pro ពណ៌ខៀវ ១គ្រឿង ។
-ទូរសព្ទ័ម៉ាក iphone 12 ពណ៌ទឹកមាស ១គ្រឿង ។
-នាឡិការ ១គ្រឿង ពណ៌ទឹកមាស ។
-កាបូបពណ៌ខ្មៅចំនួន២។ ចំណែកលុយដែលជនរងគ្រោះអះអាងថាមាន២០មុឺនដុល្លានៅក្នុងកាបូបនោះ មិនមានរកឃើញទេ។
ជនសង្ស័យខាងលើ ការិយាល័យនគរបាលព្រហ្មទណ្ឌកម្រិតស្រាល បានកសាងសំណុំរឿងបញ្ជូនទៅសាលាដំបូងខេត្តព្រះសីហនុនៅថ្ងៃទី ០៨ ខែ កញ្ញា ឆ្នាំ២០២៣ ៕
ប្រភព៖ Huy Bunleng News
