សៀមរាប ៖ គោរពតាមសេចក្តីណែនាំរបស់គណ:បញ្ជាការឯកភាពខេត្តសៀមរាប និងបទបញ្ជាដ៏ខ្ពង់ខ្ពស់របស់លោកឧត្តមសេនីយ៍ទោ តេង ច័ន្ទណាត ស្នងការនៃស្នងការដ្ឋាននគរបាលខេត្តសៀមរាប ក្នុងការធានាបាននូវសន្តិសុខ និងសណ្តាប់ធ្នាប់សាធារណៈល្អក្នុងខេត្តសៀមរាប កម្លាំងការិយាល័យអន្តរាគមន៍ និងតម្រួតបទបញ្ជា បានចេញល្បាត និងឈរជេីងតាមបណ្តាគោលដៅសំខាន់ៗជាប្រចាំ ក្នុងក្រុងសៀមរាប ហើយបានសហការជាមួយអង្គភាពពាក់ព័ន្ធ និងបងប្អូនប្រជាពលរដ្ឋតាមមូលដ្ឋាន ក្នុងការបង្ការ ទប់ស្កាត់ បង្ក្រាបបទល្មើសផ្សេងៗ ពិសេសក្រុមក្មេងទំនើងដែលតែងតែបង្កភាពអនាធិបតេយ្យ។
ជាក់ស្តែងនាយប់ថ្ងៃទី០៣ និងថ្ងៃទី០៤ ខែមិថុនា ឆ្នាំ២០២៣ លោកវរសេនីយ៍ឯក ជា រតនៈ នាយការិយាល័យអន្តរាគមន៍ និងតម្រួតបទបញ្ជា បានដឹកនាំកម្លាំងចុះបង្ក្រាបក្រុមក្មេងទំនើងក្នុងភូមិសាស្ត្រក្រុងសៀមរាប ហើយឃាត់ខ្លួនបានជាបន្តបន្ទាប់ចំនួន ០៩នាក់ ក្នុងទីតាំងផ្សេងៗគ្នា៖
– នៅវេលាម៉ោង ២៣ និង៣០នាទី ថ្ងៃទី០៣ ខែមិថុនា ឆ្នាំ២០២៣ ឃាត់ខ្លួនជនសង្ស័យបានចំនួន ០៣នាក់ ពូថៅចំនួន ០១ និងម៉ូតូចំនួន ០២គ្រឿង ក្បែរភោជនីយដ្ឋានផ្ទះឈេី ស្ថិតនៅភូមិបឹងដូនប៉ា សង្កាត់ស្លក្រាម ក្រុង/ខេត្តសៀមរាប ។
⁃ នៅវេលាម៉ោង ២៤ និង២០នាទី ថ្ងៃទី០៤ ខែមិថុនា ឆ្នាំ២០២៣ ឃាត់ខ្លួនបានជនសង្ស័យចំនួន ០១នាក់ ម៉ូតូ០១គ្រឿង និងដាវចំនួន០១ដើម នៅចំណុចខាងត្បូងស្ពាននាគប្រហែល១០០ម៉ែត្រ ស្ថិតក្នុងភូមិបឹងដូនប៉ា សង្កាត់ស្លរក្រាម ក្រុង/ខេត្តសៀមរាប ។
⁃ នៅវេលាម៉ោង០២ និង២៦នាទី ថ្ងៃទី០៤ ខែមិថុនា ឆ្នាំ២០២៣ ឃាត់ខ្លួនជនសង្ស័យបានចំនួន ០៤នាក់ ម៉ូតូ០២គ្រឿង និងកាំបិតវែងចំនួន ០១ដើម នៅចំណុចខាងមុខសាលាបឋមសិក្សាឥន្ទកោសា ស្ថិតនៅភូមិបឹងដូនប៉ា សង្កាត់ស្លរក្រាម ក្រុងសៀមរាប/ខេត្តសៀមរាប ។
⁃ នៅវេលាម៉ោង ០២និង៥០នាទី ថ្ងៃទី០៤ ខែមិថុនា ឆ្នាំ២០២៣ ឃាត់ខ្លួនក្មេងទំនើងបង្ហោះម៉ូតូចំនួន ០១នាក់ និងម៉ូតូចំនួន ០១គ្រឿង នៅចំនុចខាងលិច ភោជនីយដ្ឋានសែនសប្បាយ៧ ប្រហែល ១០០ម៉ែត្រ ស្ថិតនៅភូមិតាភុល សង្កាត់ស្វាយដង្គុំ ក្រុង/ខេត្តសៀមរាប ។
ក្រោយធ្វើការឃាត់ខ្លួន កម្លាំងបានប្រគល់ជនសង្ស័យ រួមទាំងវត្ថុតាង ឲ្យកម្លាំងការិយាល័យព្រហ្មទណ្ឌកម្រិតធ្ងន់ ស្រាវជ្រាវ និងអនុវត្តនីតិវិធីបន្ត ៕
ប្រភព៖ ការិយាល័យអន្តរាគមន៍ និងតម្រួតបទបញ្ជានៃស្នងការដ្ឋាននគរបាលខេត្តសៀមរាប
