បន្ទាយមានជ័យ៖ កាលពីម៉ោងប្រមាណ ៩:៤០នាទីព្រឹកថ្ងៃទី២៣ ខែមេសា ឆ្នាំ២០២៣ នៅចំនុចមុខផ្សារ.ក៥ ស្ថិតក្នុងភូមិទំនប់ក៥ សង្កាត់-ក្រុងប៉ោយប៉ែត មានករណីគ្រោះថ្នាក់ចរាចរណ៍មួយ ដោយបុរសម្នាក់បានត្រូវរថយន្តក្រឡុកស៊ីម៉ងត៍កិនបែកក្បាលស្លាប់ភ្លាមមួយរំពេច។
បើយោងតាមប្រភពពីកន្លែងកើតហេតុបានអោយដឹងថាជនរងគ្រោះមានឈ្មោះ ឡៃ អស្នា ភេទប្រុស អាយុ២៨ឆ្នាំ រស់នៅភូមិទួលប្រាសាទ សង្កាត់-ក្រុងប៉ោយប៉ែត បានជិះម៉ូតូមកឈប់នៅជិតកន្លែងកើតហេតុ។ ហើយមើលដល់ម៉ោងកើតហេតុក៏ត្រូវរថយន្តក្រឡុកស៊ីម៉ងត៍ ពាក់ស្លាកលេខភ្នំពេញ5A-3148 បើកបរពីជើងទៅត្បូង បុកកិនស្លាប់តែម្តង។
ក្នុងនោះប្រពន្ធជនរងគ្រោះក៏បានបញ្ជាក់ថា មុនពេលកើតហេតុប្តីរបស់ខ្លួនបានសុំលុយ ២ម៉ឺនរៀល ដើម្បីទៅទិញថ្នាំលេបសម្លាប់ខ្លួន ប៉ុន្តែគាត់មិនអោយ។ ស្រាប់តែដល់ម៉ោងខាងលើ គាត់ក៏ទទួលបានដំណឹងថាប្តីគាត់បានស្លាប់ ដោយសាររថយន្តកិនទៅវិញ៕
