ព្រះសីហនុ៖ ជនសង្សយ័ម្នាក់ដែលធ្វើសកម្មភាព ប្រើខ្សែរឹតក ប្លន់យកម៉ូតូ ពីជនរងគ្រោះអ្នករត់ម៉ូតូឌុបមួយរូបនៅស្រុកស្ទឹងហាវ ខេត្តព្រះសីហនុ ត្រូវបាននគរបាលបង្ក្រាបនិង ចាប់ខ្លួនបានហើយ ក្រោយរត់គេចខ្លួនជិត២០ថ្ងៃ។
ប្រភពពីនគរបាលជំនាញ ស្នងការដ្ឋានគរបាលខេត្តព្រះសីហនុឲ្យដឹងថា ជនសង្ស័យមានឈ្មោះ វង ស៊ីណា ភេទប្រុស អាយុ ៤០ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅសង្កាត់១ ក្រុងព្រះសីហនុ កាលពីថ្ងៃទី០៩ ខែមីនា ឆ្នាំ២០២៣ បានហៅម៉ូតូរបស់ជនរងគ្រោះជិះទៅស្រុកស្ទឹងហាវ ដោយឲ្យតម្លៃ ៣០,០០០រៀល (បីម៉ឺនរៀល) លុះដល់ចំណុច ជិតកន្លែងដាំកូនឈើ ក្នុងឃុំអូរត្រេះ ស្រុកស្ទឹងហាវ ខេត្តព្រះសីហនុ ជាកន្លែងស្ងាត់ ជនសង្ស័យបានយកខ្សែមករឹត កជនរងគ្រោះ បណ្ដាលឲ្យជនរងគ្រោះដួលសន្លប់ បន្ទាប់មកជនសង្ស័យបានយកម៉ូតូរបស់ជនរងគ្រោះជិះរត់គេចខ្លួនតែម្តង ។
បន្ទាប់ពីទទួលបានព័ត៌មាននេះលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានចាត់ឱ្យ កម្លាំងជំនាញនៃស្នងការដ្ឋាននគរបាលខេត្ត សហការជាមួយកម្លាំងអធិការដ្ឋាននគរបាលស្រុកស្ទឹងហាវ ធ្វើការស្រាវជ្រាវ រហូតស្វែងរកឃើញម៉ូតូ ១គ្រឿង ម៉ាក ហុងដា សេ125 ពណ៌ខ្មៅ គ្មានផ្លាកលេខ (ជាម៉ូតូរបស់ជនរងគ្រោះ) នៅចំណុចក្នុងព្រៃក្រោយចំណោតលោកយាយម៉ៅ ក្នុងសង្កាត់១ ក្រុងព្រះសីហនុ ដោយជនសង្ស័យបានយកទៅលាក់ទុកនៅទីនោះ ។ ក្រោយកំណត់បានមុខសញ្ញា ការស្រាវជ្រាវបានធ្វើបន្ត រហូតដល់រសៀលថ្ងៃទី៣០ ខែមីនា ឆ្នាំ២០២៣ ទើបនគរបាលចាប់ឃាត់ខ្លួនជនសង្ស័យបាន នៅម្តុំតោ២ សង្កាត់៤ ក្រុងព្រះសីហនុ ។
ជនរងគ្រោះឈ្មោះ ង៉ែត ហុកហួត ភេទប្រុស អាយុ ៥៧ឆ្នាំ ជនជាតិខ្មែរ មុខរបរ រត់ម៉ូតូឌូប រស់នៅសង្កាត់១ ក្រុងព្រះសីហនុ ។ បើតាមនគរបាលបញ្ជាក់ ថា ជនសង្ស័យរូបនេះ បានឆ្លើយសារភាពថា ខ្លួនបានពិតជាបានធ្វើសកម្មភាពប្លន់ករណីនេះពិតប្រាកដមែន ។ វត្ថុតាងចាប់យកបានរួមមាន មានម៉ូតូចំនួន ០១គ្រឿង និងទូរស័ព្ទ ០១គ្រឿង ហើយជនសង្ស័យរូបនេះ ការិយាល័យនគរបាលព្រហ្មទណ្ឌកម្រិតស្រាល នឹងកសាងសំណុំរឿងបញ្ជូនទៅសាលាដំបូងខេត្តព្រះសីហនុ ដើម្បីផ្តន្ទាទោសតាមផ្លូវច្បាប់ ៕
ប្រភព៖ Huy Bunleng News
