បាត់ដំបង៖ នៅថ្ងៃទី១១ ខែមីនា ឆ្នាំ២០២៣ វេលាម៉ោង ១៦និង៣០នាទី នៅលើផ្លូវជាតិលេខ៥៧ ចន្លោះគីឡូម៉ែត្រលេខ27-28 ត្រង់ចំណុចក្រុមទី១៧ ភូមិបឹងចែង ឃុំស្នឹង ស្រុកបាណន់ ខេត្តបាត់ដំបង មានករណីគ្រោះថ្នាក់ចរាចរណ៍មួយកើតឡើង រវាងរថយន្ត និងម៉ូតូ បណ្តាលអោយមនុស្សចំនួន ០៤នាក់ រងរបួសធ្ងន់។
លោកវរសេនីយ៍ឯក ប៉ាន់ វ៉ាន់នី អធិការនគរបាលស្រុកបាណន់ បានរាយការណ៍អោយដឹងថា គ្រោះថ្នាក់ចរាចរណ៍នេះបង្កឡើង ដោយរថយន្ត ០១គ្រឿង ម៉ាកគាម៉ូនីញ ឆ្នាំ2004 ពណ៏ស ផ្លាកលេខ បាត់ដំបង 2B-3490 បើកបរដោយឈ្មោះ ឈឿត វណ្ណឆុន ភេទប្រុស អាយុ៣៨ឆ្នាំ រស់នៅក្រុមទី៨ ភូមិព្រៃដាច់ សង្កាត់អូរម៉ាល់ ក្រុងបាត់ដំបង ខេត្តបាត់ដំបង រួមដំណើរចំនួន ០៤នាក់ ១.ឈ្មោះ ឈឿត ឆវី ភេទស្រី អាយុ៣០ឆ្នាំ, ២.ឈ្មោះ ពៅ ភេទប្រុស អាយុ២៨ឆ្នាំ, ៣.ឈ្មោះ តាក់ ម៉ាស្រី ភេទស្រី អាយុ៣ឆ្នាំ និង៤.ឈ្មោះ ខេម មរ៉ា ភេទស្រី អាយុ១ឆ្នាំ ទាំង០៤នាក់ រស់នៅភូមិព្រៃដាច់ សង្កាត់អូរម៉ាល់ ក្រុងបាត់ដំបង ខេត្តបាត់ដំបង បើកបរពីលិចទៅកើតដល់ចំណុចកើតហេតុខាងលើ បានទៅបុកម៉ូតូចំនួន ០២គ្រឿង ០១ម៉ូតូម៉ាកហុងដាឌ្រីម ពណ៏ខ្មៅ ឆ្នាំ២០២០ ផ្លាកលេខ ប៉ៃលិន 1C-6064 បើកបរដោយឈ្មោះ សឿ ចំរ៉ុង ភេទប្រុស អាយុ២៩ឆ្នាំ រស់នៅភូមិជីសាង ឃុំត្រែង រួមដំណើរម្នាក់ឈ្មោះ អ៊ូ សុខណាក់ ភេទស្រី អាយុ២២ឆ្នាំ ជាប្រពន្ធ និងម៉ូតូ ១គ្រឿងទៀត ម៉ាកហុងដាឌ្រីម ពណ៏ខ្មៅ ២០២២ ផ្លាកលេខ បាត់ដំបង 1AQ-8585 បើកបរដោយឈ្មោះ ឆៃ សល់ ភេទប្រុស អាយុ៣៥ឆ្នាំ រស់នៅភូមិផ្សារព្រុំ រួមដំណើរម្នាក់ឈ្មោះ ម៉ាក់ សាវុត ភេទប្រុស អាយុ៣០ឆ្នាំ រស់នៅភូមិវត្តតាមឹម ឃុំវត្តតាមឹម ស្រុកសង្កែ បើកបរពីកើតទៅលិច ក្នុងហេតុការណ៍នេះបណ្តាលអោយភាគីខាងម៉ូតូ រងរបួសធ្ងន់ទាំង ០៤នាក់។
តាមការពិនិត្យកន្លែងកើតហេតុ កម្លាំងនគរបាលជំនាញ នៃអធិការដ្ឋាននគរបាលស្រុកបាណន់ បានបញ្ជាក់ថា ករណីគ្រោះថ្នាក់ចរាចរណ៍ខាងលើនេះ បណ្តាលដោយសារ រថយន្តបើកបរមិនប្រកាន់ស្តាំក្នុងល្បឿនលឿន ក៏បានជ្រុលចង្កូតទៅបុកជាមួយម៉ូតូពេញមួយទំហឹងតែម្ដង។
បច្ចុប្បន្ននគរបាលស្រុកបាណន់ បានយកមធ្យោបាយបង្ក និងវត្ថុតាង បានយកទៅរក្សារទុក នៅការិយាល័យចរាចរណ៏ផ្លូវគោកខេត្តបាត់ដំបង ដើម្បីដោះស្រាយតាមនីតីវិធី។ ជនរងគ្រោះរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យខេត្តបាត់ដំបង តាមរថយន្តសង្រ្គោះឃុំស្នឹង និងរថយន្តសង្រ្គោះស្រុករតនមណ្ឌល៕
ប្រភព៖ អគ្គស្នងការដ្ឋាននគរបាលជាតិ
