ពោធិ៍សាត់៖ មុខសញ្ញាលួចសកម្ម០១នាក់ ត្រូវសមត្ថកិច្ចនៃអធិការដ្ឋាននគរបាលក្រុងពោធិ៍សាត់ ចាប់ឃាត់ខ្លួន ក្រោយធ្វើសកម្មភាពលួចម៉ូតូ០១គ្រឿង ពីក្នុងរបងផ្ទះជនរងគ្រោះ ស្ថិតនៅភូមិពាលញែក២ សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ ម៉ូតូដែលបាត់មានម៉ាកហុងដា ស្គុបពី ពណ៌ខ្មៅ សេរី០២១ គ្មានផ្លាកលេខ ម្ចាស់ឈ្មោះ កាវ ធារម្យ ភេទស្រី អាយុ៤២ឆ្នាំ កាលពីវេលាម៉ោង៤និង៣០នាទីទាបភ្លឺ ថ្ងៃទី០៨ ខែមីនា ឆ្នាំ២០២៣ ។
លោកវរសេនីយ៍ឯក កែវ សារិ អធិការ នៃអធិការដ្ឋាននគរបាលក្រុងពោធិ៍សាត់ បានប្រាប់ឲ្យដឹងថា ក្រោយពីទទួលបានព័ត៌មានពីប្រជាពលរដ្ឋភ្លាម លោកបានបញ្ជាអោយកម្លាំងអន្តរាគមន៍ និងជំនាញ ធ្វើការស្រាវជ្រាវតាមរកមុខសញ្ញាចោរកម្មលួចម៉ូតូអោយបានលុះដល់វេលាម៉ោង០៦និង៣៥នាទីព្រឹក នៅថ្ងៃ.ខែ.ឆ្នាំ.ដដែល សមត្ថកិច្ចបានឃាត់ខ្លួនជនសង្ស័យឈ្មោះ គា ម៉ុងថុល ដែលកំពុងបណ្តើរម៉ូតូ០១គ្រឿងនោះ នៅលើផ្លូវជាតិលេខ៥ ចំណុចក្បែរក្រុមហ៊ុនផ្ញើអីវ៉ាន់វីរៈប៊ុនថាំ ស្ថិតនៅភូមិពាលញែក១ សង្កាត់ផ្ទះព្រៃក្រុងពោធិ៍សាត់ ខេត្តពោធិ៍សាត់ ។ លោកអធិការបន្តថា ក្រោយសមត្ថកិច្ចបានសួរនាំឈ្មោះ គា ម៉ុងថុល ភេទប្រុស អាយុ៣២ឆ្នាំមុខរបរមិនពិតប្រាកដ ដែលជាមុខសញ្ញាសកម្ម ស្នាក់នៅដីទុកចោលមួយកន្លែង ស្ថិតនៅភូមិត្នោតទ្រេត សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ ជនសង្ស័បានសារភាពថា ខ្លួនពិតជាបានធ្វើសកម្មភាពលួចម៉ូតូ០១គ្រឿងនេះប្រាកដមែន បច្ចុប្បន្នជនសង្ស័យរួមទាំងវត្ថុតាង សមត្ថកិច្ចឃាត់ខ្លួនបណ្តោះអាសន្ននៅអធិការដ្ឋាននគរបាលក្រុងពោធិ៍សាត់ ដើម្បីកសាងសំណុំរឿងចាត់ការតាមនិតិវិធីច្បាប់៕
ប្រភព៖ នាយកដ្ឋាបផ្សព្វផ្សាយអប់រំ
