បន្ទាយមានជ័យ ៖ អគ្គីភ័យនៅពីម៉ោងជិត៧ដល់ម៉ោងជិត៨ព្រឹកថ្ងៃទី១៣ ខែកុម្ភៈ ឆ្នាំ២០២៣ នេះបាននឹងកំពុងឆាបឆេះយ៉ាងសន្ធោសន្ធៅលើផ្ទះពលរដ្ឋជាប់ៗគ្នានៅផ្លូវជាតិលេខ៥ ខាងត្បូង ឬម្ខាងផ្លូវទល់មុខធនាគារអេស៊ីលីដាក្រុងប៉ោយប៉ែតក្នុងភូមិអូរជ្រៅសង្កាត់ អូរជ្រៅ ក្រុងប៉ោយប៉ែត ខេត្តបន្ទាយមានជ័យ ។
ជាមួយគ្នានេះ កងកម្លាំងនគរបាល កងរាជអាវុធហត្ថ យោធា មន្ត្រីអាជ្ញាធរ ក្រុមសង្គ្រោះ និងរថយន្តពន្លត់អគ្គីភ័យជាង១០គ្រឿង ក៏បាននឹងកំពុងពន្លត់និងបញ្ជូនបន្ថែមពីខេត្តនិងស្រុក ក្រុងនានា ដើម្បីជួយអន្តរាគមន៍ពន្លត់អគ្គីភ័យនេះ ។
ប្រភពអ្នកឃើញហេតុការណ៍ និងមន្ត្រីអាជ្ញាធរមានសមត្ថកិច្ចនិយាយថា៖ ភ្លើងបានចាប់ផ្តើមឆេះចេញពីផ្ទះតៀមរបស់ឈ្មោះ លី តៀងសេង លក់គ្រឿងអគ្គិសនី អេឡិចត្រូនិក ហើយបានរាលទៅដល់ផ្ទះជិតខាងមួយចំនួនទៀត ដែលជាប្លុកលំនៅឋាន និងហាងអាជីវកម្មដ៏មមាញឹកមួយដែរក្នុងក្រុងប៉ោយប៉ែត នេះ។
ទោះយ៉ាងណាមន្ត្រីបានបន្តថា៖ ព័ត៌មានបឋមនេះនឹងត្រូវផ្ទៀងផ្ទាត់ក្នុងពេលបន្ទាប់ ។ ក្នុងហេតុការណ៍គ្រោះអគ្គីភ័យនេះ គេឃើញឯកឧត្តម អ៊ុំ រាត្រី អភិបាលខេត្តបន្ទាយមានជ័យ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត លោក គាត ហ៊ុល អភិបាលក្រុងប៉ោយប៉ែត និងមន្ត្រីកងកម្លាំងទាំង៣ប្រភេទ ក្រុមអ្នកជួយសង្គ្រោះ និងរថយន្តពន្លត់អគ្គីភ័យរបស់ផ្នែកឯកជន ក៏បានទៅដល់និងដឹកនាំប្រតិបត្តិការនេះផង៕
ប្រភព៖ អគ្គស្នងការដ្ឋាននគរបាលជាតិ
