តាកែវ៖ ដោយមានការចង្អុលបង្ហាញពីលោកឧត្តមសេនីយ៍ទោ ឈាន ផាន់ណារ៉ា ស្នងការនគរបាលខេត្តតាកែវ និងមានការសម្របសម្រួលនិតិវិធីច្បាប់ពីឯកឧត្តម ឯក ឆេងហ៊ួត ព្រៈរាជអាជ្ញា នៃអមអយ្យការសាលាដំបូងខេត្តតាកែវ ថ្ងៃចន្ទ៣រោច ខែបុស្ស ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី០៩ ខែមករា ឆ្នាំ២០២៣ វេលាម៉ោង ១៩:១០នាទី នៅភូមិសុបិណ ឃុំព្រៃអំពក ស្រុកគិរីវង់ ខេត្តតាកែវ មានកើតករណីធ្វើអោយខូចខាចដោយចេតនា ដែលបង្កឡើងដោយក្រុមជនសង្ស័យមានគ្នាចំនួន០២នាក់រួមមានដូចខាងក្រោម៖
ជនសង្ស័យទី១ មានឈ្មោះ ខុន ង៉ើន ភេទប្រុស អាយុ១៩ឆ្នាំ មានទីលំនៅភូមិស្លា ឃុំតាអូរ ស្រុកគិរីវង់ ខេត្តតាកែវ និងម្នាក់ទៀតឈ្មោះ ងេន វ៉ាន់ណេត ភេទប្រុស អាយុ១៨ឆ្នាំ មានទីលំនៅភូមិក្រសាំងពុល ឃុំតាអូរ ស្រុកគិរីវង់ ខេត្តតាកែវ បានធ្វើសកម្មភាពជិះម៉ូតូដេញកាប់ប្រដាប់ដោយកាំបិតបុ័ងតោកាប់ទៅលើជនរងគ្រោះដែលកំពុងជិះម៉ូតូម្នាក់ឯង ឈ្មោះ ស៊ាន គាថា ភេទប្រុស អាយុ ១៦ឆ្នាំ មានទីលំនៅភូមិសុបិណ ឃុំព្រៃអំពក ស្រុកគិរីវង់ ខេត្តតាកែវ តែមិនបណ្តាលអោយជនរងគ្រោះរងរបួសឡើយ ដោយជនរងគ្រោះគេចខ្លួនរួច ពេលនោះជនសង្ស័យខាងលើ ខឹងកាប់មិនបាន ហើយបានកាប់កញ្ចក់តូបរបស់ឈ្មោះ ហុន រស់ ភេទប្រុស អាយុ៣៨ឆ្នាំ មានទីលំនៅភូមិសុបិណ ឃុំព្រៃអំពក ស្រុកគិរីវង់ ខេត្តតាកែវ ក្នុងខណះពេលដែលម្ចាស់តូបមិននៅតូប ក្នុងនោះដែរក្រុមជនសង្ស័យក៏យកកាំបិតបុ័ងតោ កាប់ទៅកាបាំងម៉ូតូរបស់ជនរងគ្រោះបន្ថែមទៀត បណ្តាលអោយបែកផ្នែកខាងឆ្វេង ។ ចំពោះមូលហេតុ គឺដោយសារតែ គំនុំ ។
សូមបញ្ជាក់ថា ករណីនេះសមត្ថកិច្ចយើងទើបទទួលពាក្យបណ្តឹងពីជនរងគ្រោះ នៅថ្ងៃទី១០ ខែមករា ឆ្នាំ២០២៣ វេលាម៉ោង១៧: ៣៥នាទី ក្រោយមកលោកវរសេនីយ៍ឯក យុគ សារ៉ាត់ អធិការនគរបាលស្រុក បានចាត់លោកវរសេនីយ៍ទោ យ៉ាង តារា អធិការរងនគរបាលយុត្តិធម៌ និងលោកវរសេនីយ៍ត្រី ហែម សីហបូរ៉ា នាយផ្នែកយុត្តិធម៌ សហការជាមួយកលោកនាយប៉ុស្តិ៍នគរបាលរដ្ឋបាលព្រៃអំពក និង លោកនាយប៉ុស្តិ៍នគរបាលរដ្ឋបាលតាអូរ កំណត់មុខសញ្ញាខាងលើហើយធ្វើការឃាត់ខ្លួនជនសង្ស័យតែម្តង ។ បច្ចុប្បន្នសមត្ថកិច្ចជំនាញបានធ្វើការនាំខ្លួនជនសង្ស័យ មកធ្វើការសាកសួរនិង កសាងសំណុំរឿងតាមនីតិវិធី ៕
ប្រភព៖ អធិការដ្ឋាននគរបាលស្រុកគិរីវង់
