ភ្នំពេញ៖ ដោយមានការចង្អុលបង្ហាញពីលោកវរសេនីយ៍ឯក ហង្ស មុនី អធិការនគរបាលខណ្ឌកំបូលនៅថ្ងៃទី១៣ ខែធ្នូ ឆ្នាំ២០២២ វេលាម៉ោងប្រហែល ១៥ :៣០នាទី សមត្ថកិច្ចរបស់អធិការដ្ឋាននគរបាលខណ្ឌកំបូល បានល្បាតក្នុងមូលដ្ឋានដល់ចំណុចផ្លូវក្រវ៉ាត់ក្រុងទី៣ សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ បានជួបក្រុមជនសង្ស័យ ភ្លាមនោះសមត្ថកិច្ចយើងឃាត់បានជនសង្ស័យចំនួនពីរនាក់ ឈ្មោះ ខេន វិច្ឆិកា និងឈ្មោះ សន វាសនា បើកម៉ូតូម៉ាកប៊ីត ពណ៌ខៀវលាយស សេរី២០១៩ ពាក់ផ្លាកលេខ ភ្នំពេញ 1H-1725 ។ ពេលសាកសួរ ជនសង្ស័យទាំងពីរនាក់នោះបានសារភាពថា «កាលពីថ្ងៃទី១ ខែធ្នូ ឆ្នាំ២០២២ វេលាម៉ោងប្រហែល ១៣និង៣០នាទី ពួកខ្លួន និងបក្សពួក (មានឈ្មោះ ករុណា, ច្រាំង, រដ្ឋា ) បានធ្វើសកម្មភាព ឆក់យកខ្សែករ ពីមនុស្សស្រីម្នាក់ កំពុងជិះម៉ូតូម៉ាកប៊ីត ពណ៌ខ្មៅ មិនចាំសេរី នៅតាមផ្លូវក្រវ៉ាត់ក្រុងទី៣ ភូមិគោកខ្សាច់ សង្កាត់ភ្លើងឆេះរទេះ។ បន្ទាប់ពីមានចម្លើយសារភាពរបស់ជនសង្ស័យទាំង០២នាក់រួចមក ថ្ងៃទី១៤ ខែធ្នូ ឆ្នាំ២០២២ វេលាម៉ោងប្រហែល ១១និង៣០នាទី កម្លាំងរបស់អធិការដ្ឋាននគរបាលខណ្ឌកំបូល បានសហការណ៍ជាមួយសមត្ថកិច្ចប៉ុស្តិ៍នគរបាលរដ្ឋបាលពងទឹក ទៅឃាត់ខ្លួនជនសង្ស័យឈ្មោះ សុវណ្ណ ករុណា ភេទប្រុស អាយុ១៨ឆ្នាំ នៅចំណុចមុខផ្ទះគ្មានលេខ ផ្លូវបេតុង ភូមិព្រៃកី សង្កាត់ពងទឹក ខណ្ឌដង្កោ នាំយកមកសាកសួរបន្ត និងវេលាម៉ោងប្រហែល ១៦និង៤០នាទី កម្លាំងរបស់អធិការដ្ឋាននគរបាលខណ្ឌកំបូល បានសហការណ៍ជាមួយសមត្ថកិច្ចប៉ុស្តិ៍នគរបាលរដ្ឋបាលក្រាំងពង្រ ឈានទៅឃាត់ខ្លួនជនសង្ស័យឈ្មោះ រៀម បូពា ហៅ ច្រាំង ភេទប្រុស អាយុ១៨ឆ្នាំ នៅចំណុចមុខផ្ទះគ្មានលេខ ផ្លូវបេតុង ភូមិទឹកថ្លា សង្កាត់ក្រាំងពង្រ ខណ្ឌដង្កោ នាំយកមកសាកសួរបន្ត។
ប្រភព៖ អធិការដ្ឋាននគរបាលខណ្ឌកំបូល
