កំពង់ចាម ៖ នៅថ្ងៃទី១៣ ខែធ្នូ ឆ្នាំ២០២២ វេលាម៉ោង១៤និង៣០នាទី បន្ទាប់ពីទទួល បានបណ្តឹងពីប្រជាពលរដ្ឋ លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានបញ្ជាដល់កម្លាំងជំនាញផែនការងារនគរបាលព្រហ្មទណ្ឌ សហការជាមួយ កម្លាំងជំនាញរបស់អធិការដ្ឋាននគរបាលស្រុកព្រៃឈរ និងអាជ្ញាធរមូលដ្ឋាន ដោយក្នុងកិច្ចប្រតិបត្តិការក្រោមការដឹកនាំសម្របសម្រួលផ្ទាល់ពី លោក សុធា ពិសិដ្ឋ ព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម ចុះបង្ក្រាបករណី បើក និងលេងល្បែងស៊ីសងខុសច្បាប់ (ជល់មាន់ភ្នាល់ដាក់ប្រាក់) នៅចំណុចតាមផ្លូវលំក្រោមដើមអំពិលទឹកបារាំង ស្ថិតនៅព្រំប្រទល់ភូមិបន្ទាយថ្មី ឃុំសំរោង និងភូមិមេមាំង ឃុំល្វា ស្រុកព្រៃឈរ ខេត្តកំពង់ចាម ។
ជាលទ្ធផលកម្លាំងបានបង្ក្រាបចាប់ឃាត់ខ្លួនមនុស្សចំនួន៨នាក់ និងដកហូតទូរស័ព្ទដៃចំនួន០៧គ្រឿង, មាន់ងាប់០១ក្បាល, កញ្ចក់បាំងមាន់ចំនួន០១, ស្គុតរុំខ្នាយមាន់មួយចំនួន, ម៉ូតូចំនួន០៧គ្រឿង ប្រគល់ឲ្យប៉ុស្តិ៍នគរបាលរដ្ឋបាលសំរោងជាអ្នកគ្រប់គ្រង និងជញ្ជីងថ្លឹងមាន់ចំនួន០១ ។
បច្ចុប្បន្ន មនុស្សទាំង៨នាក់ រួមនឹងវត្ថុតាងខាងលើ ត្រូវបានបញ្ជូនទៅកាន់ស្នងការដ្ឋាននគរបាលខេត្តកំពង់ចាម ដើម្បីចងក្រងសំណុំរឿងតាមនីតិវិធី តាមបញ្ជាលោក សុធា ពិសិដ្ឋ ព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម ៕
ប្រភព៖ អគ្គស្នងការដ្ឋាននគរបាលជាតិ
