បាត់ដំបង ៖ កម្លាំងអធិការដ្ឋាននគរបាលក្រុងបាត់ដំបង បានទទួលពាក្យបណ្តឹងពីពលរដ្ឋឈ្មោះ យឹម កុសល់ ភេទប្រុស អាយុ៣៣ឆ្នាំ មានទីលំនៅភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង ថាមានករណីលួចមានស្ថានទម្ងន់ទោស (ប្លន់ដោយប្រើប្រាស់ប៉ែលមកគំរាមកំហែងយកម៉ូតូនិងទ្រព្យសម្បត្តិ) កាលពីថ្ងៃទី០៧ ខែកញ្ញា ឆ្នាំ២០២២ វេលាម៉ោង២១និង៣០នាទី នៅត្រង់ចំណុចក្រុមទី០៤ ភូមិរំចេក២ សង្កាត់រតនៈ ក្រុងបាត់ដំបង ខេត្តបាត់ដំបង។ ក្នុងនោះសម្ភារបាត់បង់រួមមាន៖ ម៉ូតូ១គ្រឿងម៉ាកវីវ៉ា ស៊េរីឆ្នាំ២០០៨ ពណ៌ខ្មៅ ។
ករណីនេះ ដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់របស់លោកវរសេនីយ៍ឯក លឹម ពុទ្ធីឡា ស្នងការងផែនការងារនគរបាលព្រហ្មទណ្ឌ លោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបង បានដឹកនាំកម្លាំងផ្នែកជំនាញធ្វើការស្រាវជ្រាវនិងស៊ើបអង្កេតស្រាវជ្រាវ ឃាត់ខ្លួនជនសង្ស័យម្នាក់ឈ្មោះ ស៊ុំ សុភ័ក្រ ភេទប្រុស អាយុ២៥ឆ្នាំ មានទីលំនៅភូមិរំចេក២ សង្កាត់រតនៈ ក្រុងបាត់ដំបង ខេត្តបាត់ដំបង ដែលជាប់ពាក់ព័ន្ធករណីអំពើលួចមានស្ថានទម្ងន់ទោសខាងលើ មកកាន់អធិការដ្ឋាននគរបាលក្រុងបាត់ដំបងដើម្បីធ្វើការសាកសួរ ។
ក្នុងពេលឃាត់ខ្លួន សមត្ថកិច្ចបានធ្វើដកហូតសម្ភារៈរួមមាន ៖ -ម៉ូតូម៉ាកវីវ៉ា ១គ្រឿង ស៊េរីឆ្នាំ២០០៨ ពណ៌ខ្មៅ ប៉ែលដងឫស្សី ០១ ពូថៅ ០១ ។
ក្រោយពីសាកសួរជនសង្ស័យបានសារភាពថា ពិតជាបានប្រើប្រាស់ប៉ែលប្លន់យកម៉ូតូនិងលុយជនរងគ្រោះពិតប្រាកដមែន ។ បច្ចុប្បន្ន ជនសង្ស័យត្រូវបានកម្លាំងនគរបាលក្រុងកសាងសំណុំរឿងបញ្ជូនមកការិយាល័យជំនាញនៃស្នងការដ្ឋាននគរបាលខេត្ត ដើម្បីអនុវត្តបន្តតាមនីតិវិធី ៕
ប្រភព៖ អគ្គស្នងការដ្ឋាននគរបាលជាតិ
