បន្ទាយមានជ័យ ៖ បុរសម្នាក់រងរបួសធ្ងន់(បាក់ជើងខាងស្តាំ) បន្ទាប់ពីជួបគ្រោះថ្នាក់ចរាចរណ៍ដោយរថយន្តដឹកទឹកកកអនាម័យ ប៉ះទង្គិចជាមួយគោយន្ត ។ ករណីគ្រោះថ្នាក់ចរាចរណ៍នេះបានកើតឡោះងនៅវេលាម៉ោង១៦និង១០នាទី ថ្ងៃទី៣០ ខែកក្កដា ឆ្នាំ២០២២ ចំណុចមុខរបងសាលាស្រុកស្វាយចេក នៅលើកំណាត់ផ្លូវជាតិលេខ៥៦A ក្នុងភូមិស្ទឹង ឃុំ រលួស ស្រុកស្វាយចេក ខេត្តបន្ទាយមានជ័យ ។
នគរបាលស្រុកស្វាយចេក បានឲ្យដឹងថា ជនរងគ្រោះឈ្មោះមឿន លិច ភេទប្រុស អាយុ២៨ឆ្នាំ រស់នៅភូមិខ្សាច់ល្អិត ឃុំចុងដូង ស្រុកបារាយណ៍ ខេត្តកំពង់ធំ អ្នកបើកគោយន្តកន្ត្រៃដឹកគ្រែលក់ ។ មុនពេលកើតហេតុ អ្នកបើកគោយន្តកន្ត្រៃនិងប្រពន្ធ បានឈប់គោយន្តនៅលើចិញ្ចើមថ្នល់ខាងឆ្វេងនៃផ្លូវបែរក្បាលទៅទិសខាងជើងដើម្បីសម្រាក ។ លុះនៅវេលាកើតហេតុ ស្រាប់តែមានរថយន្តម៉ាក ហ៊ីយ៉ាន់ដាយដឹកទឹកកកអនាម័យ ពាក់ស្លាកលេខភ្នំពេញ 3B.9474 បើកបរដោយឈ្មោះ វ៉ា វី ភេទប្រុស អាយុ៣៧ឆ្នាំ រស់នៅភូមិព្រែកជីក ឃុំបត់ត្រង់ ស្រុកមង្គលបូរី ខេត្តបន្ទាយមានជ័យ បានបុកពេញទំហឹងបណ្តាលឲ្យឈ្មោះ មឿន លិច ជាប្តីរងរបួសបាក់ជើងខាងស្តាំ ត្រូវបានប្រពន្ធដឹកទៅព្យាបាលនៅមន្ទីពេទ្យបង្អែកខេត្ត មិត្តភាពកម្ពុជា-ជប៉ុន នៅស្រុកមង្គលបូរី ។
ក្រោយកើតហេតុ សមត្ថកិច្ចបានចុះធ្វើការវាស់វែង និងនាំយកមធ្យោបាយទាំង២គ្រឿងទៅរក្សាទុកនៅអធិការដ្ឋាននគរបាលស្រុកស្វាយចេក រង់ចាំធ្វើការដោះស្រាយនៅពេលក្រោយ ៕
ប្រភព៖ អគ្គស្នងការដ្ឋាននគរបាលជាតិ
