កំពង់ស្ពឺ៖ កម្លាំងនគរបាលផ្នែកព្រហ្មទណ្ឌ នៃអធិការដ្ឋាននគរបាលស្រុកភ្នំស្រួច បានឃាត់ខ្លួនជនសង្ស័យម្នាក់ពាក់ព័ន្ធករណីលួចម៉ូតូ។ ប្រតិបត្តិការបានធ្វើឡើងកាលពីថ្ងៃទី២៩ ខែកក្កដា ឆ្នាំ២០២២ វេលាម៉ោង១០៖៣០នាទី នៅចំណុចចន្លោះគីឡូម៉ែត្រ៦៥-៦៦លើផ្លូវជាតិលេខ៤ ស្ថិតនៅភូមិផ្សារត្រពាំងក្រឡឹង ឃុំគីរីវន្ត ស្រុកភ្នំស្រួច ខេត្តកំពង់ស្ពឺ។
សមត្ថកិច្ចបានឲ្យដឹងថាជនសង្ស័យឈ្មោះ វាង យ៉ាងទៀង ភេទប្រុស អាយុ៣៣ឆ្នាំ រស់នៅភូមិទី៤ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។ សមត្ថកិច្ចដកហូតវត្ថុតាងៈ ម៉ូតូ០១គ្រឿង ម៉ាកZOOMER-X ពណ៌ខៀវ ពាក់ផ្លាកលេខ ស្ទឹងត្រែង1C-9725។
សមត្ថកិច្ចបានបន្តថា ជនសង្ស័យបានធ្វើសកម្មភាព ឆរបោក កាលពីវេលាម៉ោង០៩៖៣០នាទី នៅចំណុចភូមិផ្សារត្រែងត្រយឹង ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។ ជនសង្ស័យឈ្មោះ វាង យ៉ាងទៀង បានឆ្លើយសារភាពខ្លួនបាន ធ្វើសកម្មភាពឆរបោកយកម៉ូតូខាងលើ ខណៈពេលដែល ឈ្មោះ ឃុន ចាន់ធី ភេទស្រី អាយុ៤០ឆ្នាំ រស់នៅក្នុងភូមិកើតហេតុខាងលើ បានប្រើជនសង្ស័យ អោយជិះម៉ូតូរបស់ខ្លួនខាងលើ ដើម្បីជូនក្មួយប្រុសរបស់គាត់ឈ្មោះ ទូច គំនិត អាយុ៣២ឆ្នាំ រស់នៅភ្នំពេញ ទៅចំណតរថយន្តក្នុងផ្សារ ពេលដែលជូនរួចហើយឈ្មោះ វាង យ៉ាងទៀង ក៏ជិះម៉ូតូខាងលើសំដៅទៅទិសខាងកើតតែម្ដង គោលបំណងទៅយកទៅលក់នៅខេត្តព្រៃវែង។
ករណីខាងលើសមត្ថកិច្ចជំនាញបានកសាងសំណុំរឿង បញ្ជូនជនសង្ស័យទៅស្នងការដ្ឋាន ចាត់ការតាមនីតិវិធី ៕
ប្រភព៖ អគ្គស្នងការដ្ឋាននគរបាលជាតិ
