បាត់ដំបង ៖ ដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់លោកឧត្តមសេនីយ៍ត្រី កុយ ហៀង ស្នងការរងផែនការងារប្រឆាំងគ្រឿងញៀន លើការងារបង្ក្រាបបទល្មើសគ្រឿងញៀនខុសច្បាប់រួមមាន ការរក្សាទុក ចែកចាយ ជួញដូរ ប្រើប្រាស់ និងការដាំដុះដំណាំដែលមានផ្ទុកនូវសារធាតុញៀនផ្សេងៗ នៅថ្ងៃទី២២ ខែកក្កដា ឆ្នាំ២០២២ វេលាម៉ោង១១និង៣០នាទី លោកវរសេនីយ៍ឯក ឡុង យោធាវីរៈ អធិការនគរបាលស្រុកឯកភ្នំ បានដឹកនាំកម្លាំងក្នុងអង្គភាពចុះប្រតិបត្តិការកាប់បំផ្លាញដំណាំកញ្ឆាខុសច្បាប់ចំនួន ០១លើក ត្រង់ចំណុចក្រុមទី០១ ភូមិគង់ទុំ ឃុំពាមឯក ស្រុកឯកភ្នំ ខេត្តបាត់ដំបង ។
ក្នុងកិច្ចប្រតិបត្តិការនេះ សមត្ថកិច្ចបានកាប់និងដកបំផ្លាញដំណាំកញ្ឆាខុសច្បាប់ចំនួន ៥០ដើម និងបានដកហូតសម្ភារៈសម្រាប់ជក់កញ្ឆាមួយចំនួន ដែលមានម្ចាស់ផ្ទះឈ្មោះ ប៊ុន ម៉េត ភេទប្រុស អាយុ ៤៧ឆ្នាំ រស់នៅក្រុមទី០១ ភូមិគង់ទុំ ឃុំពាមឯក ស្រុកឯកភ្នំ ខេត្តបាត់ដំបង ។
ករណីនេះ ម្ចាស់ផ្ទះដាំដុះដំណាំកញ្ឆាខុសច្បាប់ខាងលើនេះបានរត់គេចខ្លួនមុនពេលសមត្ថកិច្ចចុះអន្តរាគមន៍ ៕
ប្រភព៖ អគ្គស្នងការដ្ឋាននគរបាលជាតិ
